1 Pitala 4 - IBAYIBOLO 2024

Nizya bumi ubupya

¹ Pakuti u Kilisitu akayimba mumubili wache, namwe bulo mubaghiye mwiyannyanje mwebene ni nyinong'ono zizyo akaba nazyo, pachifukwa ichakuti umuntu wesi yuyo akuyimba mu mubili, kokuti alekana ni mbibi.

² Polelo ukwanda akabalilo aka, ubumi bwinyu ubwa muchisu ichapasi bubaghiye bulongoziwanje nu bwighane ubwa Chala, mubuzilo ubwa kulongoziwa ni vinyonywa ivya buntu.

³ Pakuti kale mukatagha akabalilo kinyu pakubomba ivintu vivyo abantu abakuzi bakabombagha. Amwe mukabombagha ubwamalaya, ni vinyonywa nu bwaching'wela nu bupafu, sona nukwiputa ivifwani.

⁴ Polelo abantu abakuzi bakuswigha bulo, bo bakwennya ukuti mutakuba poka nabo mumbombo imbibi zizyo bakubomba. Ichi cho chifukwa bakubasamula.

⁵ Loli abene bakwiza pakulingannya inongwa yabo pamaso pa Chala, yuyo iyanizye pakulonga abantu abumi na bantu abafwe.

⁶ Ichi cho chifukwa Amazyu Amiza ghakalumbililiwa pakasi pabantu babo ilelo bafuye, abantu babo bakalongiwa ku mubili ukuyana namumo abantu bosi bakulongeleliwa, umwakuti babanje nubumi mumuzimu ukuyana namumo u Chala abeleye.

⁷ Ubumalilo ubwa vintu vyosi buli papipi. Polelo mubanje bantu abakwilema, sona mubanje maso, umwakuti mungiputa.

⁸ Pamwanya pa vyosi mughananaye mwebene nu lughano ulwakufikapo, pakuti ulughano lukuzikupikila imbibi inyinji nkani.

⁹ Mubapokelaye akiza abayeni munyumba zyinyu umwakusita ukwilumbusya.

¹⁰ Umuntu wesi abombezye ichabupi chicho apokelite, umwakuti chibavwanje abantu abanji. Mubanje bakapitawa abiza pakabombezekezye akiza aka vyabupi ivyakulekanalekana vivyo mwapokela kwa Chala.

¹¹ Umuntu wesi yuyo akulumbilila, alumbililaye amazyu agha Chala. Umuntu wesi yuyo akubabombela abanji, abombaye na maka ghagho u Chala akamupa, umwakuti u Chala apaliwanje muvintu vyosi, ukwendela mwa Yesu Kilisitu. Ubuchindamu na maka vibanje kwa Chala bwila na bwila. Ameni.

Ukuyimba pachifukwa ichakuba mukilisitu

¹² Mwee bamanyani bane abaghaniwa, mutakaswighaye ni njelo impalapala zizyo mukukomana nazyo ngati po chintu chimo ichiyeni chabawila.

¹³ Loli musekelaye pachifukwa ichakuti mukugabana poka nu Kilisitu mumayimba ghache, umwakuti muhobokaye nkani, bo ubuchindamu bwache bwavumbuliwa.

¹⁴ Mwe basayiwa nanti abantu bakubasamula pachifukwa ichakuti mwe bakonki aba Kilisitu. Ichi chikung'anamula ukuti u Muzimu uwa buchindamu, yuyo we Muzimu uwa Chala ali papinyu.

¹⁵ Nanti umuntu yumo akuyimba, chitakabe chifukwa ichakuti mughoghi, pamo mwiba, pamo wanongwanongwa pamo uwakwinjilila pazya bantu abanji.

¹⁶ Loli nanti umuntu akuyimba pachifukwa ichakuti mukilisitu, atakabanje ni soni, loli amupalizyanje u Chala pachifukwa ichakuti akwitiziwa ni tabwa ilya Kilisitu.

¹⁷ Pakuti akabalilo kakwana akakuti u Chala ande pakulonga abantu bache. Nanti ubulongi bukwiza pakwandila naswe, nkimba kukwiza pakuba bulibuli na bantu babo batakusubila Amazyu Amiza agha Chala?

¹⁸ Pakuti Amasimbo ghakuti, “Nanti chipala nu mugholosu pakupona, po nkimba kukwiza pakuba bulibuli na bantu abambibi, babo batakumusubila u Chala?”

¹⁹ Polelo abantu babo bakuyimba pachifukwa icha bwighane ubwa Chala, biyipe bene kwa Mupeli wabo, yuyo akusungilila ilayizyo lyache, sona bendelele pakubomba ubwiza.