1 Imbili 9 - IBAYIBOLO 2024

Abantu babwelako kubuzya

¹ Aba Izilayeli bosi bakasimbiwa mwibuku ilya Mbili iya bamwene aba ba Izilayeli ukuyana na kapapiliwe kabo. Abantu aba mu Yuda bakalemiwa pakuba bazya muchisu icha Babiloni, pachifukwa ichakuti batakaba basubiliwa.

² Abantu babo bakaba bakwanda pakwikalana muvyisu vyabo, na mutwaya twabo bakaba ba Izilayeli bamo, na baputi naba Levi sona na babombi aba mu Nyumba iya Chala.

³ Abantu aba muluko ulwa Yuda naba muluko ulwa Benjamini naba muluko ulwa Efulayimu sona naba muluko ulwa Manase babo bakikalagha mu Yelusalemu bakaba bo aba:

⁴ U Utayi umwana uwa Amihudi, umwana uwa Omuli, umwana uwa Imuli, umwana uwa Bani, uwaluko ulwa Pelezi, umwana uwa Yuda.

⁵ Aba Shela bakaba bo aba: U Asaya umwana ukatote poka na bana bache.

⁶ Aba Zela bakaba bo aba: U Yeweli poka na bakamu bache. Abantu bosi poka bakabapo 690.

⁷ Aba Benjamini bakaba bo aba: U Salu umwana uwa Meshulamu, umwana uwa Hodaviya, umwana uwa Hasenuwa.

⁸ U Ibineya umwana uwa Yelohamu nu Ela umwana uwa Uzi, umwana uwa Mikili sona nu Meshulamu umwana uwa Shefatiya, umwana uwa Leweli umwana uwa Ibineya.

⁹ Aba Benjamini bosi ukuyana na kapapiliwe kabo bakabapo 956. Abantu bosi banaba bakaba balongozi abanyumba zyabo.

Abaputi aba mu Yelusalemu

¹⁰ Abaputi babo bakikalagha mu Yelusalemu bo aba: U Yedaya nu Yehoyalibu nu Yakini

¹¹ nu Azaliya umwana uwa Hilikiya nu mwana uwa Meshulamu, umwana uwa Zadoki nu mwana uwa Melayoti nu mwana uwa Ahitubi sona nu mulaghili uwamu Nyumba iya Chala.

¹² Pakabapo sona u Adaya umwana uwa Yelohamu, umwana uwa Pashuli, umwana uwa Malikiya nu Mashayi umwana uwa Adiyeli, umwana uwa Yazela, umwana uwa Meshulamu sona nu mwana uwa Meshilemiti, umwana uwa Imeli.

¹³ Abaputi banaba bakaba balongozi abanyumba zyabo sona bosi poka bakabapo 1,760. Abantu banaba bakamanya nkani pakubomba imbombo mu Nyumba iya Chala.

¹⁴ Abaluko ulwa Levi bakaba bo aba: U Shemaya umwana uwa Hashubi, umwana uwa Azilikamu, umwana uwa Hashabiya uwaluko ulwa Melali.

¹⁵ Pakabapo sona u Bakibakali nu Heleshi nu Galali nu Mataniya umwana uwa Mika, umwana uwa Zikili, umwana uwa Asafu

¹⁶ nu Obadiya umwana uwa Shemaya, umwana uwa Galali, umwana uwa Yedutuni, umwana uwa Belekiya, umwana uwa Asa, umwana uwa Elikana, yuyo akikalagha mukaya aka Netofa.

Abalindilili aba Nyumba iya Chala mu Yelusalemu

¹⁷ Abalindilili aba pamilyango iya Nyumba iya Chala, babo bakikalagha mu Yelusalemu bakaba bo aba: U Shalumu nu Akubi nu Talimoni nu Ahimani poka na bakamu bache, Shalumu akaba we usongo wabo.

¹⁸ Banaba bakaba balindilili aba pamulyango uwa nyumba iya mwene kubufumilo bwizuba mupaka nilelo bulo. Abantu banaba bakalindililagha pamilyango iya visakasa ivya ba Levi.

¹⁹ U Shalumu umwana uwa Kole, umwana uwa Ebiyasafu, umwana uwa Kola na bamwabo abamunyumba yache, bakalindililagha pamulyango uwa chisakasa icha Mwene, ukuyana namumo abanyenya babo bakalindililagha pamulyango uwa Inyumba iya Mwene.

²⁰ Pakabalilo kamo u Finehasi umwana uwa Eleyazala akaba mulaghili wabo, po u Mwene akaba nawe.

²¹ U Zekaliya umwana uwa Meshelemiya akaba weyumo uwa balindilili pamulyango uwa Chisakasa icha Mwene.

²² Abantu bosi poka babo bakasaliwa pakuba balindilili pamilyango bakabapo 212. Bakasimbiwa mutwaya twabo ukuyana na kapapiliwe kabo. Abalindilili banaba bakasaliwa nu mwene u Devedi sona nu mwenelezyi u Samuweli, pachifukwa icha busubiliwa bwabo.

²³ Abantu banaba poka na baluko lwabo bakalindililagha pamilyango iya Nyumba iya Mwene, yiyo yikitiziwanga ukuti Chisakasa.

²⁴ Abalindilili bala bakabako kumbazu zyosi folo kumitu na kuntende na kubufumilo bwizuba sona na kubwinjililo bwizuba.

²⁵ Abakamu babo aba mutwaya twabo bakiza pakwikala nabo akabalilo na kabalilo nukubomba poka nabo ukwa masiku seveni.

²⁶ Loli abalindilili abasongo nkani folo aba pamilyango, babo bakaba ba Levi bakapeghiwa imbombo iyakwenelezya ivipinda vyosi sona ni chuma chosi icha mu Nyumba iya Chala.

²⁷ Pabusiku bakikala mubuzilo bwabo ukuzyungulila Inyumba iya Chala yila, pachifukwa ichakuti imbombo yabo yikaba yakulindilila inyumba yila sona bakaba bo babo bakighulagha imilyango pandabindabi posi.

Aba Levi abanji

²⁸ Aba Levi abanji bakaba ni mbombo iyakwenelezya ivibombelo vivyo vikabombeziwanga pa chiputo mu Nyumba iya Chala. Bakavibelenga bo bakwinjila navyo sona bo bakuvifumya bulo.

²⁹ Abanji bakapeghiwa imbombo iyakwenelezya ivibombelo ivinji vyosi ivipaghuliwa nu busu nu vinyo na mafuta agha misyunguti nu twakufukizya utwakununkila sona nu twakunonezya ivyakulya.

³⁰ Loli abaputi abanji bakaba ni mbombo iyakongannya utwakunonezya ivyakulya.

³¹ U Matitiya weka uwa ba Levi, umwana ukatote uwa Shalumu uwaluko ulwa Kola akaba ni mbombo iyakwenelezya akapiyile aka vibama ivya chakwiyipa.

³² Loli abakamu babo abanji abaluko ulwa Kohati bakaba ni mbombo iyakuyannya ivibama pitebulo Pisiku Ilyakutuzya.

³³ Aba Levi bamo, abalongozi abanyumba zyabo babo bakaba ni mbombo iyakwenelezya ubwimbi, bakikalagha muvipinda ivya mu Nyumba iya Chala sona batakabombagha imbombo izinji, pachifukwa ichakuti bakabomba imbombo pamusanya na pabusiku.

³⁴ Bosi banaba bakaba balongozi abanyumba izya ba Levi, babo basimbiwe ukuyana na kapapiliwe kabo, sona bakikalagha mu Yelusalemu.

Abaluko ulwa mwene u Sabuli

³⁵ U Yeyili uwise uwa Gibeyoni akikalagha mu Gibeyoni. Umuchi wache akaba we Maaka.

³⁶ Umwana wache ukatote akaba we Abidoni, po pakakonkapo u Zuli nu Kishi nu Baala nu Neli nu Nadabu

³⁷ nu Gedoli nu Ahiyo nu Zekaliya sona nu Mikiloti.

³⁸ U Mikiloti akapapa u Shimeyamu. Bope bakikalagha papipi na bakamu babo mu Yelusalemu.

³⁹ U Neli akapapa u Kishi. U Sabuli akapapa u Yonatani nu Malikishuwa nu Abinadabu sona nu Eshibali.

⁴⁰ U Yonatani akapapa u Melibali. U Melibali akapapa u Mika.

⁴¹ U Mika akapapa: U Pitoni nu Meleki nu Taleya sona nu Ahazi.

⁴² U Ahazi akapapa u Yada, u Yada akapapa u Alemeti nu Azimaveti sona nu Zimuli. U Zimuli akapapa u Moza.

⁴³ U Moza akapapa u Bineya, u Bineya akapapa u Lefaya, u Lefaya akapapa u Eleyasa, u Eleyasa akapapa u Azeli.

⁴⁴ U Azeli akapapa abana sikisi: U Azilikamu nu Bokelu nu Ishimayeli nu Sheyaliya nu Obadiya sona nu Hanani. Banaba bakaba bana aba Azeli.