1 Samuweli 1 - IBAYIBOLO 2024

Ukupapiwa ukwa Samuweli

¹ Akabapo umuntu yumo yuyo akaba we Elikana umu Zufi wamu Lamatayimu, muchisu icha mumaghamba icha Efulayimu. U Elikana akaba mwana uwa Yelohamu, umwana uwa Elihu, umwana uwa Tohu, umwana uwa Zufi, yuyo akaba waluko ulwa Efulayimu.

² U Elikana akaba na bachi babili, umuchi usongo akaba we Hana, sona umunandi akaba we Penina. U Penina akaba na bana, loli u Hana atakaba na bana nabamobamo.

³ Umwaka nu mwaka u Elikana akepaghako kukaya kache nukubuka ku Shilo pakumwiputa u Mwene Uwamaka Ghosi. Kulakula akabikagha ivyakwiyipa, kuko abana babili aba Eli, u Hofini nu Finehasi bakaba baputi aba Mwene.

⁴ Pisiku lilyo u Elikana akabikila ivyakwiyipa, akamugabilaghako inyama umuchi u Penina, sona na bana bache bosi.

⁵ U Elikana akamugabilagha u Hana inyama inyinji nkani, pachifukwa ichakuti akamughana nkani, napapo u Mwene akamupela pakuba mughumba.

⁶ Pachifukwa ichakuti u Mwene akamupela pakuba mughumba, u Penina akamuyebagha nukumusamula ukuti amukalalizye.

⁷ Zinizi zikaba bunubu umwaka nu mwaka. Pakabalilo kosi bo u Hana abuka ku Nyumba iya Mwene u Penina akamukalalizya, umwakuti u Hana akalindilagha bulo pakulila, sona atakalondagha na pakulya.

⁸ Lumo umulume wache u Elikana akamulalusyanga akatinji, “Wee Hana, nkimba choni chicho ukulila? Choni chicho utakulya? Nkimba choni chicho we musulumannye? Fwandi mubumi bwako ane intakubachila abana abalumendo teni?”

⁹ Isiku limo bo bamala bulo pakulya nukung'wela mu Shilo, u Hana akimilila. Pakabalilo kalakala umuputi u Eli akikalagha pachitengo papipi nu mulyango uwa Nyumba iya Mwene.

¹⁰ Pachifukwa icha kutamiwa nkani mumoyo wache, u Hana akiputa kwa Mwene, bo akulila nkani.

¹¹ Po akalapa ichilapo akati, “Wee Mwene Uwamaka Ghosi, nanti wennya bulo intamyo zyane nukunkumbuka, sona nanti utakunduvya ane ne wambombo wako pakumpa umwana umulumendo, umwana yula nkwiza pakumupa u Mwene amasiku ghosi agha bumi bwache, sona atakwiza pakumwapo nalumo isisi zyache.”

¹² Bo akwendelela pakumwiputa u Mwene bulabula, u Eli akawenelezya umulomo wache.

¹³ U Hana akiputagha mumoyo wache, sona amalomo ghache ghakabonekagha ngati po akunena, loli atakafumyanga amazyu. U Eli akinong'onagha ukuti u Hana akolizwe.

¹⁴ Po akamulalusya akati, “Wee mukolo, nkimba ukwiza pakukolwa mupaka liyi? Bukagha, ukukolwa kwako kumale tasi.”

¹⁵ U Hana akamwamula akati, “Wee mwene wane, awe intakolizwe. Ane nkutamiwa nkani mumoyo wane, sona namulililagha u Mwene nu moyo wane ghosi.

¹⁶ Utakampimaye ne wambombo wako pakuba ne mukolo umubibi. Namulililagha u Mwene pachifukwa icha ntamyo inkulu zizyo indi nazyo.”

¹⁷ U Eli akamula akati, “Wende akiza, sona u Chala uwa Izilayeli akupe vyosi vivyo wamulaba.”

¹⁸ U Hana akamula akati, “Umpelelaye ichisa ne wambombo wako.” U Hana akabuka nukulya ichakulya chimo, po icheni chache chitakasulumannya sona.

Ukupapiwa ukwa Samuweli nukupaghuliliwa kwache

¹⁹ Indabi yache pandabindabi nkani, u Elikana na bamunyumba yache bakalamusya pandabindabi pakumwiputa u Mwene, nukubwela ku Lama. U Elikana akamumanya umuchi wache u Hana, po u Mwene akamukumbuka u Hana.

²⁰ Pisinda pache u Hana akamela ulwanda nukupapa umwana umulumendo yuyo akamwita ukuti we Samuweli kokuti, “Nkamulaba kwa Mwene.”

²¹ Bo u Elikana poka na bamunyumba yache babuka pakubika ichakwiyipa icha mwaka nu mwaka kwa Mwene pakukwanilisya ichilapo chache,

²² u Hana atakabukako. Akamubuzya umulume wache akati, “Bo umwana uyu aleka pakonka nkwiza pakumupaghulila kwa Mwene, po akwiza pakwikalagha kulakula ubumi bwache bosi.”

²³ Umulume wache akamubuzya akati, “Bomba chosi chicho chingakuhobosya. Lindilila tasi mupaka umulesye umwana wako pakonka. U Mwene abombaye bulo vivyo anena.” Bunubu umukolo yula akanyoka ukuti amulele umwana wache yula mupaka papo akamulesya pakonka.

²⁴ Bo amulesya umwana yula pakonka, akasenda inkambaku iya maka matatu nu busu ubwakukwana amakilogalamu 10, sona nu vinyo munyambi iya ikwela. Po akabuka nawe umwana yula ku Nyumba iya Mwene mu Shilo.

²⁵ Bakaghogha inkambaku yila, nukwiza nawe umwana yula kwa Eli,

²⁶ sona u Hana akamubuzya u Eli akati, “Wee mwene wane, naloli ane ne mukolo yuyo nkimilila pamaso papako nukwiputa kwa Mwene.

²⁷ Umwana yunuyu nkamulaba kwa Mwene, po u Mwene ampiye chicho nkamulaba.

²⁸ Ichi cho chifukwa niza nawe pamaso pa Mwene. Pakuti umwana uyu akwiza pakuba wa Mwene mubumi bwache bosi.” Po u Eli akamwiputa u Mwene kulakula.