1 Imbili 5 - IBAYIBOLO 2024

Abaluko ulwa Lubeni

¹ Abana aba Lubeni umwana ukatote uwa Yakobo bakaba bo aba: Naloli u Lubeni akaba we katote, loli pachifukwa ichakuti akaghona nu muchi yumo uwa wise, ubwakatote bwache bukapeghiwa ku muzuna wache u Yosefu. Po atakabelengiwa sona pakuba we katote.

² Napapo uluko ulwa Yuda lukaba lwamaka nkani ukubachila bosi, sona nukuti pakasi papabo pakafuma umulongozi uwamaka nkani uwa inko zyosi, loli ubwakatote bukaba ubwa Yosefu.

³ Po abana ba Lubeni ukatote uwa Yakobo bo aba: U Hanoki nu Palu nu Heziloni sona nu Kalimi.

⁴ Abaluko ulwa Yoweli bakaba bo aba: U Shemaya nu Gogi nu Shimeyi

⁵ nu Mika nu Leyaya nu Baala

⁶ nu Beela. U Beela yunuyu weyuyo u mwene u Tigilati Pileseli uwamu Asiliya akamusenda pakuba muzya. U Beela akaba mulongozi uwa luko ulwa Lubeni.

⁷ Abakamu babo ukuyana na banyenya bakaba bo aba: U Yeyeli akaba we mulongozi nu Zekaliya

⁸ sona nu Bela umwana uwa Azazi, umwizukulu uwa Shema uwaluko ulwa Yoweli. Ichisu chabo chicho bakikalaghamo chikandila ku Aloyeli mupaka ku Nebo nukufika ku Baala Meyoni.

⁹ Abantu banaba bakaba ni vitekwa ivyinji nkani, umwakuti ichisu chabo chikandila kubufumilo bwizuba mulubazu ulwa nkolongo mupaka kulusoko ulwa Yufuleti nukufika ku Giliyadi.

¹⁰ Pakabalilo aka mwene u Sabuli, bakalwa ubwite naba Hagili nukubapota, po bakikala muvisakasa ivya ba Hagili muchigaba chosi icha kubufumilo bwizuba ubwa Giliyadi.

Abaluko ulwa Gadi

¹¹ Uluko ulwa Gadi lukapalamana nuluko ulwa Lubeni muchisu icha Bashani mupaka ku Saleka.

¹² Usongo wabo akaba we Yoweli sona Shafamu akaba wabulili. Pakabapo sona u Yanayi nu Shafati mu Bashani.

¹³ Abakamu babo ukuyana nuluko lwabo bakaba bo aba: U Mikayeli nu Meshulamu nu Sheba nu Yolayi nu Yakani nu Ziya sona nu Ebeli. Abantu bosi poka bakabapo seveni.

¹⁴ Banaba bakaba bana aba Abihayili, umwana uwa Huli, umwana uwa Yalowa, umwana uwa Giliyadi, umwana uwa Mikayeli, umwana uwa Yeshishayi, umwana uwa Yahido, umwana uwa Buzi.

¹⁵ U Ahi akapapa u Abidiya, u Abidiya akapapa u Guni, yuyo akaba mulongozi uwa luko lwache.

¹⁶ Aba Gadi bakikala muchisu icha Giliyadi nicha Bashani na mutwaya utupalamani sona na mumakombe ghosi agha mu Shaloni.

¹⁷ Abantu bosi banaba bakasimbiwa mulubatiko ulwa nkulilo yabo pakabalilo aka mwene u Yotamu uwamu Yuda, sona nu mwene u Yelobowamu uwamu Izilayeli.

Utubukatila utwa bwite utwa kubufumilo bwizuba

¹⁸ Aba Lubeni naba Gadi sona nu hafu uwa luko ulwa Manase bakaba na basilikali abajivu 44,760, babo bamenye pakulwa ubwite pakubombezya ingulu na bapanga babo bakwete kosi na kosi sona nubwele.

¹⁹ Abasilikali bala bakalwa ubwite naba Hagili naba Yetuli, naba Nafishi, sona naba Nodabu.

²⁰ U Chala akabavwa pakulwa ubwite naba Hagili, poka na balwani babo pachifukwa ichakuti bakamulaba ukuti abavwe. Po u Chala akabamula ulwiputo lwabo pakuti bakamusubila.

²¹ Ivintu vivyo bakabafyula aba Hagili vikaba vyo ivi: Ingamila 50,000 ni ng'ozi 250,000 ni impunda 2,000 sona na bazya 100,000.

²² Aba Hagili abinji bakaghoghiwa pabwite, pachifukwa ichakuti u Chala weyuyo akalwanga ubwite bulabula. Po bakikala muchisu chilachila mupaka pakabalilo kako bakabukila kuchisu icha buzya.

Uhafu uwa luko ulwa Manase

²³ Uhafu uwa luko ulwa Manase bakaba binji nkani, po bakikala muchisu icha Bashani mupaka ku Baala Helimoni kokuti ku Senili sona na kwighamba ilya Helimoni.

²⁴ Aba bakaba bo balongozi abanyumba zyabo: U Efeli nu Ishi nu Eliyeli nu Aziliyeli nu Yelemiya nu Hodaviya sona nu Yadiyeli. Abantu banaba bakaba basilikali abajivu na bamanyikwe sona bakaba balongozi abanyumba zyabo.

²⁵ Loli abantu banaba batakaba basubiliwa kwa Chala uwa banyenya babo sona bakamutoloka nukubachindika abachala aba inko izinji, zizyo u Chala akazinangannya pamaso papabo.

²⁶ Po u Chala uwa Izilayeli akaghuvundula umoyo uwa mwene u Pulu uwa Asiliya, kokuti we Tigilati Pileseli. Akabasenda aba Lubeni naba Gadi sona nu hafu uwa luko ulwa Manase nukubuka nabo pakuba bazya ku Hala naku Haboli naku Hala sona na kulusoko ulwa Gozani, kuko bakwikala mupaka nilelo bulo.