1 Pitala 5 - IBAYIBOLO 2024

Umudimo uwa ng'ozi izya Chala

¹ Ane ne songo uwa chipanga, sona nu kaboni uwa mayimba agha Kilisitu, ne nkulindilila pakupokela nabo ubuchindamu bubo bukwiza pakuvumbuliwa. Nkubalaba abasongo aba chipanga babo bali pakasi papinyu

² ukuti: Mudimaye umudimo uwa ng'ozi zizyo u Chala akubapa. Mughusungilile umwakusita kufyengiwa, ukuyana namumo u Chala akulondela ukuti mubombelaye. Mutakabombaye imbombo yinyu nu moyo uwakunyonywa indalama, loli mubombaye nu moyo uwakunyonywa pakubomba.

³ Mutakabanje ngati mwe bamwene abakwitutumula pabantu babo mubaghiye pakubalongozya, loli mubanje chifwanikizyo ichiza icha ng'ozi.

⁴ Sona bo Umudimi usongo aboneka, mukwiza pakupokela impumpu iya buchindamu, yiyo yitakuchujapo nalumo.

⁵ Umwakuyana bulo, namwe mwe balumendo, mubivwilaye abantu abasongo. Mwebosi mubanje nu moyo uwakwiyisya bo mukubombelana mwebenebene pakuti Amasimbo ghakuti, “U chala akubasusya abantu abamituvyo, loli akubalanjizya ichisa abantu abakwiyisya.”

⁶ Mwiyisyanje mwebene pamaso pa Chala uwamaka, umwakuti abakwezye pakabalilo kache akiza.

⁷ Mumutulile ukupasya kwinyu kosi, pakuti akubapasikizya amwe.

⁸ Mubanje maso, sona mwenelezye nkani! Umulwani winyu, u Satana, akuzyungulilazyungulila bo akubuluma ngati yo nkalamu, ukulonda yumo uwakuti amulye.

⁹ Mwimaye nkani mulwitiko lwinyu nukulwa nawe, pachifukwa ichakuti muzimenye ukuti abakilisitu abamwinyu muchisu chosi ichapasi bakukomana na mayimba ghanagha.

¹⁰ Loli bo mwayimbapo panandi, u Chala uwachisa, yuyo akubitizya pakugabana ubuchindamu ubwa bwila na bwila poka nu Kilisitu, akwiza pakubapyanizikizya papo, nukubavwa nukubakazya, sona nukubikazya palwalo ulukafu.

¹¹ Kukwache kubanje amaka bwila na bwila! Ameni.

Ukulamuka ukwabumalilo

¹² Ukalata umupimpa uyu namusimbisya u Silivana, yuyo nkumwinong'ona pakuba mukilisitu uwamwitu umusubiliwa. Nkulonda pakubakazya nukusimikizya ukuti ichi cho chisa ichanaloli icha Chala. Mwimaye nkani!

¹³ Abakamu binyu aba muchipanga icha mu Babiloni, bakubalamuka, sona wepe nu Maliko umwana wane akubalamuka.

¹⁴ Mulamunkanaye mwebenebene nu lughano ulwenecho. Umutende ghubanje namwe mwebosi amwe mwe muli mwa Kilisitu.