1 Imbili 4 - IBAYIBOLO 2024

Abaluko ulwa Yuda

¹ U Yuda akapapa u Pelezi nu Heziloni nu Kalimi nu Huli sona nu Shobali.

² U Leyaya umwana uwa Shobali akapapa u Yahati sona u Yahati akapapa u Ahumayi nu Lahadi. Banaba bakaba bo baluko ulwa Zola.

³ U Etamu akapapa u Yezileli nu Ishima nu Idibashi sona umuyemba wabo akaba we Hazeleliponi.

⁴ U Penuweli akapapa u Gedoli nu Ezeli, yuyo akapapa u Huli. Banaba bakaba baluko ulwa Huli umwana ukatote uwa Efulati, yuyo akapapa u Betelehemu.

⁵ U Ashuli akapapa u Tekowa sona akaba na bachi babili, u Hela nu Naala.

⁶ U Naala akamupapila u Ahuzamu nu Hefeli nu Temeni sona nu Hahashitali. Banaba bakaba baluko ulwa Naala.

⁷ U Hela akapapa u Zelati nu Izihali nu Etani

⁸ nu Kozi yuyo akapapa u Anubi nu Hazobeba na baluko ulwa Ahaliheli umwana uwa Halumi.

⁹ U Yabezi akaba muntu umuchindikiwa nkani ukubachila abawamwabo. Unyina akamwita ukuti we Yabezi, pachifukwa akati, “Nkivwa ububavu nkani bo nkusayiwa umwana yunuyu.”

¹⁰ U Yabezi akamulilila u Chala uwa Izilayeli akati, “Wee Chala, unsaye sona kuzya impaka izya chisu chane! Nalamba ubanje nane sona umpoke kuntamyo umwakuti indeke pakwivwa ububavu.” Po u Chala akamupa zizyo akalaba.

¹¹ U Kalebu uwamwabo uwa Shuhahi akapapa u Mehili, sona u Mehili akapapa u Eshitoni.

¹² U Eshitoni akapapa u Beti Lafa nu Paseya nu Tehina. U Tehina akapapa u Ili Nahashi. Banaba bakaba baluko ulwa Leka.

¹³ U Kenazi akapapa u Otiniyeli nu Selaya. U Otiniyeli akapapa u Hatiti nu Meyonotayi.

¹⁴ U Meyonotayi akapapa u Ofula. U Selaya akapapa u Yowabu, u Yowabu akapapa u Ge Halashimu. Akabita itabwa linili pachifukwa ichakuti abantu bache bakaba bafundi.

¹⁵ U Kalebu umwana uwa Yefune akapapa u Ilu nu Ela, sona nu Naama. U Ela akapapa u Kenazi.

¹⁶ U Yehaleleli akapapa u Zifi nu Zifi nu Tiliya sona nu Asaleli.

¹⁷ U Ezila akapapa u Yeteli nu Meledi nu Efeli sona nu Yaloni. Umuchi weka uwa Meledi akamupapila u Miliyamu nu Shamayi sona nu Ishiba, yuyo akapapa u Eshitemowa.

¹⁸ Umuchi wache uwaluko ulwa Yuda akamupapila u Yeledi, sona u Yeledi akapapa u Gedoli, u Gedoli akapapa u Hebeli, u Hebeli akapapa u Soko nu Yekutiyeli yuyo akapapa u Zanowa. Banaba bakaba bana aba Bitiya umwana umulindu uwa Falabo yuyo akaba muchi uwa Meledi.

¹⁹ Abana aba muchi uwa Hodiya, umuyemba uwa Nahamu bakaba bo aba: Uwise uwa Keyila umu Galimi sona nu Eshitemowa umu Maaka.

²⁰ U Shimoni akapapa u Amunoni nu Lina nu Beni Hanani sona nu Tiloni. Abaluko ulwa Ishi bakaba u Zoheti nu Beni Zoheti.

Abaluko ulwa Shela

²¹ U Shela umwana uwa Yuda akapapa u Eli, u Eli akapapa u Lada, u Lada akapapa u Malesha poka na baluko babo bakubomba imbombo iyakuluka amenda amatonte aba mu Beti Ashibeya.

²² Pakabapo sona u Yokimu uwamu Kozeba nu Yowashi sona nu Salafi, yuyo akalaghilagha muchisu icha Mowabu nicha Yashubi Lehemu. (Imbili yiniyi yakale nkani.)

²³ Abantu banaba bakaba bamatasonta, babo bakikalagha mu Netayimu na mu Gedela. Bakikalagha kulakula nukumubombela u mwene.

Abaluko ulwa Simiyoni

²⁴ U Simiyoni akapapa: U Nemuweli nu Yamini nu Yalibu nu Zela sona nu Shabuli.

²⁵ U Shabuli akapapa: U Shalumu. U Shalumu akapapa: U Mibisamu. U Mibisamu akapapa: U Mishima.

²⁶ U Mishima akapapa: U Hamuweli. U Hamuweli akapapa: U Zakuli. Zakuli akapapa: U Shimeyi.

²⁷ U Shimeyi akapapa abana abanavuli 16 sona na bana abalindu sikisi, loli abawamwabo batakaba na bana abinji. Po uluko ulwa Simiyoni lutakabala nkani ngati luko ulwa Yuda.

²⁸ Abaluko ulwa Simiyoni bakikalagha mu Belisheba na mu Molada na mu Hazali Shuwali

²⁹ na mu Biliha na mu Ezemu sona na mu Toladi

³⁰ na mu Betuweli na mu Holima na mu Zikilagi

³¹ na mu Beti Malikaboti na mu Hazali Susimu na mu Beti Bili sona na mu Shalayimu. Utu tukaba twaya twabo utukulu nkani mupaka pakabalilo kako u Devedi akaba we mwene.

³² Utwaya twabo utupalamani tukaba to utu: Akaya aka Etamu naka Ayini naka Limoni naka Tokeni sona naka Ashani. Utwaya tunutu tukabapo fayivi

³³ sona nutwaya utwakuzyungulila utwaya utukulu tunutu mupaka ku Balati. Tunutu tukaba twaya twabo sona bakasunga imbili iya luko lwabo.

³⁴ Abaluko ulunji ulwa Simiyoni bakaba bo aba: U Meshobabi nu Yamuleki nu Yosha umwana uwa Amaziya

³⁵ nu Yoweli nu Yehu nu mwana uwa Yoshibiya nu mwana uwa Selaya nu mwana uwa Asiyeli

³⁶ sona nu Eliyonayi nu Yakoba nu Yeshohaya nu Asaya nu Adiyeli nu Yesimiyeli nu Benaya

³⁷ nu Ziza umwana uwa Shifi nu mwana uwa Aloni nu mwana uwa Yedaya nu mwana uwa Shimuli nu mwana uwa Shemaya.

³⁸ Abantu babo batambuliwa pamwanya bo balongozi aba inko zyabo. Inko zyabo zikabala nkani

³⁹ umwakuti bakabuka pakulonda ubuzilo ubwakudimilako ing'ozi ni mbuzi zyabo kuzi ukwa kaya aka Gedoli kubufumilo bwizuba.

⁴⁰ Kulakula bakalyagha isote ilyinji nkani sona muchisu chila mutakabamo abantu abinji nkani sona chikaba chamutende ni chakutengana. Pakuti abantu babo bakikalagha mulamula pakwanda bakaba baluko ulwa Hamu.

⁴¹ Abantu babo batambuliwa pamwanya bakabapo ukwandila pakabalilo aka mwene u Hezekiya uwamu Yuda. Bakalwa ubwite na baluko ulwa Hamu mumo bakikala poka naba Mebuni, babo bakikala mulamula nukubanangannya bosi ngati mumo vibeleye nilelo bulo. Po bakikalana mubuzilo bwabo bula, pachifukwa ichakuti bukaba buzilo ubwakudimilako ing'ozi ni mbuzi zyabo.

⁴² Abantu bamo 500 abaluko ulwa Simiyoni bakabuka kwighamba ilya Seyili umwakulongoziwa naba Pelatiya naba Neyaliya naba Lefaya naba Uziyeli sona naba Ishi.

⁴³ Bakabaghogha aba Amaleki babo bakapona, po bakikala kulakula mupaka nilelo bulo.