1 Samuweli 10 - IBAYIBOLO 2024

¹ U Samuweli akasenda ibotolo ilya mafuta nukughapungulila pamutu uwa Sabuli, po akamufyofyonta. Akanena akati, “U Mwene akupakazya ukuti ubanje we mwene uwa bantu bache aba Izilayeli. Ukwiza pakubalaghila abantu bache nukubapoka munyobe izya balwani babo.

² Bo ukubwela kunyumba ukwiza pakukomana na banavuli babili pipumpa ilya Lakelo mu Zeliza muchisu icha Benjamini, babo bakwiza pakukubuzya ukuti impunda zyaghiwa, sona ughuso aleka pakuzipasikizya, loli akukupasikizya awe. Akunena akuti, ‘Nkimba imbombe choni, pakuti umwana wane atakuboneka?’ ”

³ Bo wadumusannya palapala, ukwiza pakufika pikwi ilya mupandapanda mu Taboli. Palapala ukwiza pakukomana na bantu batatu, weka anyamuye abana aba mbuzi batatu, yumo anyamuye ivibama vitatu, sona uyunji anyamuye inyambi iya ikwela inyizule nu vinyo, bakubuka ku Beteli pakumwiputa u Chala.

⁴ Abantu balabala bakwiza pakukulamuka, sona bakwiza pakukupa ivibama vibili, po awe ukwiza pakuvipokela.

⁵ Pisinda pache ukwiza pakubuka kwighamba ilya Chala ku Gibeya, kuko kuli akabukatila aka basilikali aba ba Filisiti. Bo ukupalamila ku kaya akakulu, ukwiza pakukomana na kabukatila aka balaghuzi, kako kakufuma kubuzilo ubwakwiputilako, bo bakulizya ivinanda ni visekeseke na malongi sona na mapango, bo bakulaghula.

⁶ Umuzimu uwa Mwene akwiza pakwinjila na maka, po nawe ukwiza pakwanda pakulaghula. Pisinda pache ukwiza pakwanduka pakuba muntu uyunji bulo.

⁷ Nanti ivimanyilo vinivi vyakwanilisiwa, bomba bulo chosi chicho ubaghiye pakubomba, pakuti u Chala ali nawe.

⁸ “Longolelapo ku Giligali, kuko nkwiza pakukomana nawe pakubika ivyakwiyipa ivyakocha nivyabupoka. Loli ulindilile amasiku seveni kulakula mupaka nize nukukubuzya zizyo ubaghiye pakubomba.”

⁹ Bo u Sabuli aghalabuka ukuti alekane nu Samuweli, u Chala akawandula umoyo uwa Sabuli, sona ivimanyilo vyosi vivyo u Samuweli akamubuzya vikakwanilisiwa pisiku lilalila.

¹⁰ Bo bafika mu Gibeya, akakomana na kabukatila aka balaghuzi. Umuzimu uwa Chala akamwinjila na maka u Sabuli, po wepe akanda pakulaghula.

¹¹ Abantu bosi babo bakamumanya u Sabuli pakwanda, bo bennya ukuti wepe ali pakulaghula bakalalusannya benebene bakati, “Nkimba choni chicho chamuwila umwana uwa Kishi? Fwandi u Sabuli aba uwa bamo uwa balaghuzi?”

¹² Umuntu yumo yuyo akikalagha kulakula akamula akati, “Nkimba uwise wewenu?” Pano po papo pakandila ichili ichakuti, “Nkimba u Sabuli wepe wa bamo uwa balaghuzi?”

¹³ Bo u Sabuli amala pakulaghula, akabuka kubuzilo ubwakwiputilako pighamba.

¹⁴ Uwise umunandi uwa Sabuli akamulalusya u Sabuli poka nu wambombo wache akati, “Nkimba mwame kwiyi?” U Sabuli akamwamula akati, “Twame pakulonda impunda.” Bo twapotwa pakuzyagha, tukabuka kwa Samuweli.

¹⁵ Uwise umunandi uwa Sabuli akamulalusya akati, “Nkimba akakubuzya ichoni?”

¹⁶ U Sabuli akamwamula akati, “U Samuweli akatulingannya akiza bulo ukuti impunda zyinyu zyaghiwa.” Loli atakamubuzya uwise umunandi zizyo u Samuweli akamubuzya ukuti akwiza pakuba we mwene.

U Sabuli akwimikiwa pakuba we mwene

¹⁷ U Samuweli akabitizya aba Izilayeli kulukomano pamaso pa Mwene mu Mizipa,

¹⁸ po akababuzya akati, “U Mwene u Chala uwa Izilayeli ati, ‘Nkabefya aba Izilayeli mu Ijiputi, nukubapoka munyobe izya ba Ijiputi, sona nizya bamwene bosi babo bakabakanyilila.’

¹⁹ Loli ilelo mwamukana u Chala winyu, yuyo akabapoka muntamyo zyinyu na mumayimba ghinyu ghosi. Amwe mwambuzya mwati, ‘Awe! Utwimikile u mwene.’ Polelo mubungane pamaso pa Mwene ukuyana ninko zyinyu, sona ni nyumba zyinyu.”

²⁰ Bo u Samuweli azibungannya poka inko zyosi izya ba Izilayeli, po uluko ulwa Benjamini lo lulo lukasaliwa.

²¹ Po akiza nabo pantazi paba Benjamini, ukuyana nuluko lwabo, sona uluko ulwa Matili lo lulo lukasaliwa. Pabumalilo pache, u Sabuli umwana uwa Kishi weyuyo akasaliwa. Loli bo bakumulondelezya, batakamwagha nakumokumo.

²² Po bakamubuzikizya u Mwene bakati, “Nkimba umuntu yunuyu iziteko kuno?” U Mwene akamula akati, “Eee, avwamite pakasi pakatundu.”

²³ Po bakachimbilila kulakula pakumusenda. Bo imilila pakasi pabantu, akaba mutalipo ukubachila abanji bosi.

²⁴ U Samuweli akababuzya abantu bala akati, “Nkimba mukumwennya umuntu yuyo u Mwene amusalite? Atalipo nayumo umuntu pakasi pabantu bosi yuyo ayanite nawe.” Po abantu bosi bakakolomoka bakati, “Tukukulondela ubumi ubutali!”

²⁵ Po u Samuweli akabalingannya abantu indaghilo izya bumwene. Akazisimba mwibuku nukulibika pamaso pa Mwene. Pisinda pache u Samuweli akababwezya abantu bala mutwaya twabo.

²⁶ Wepe u Sabuli akabwela ku Gibeya, poka na banavuli abamaka, babo u Chala akaghapalamasya amoyo ghabo.

²⁷ Loli abantu bamo abamwalwemwalwe bakati, “Nkimba umuntu yunuyu angatupoka bulibuli?” Bakamusamula u Sabuli, sona batakamupa ivyabupi navimovimo. Loli u Sabuli akaba bulo myee.