1 Imbili 7 - IBAYIBOLO 2024

Abaluko ulwa Isakala

¹ U Isakala akapapa: U Tola nu Puwa nu Yashubu sona nu Shimiloni. Bosi poka bakabapo folo.

² U Tola akapapa: U Uzi nu Lefaya nu Yeliyeli nu Yahimayi nu Ibisamu sona nu Samuweli. Banaba bakaba balongozi abanyumba zyabo, abaluko ulwa Tola, babo bakamanya nkani pakulwa ubwite. Pakabalilo kako u Devedi akalaghilagha abaluko lwabo bosi poka bakabapo 22,600.

³ U Uzi akapapa: U Izilahiya. U Izilahiya akapapa: U Mikayeli nu Obadiya nu Yoweli sona nu Ishiya. Abana bosi fayivi banaba bakaba balongozi abanyumba zyabo.

⁴ Ukuyana na kapapiliwe aka baluko lwabo sona ni nyumba zyabo, abantu bakabapo 36,000, babo bakamanya nkani pakulwa ubwite, pachifukwa ichakuti bakasenda abakolo abinji sona bakaba na bana abinji.

⁵ Abakamu bosi babo bakamanya nkani pakulwa ubwite bakaba baluko ulwa Isakala ukuyana na kapapiliwe aka baluko lwabo. Po bosi poka bakabapo 87,000.

Abaluko ulwa Benjamini nu Dani

⁶ U Benjamini akapapa: U Bela nu Bekeli sona nu Yediyaweli.

⁷ U Bela akapapa: U Eziboni nu Uzi nu Uziyeli nu Yelimoti sona nu Ili. Bosi poka bakabapo fayivi sona bakaba balongozi abanyumba zyabo. Ukuyana na kapapiliwe aka baluko lwabo, abantu bakabapo 22,034, babo bakamanya nkani pakulwa ubwite.

⁸ U Bekeli akapapa: U Zimila nu Yowashi nu Eliyezeli nu Eliyonayi nu Omuli nu Yelemoti nu Abiya nu Anatoti sona nu Alemeti. Bosi banaba bakaba bana aba Bekeli.

⁹ Ukuyana na kapapiliwe aka baluko lwabo, bakabapo abantu 20,200 babo bakamanya nkani pakulwa ubwite.

¹⁰ U Yediyaweli akapapa: U Bilihani. U Bilihani akapapa: U Yewushi nu Benjamini nu Ehudi nu Kenana nu Zetani nu Talishishi sona nu Ahishahali.

¹¹ Banaba bakaba bana aba Yediyaweli sona bakaba balongozi abanyumba zyabo. Bosi poka bakabapo 17,200 babo bakamanya nkani pakulwa ubwite.

¹² Aba Shupimu naba Hupimu bakaba baluko ulwa Ili, sona aba Hushimu bakaba baluko ulwa Aheli.

Abaluko ulwa Nafutali

¹³ U Nafutali akapapa: Yaziyeli nu Guni nu Yezeli nu Shalumu. Banaba bakaba baluko ulwa Biliha.

Abaluko ulwa Manase

¹⁴ U Manase akaba nu muchi umuzya umu Alamu, po akapapa nawe u Aziliyeli nu Makili. U Makili akapapa u Giliyadi.

¹⁵ U Makili akasenda umukolo pakasi paba Hupimu naba Shupimu. Umuyemba wache akaba we Maaka. Uwaluko lwache ulunji akaba we Zelofehadi, yuyo akapapa abana abalindu bene.

¹⁶ U Maaka umuchi uwa Makili akapapa umwana umulumendo nukumwita ukuti we Peleshi. Uwamwabo akaba we Sheleshi, po u Sheleshi akapapa u Ulamu nu Lakemu.

¹⁷ U Ulamu akapapa: U Bedani. Bosi banaba bakaba baluko ulwa Giliyadi, umwana uwa Makili, yuyo akaba mwizukulu uwa Manase.

¹⁸ Umuyemba wache u Hamoleketi akaba na bana batatu u Ishihodi nu Abiyezeli sona nu Mahila.

¹⁹ U Shemida akapapa: Ahiyani nu Shekemu nu Liki sona nu Aniyamu.

Abaluko ulwa Efulayimu

²⁰ Abaluko ulwa Efulayimu bakaba bo aba: U Efulayimu akapapa: U Shutela. U Shutela akapapa: U Beledi. U Beledi akapapa: U Tahati. U Tahati akapapa: U Eliyada. U Eliyada akapapa: U Tahati.

²¹ U Tahati akapapa: U Zabadi. U Zabadi akapapa: U Shutela. U Ezeli nu Eleyadi bo babo bakaghoghiwa na benekaya aba mu Gati, pachifukwa ichakuti bakabibila ivitekwa vyabo.

²² Uwise u Efulayimu akabalila amasiku aminji nkani, po abakamu bache bakiza pakumusangalusya.

²³ U Efulayimu akamumanya umuchi wache, po akamela ulwanda nukupapa umwana umulumendo. Akamwita umwana yula ukuti we Beliya, pachifukwa icha ntamyo zizyo zikawa munyumba yache.

²⁴ Umwana wache umulindu akaba we Shela, yuyo akazenga kuntende na kumitu ukwa kaya akakulu aka Beti Holoni sona naka Uzeni Shela.

²⁵ U Efulayimu wepe akaba nu mwana umulumendo u Lefa. U Lefa akapapa: U Leshefi. U Leshefi akapapa: U Tela. U Tela akapapa: U Tahani. U Tahani akapapa: U Ladani.

²⁶ U Ladani akapapa: U Amihudi. U Amihudi akapapa: U Elishama.

²⁷ U Elishama akapapa: U Nuni. U Nuni akapapa: U Yoshwa.

²⁸ Pamwanya pachisu chabo chicho bakikalaghamo, pakonjeleziwapo akaya akakulu aka Beteli poka nutwaya twache utupalamani kumpaka iya Nalani kubufumilo bwizuba naka Gezeli kubwinjililo bwizuba naka Shekemu poka nutwaya twache utupalamani naka Aya poka nutwaya twache utupalamani.

²⁹ Abaluko ulwa Manase bakalaghilagha mukaya akakulu nkani aka Beti Shani naka Tanaki naka Megido naka Doli, poka nutwaya twabo utupalamani. Abaluko ulwa Yosefu, umwana uwa Izilayeli bakikalagha mutwaya utukulu nkani tunutu.

Abaluko ulwa Asheli

³⁰ Abana aba Asheli bakaba bo aba: U Imuna nu Ishiva nu Ishivi nu Beliya. Umuyemba wabo akaba we Sela.

³¹ U Beliya akapapa: U Hebeli nu Malikiyeli. U Malikiyeli akapapa: U Bilizayiti.

³² U Hebeli akapapa: U Yafuleti nu Shomeli nu Hotamu. Umuyemba wabo akaba we Shuwa.

³³ U Yafuleti akapapa: U Pasaki nu Bimahali sona nu Ashivati. Banaba bakaba bana aba Yufuleti.

³⁴ U Shomeli akapapa: U Ahi nu Lohiga nu Huba sona nu Alamu.

³⁵ Uwamwabo u Helemu akapapa: U Zofa nu Imina nu Sheleshi sona nu Amali.

³⁶ U Zofa akapapa: U Suwa nu Halinefeli nu Shuwala nu Beeli nu Imila

³⁷ nu Bezeli nu Hodi nu Shama nu Shilisha nu Itilani sona nu Beela.

³⁸ U Yeteli akapapa: U Yefune nu Pisipa sona nu Ala.

³⁹ U Ula akapapa: U Ala nu Haniyeli sona nu Liziya.

⁴⁰ Abantu bosi banaba bakaba baluko ulwa Asheli, sona bakaba balongozi abanyumba zyabo. Bakaba bantu bamanyikwe, sona bajivu nkani pakulwa ubwite, po bosi poka bakabapo 26,000 ukuyana na kapapiliwe kabo.