1 Imbili 29 - IBAYIBOLO 2024

Ivyabupi ivyakuzengela Inyumba iya Chala

¹ U mwene u Devedi akachibuzya ichilundilo akati, “Umwana wane u Solomoni, yuyo u Mwene amusala pakuba we mwene uwa ba Izilayeli, mwana munandi, sona atavimenye ivyinji, po imbombo iyi nkulu nkani. Inyumba iyi te ya muntu awe, loli ya Mwene u Chala.

² Po nabika ivya ku Nyumba iya Chala ukuyana namumo nalondelagha ukuti bazengele Inyumba iya Chala. Alipo ugolide uwakukwana uwakupangila ivya golide nu siliva uwakupangila ivya siliva, umukuba uwakupangila ivya mukuba, ivyela ivyakupangila ivintu ivya vyela sona na makwi aghakupangila ivintu ivya makwi. Nabika sona amabwe amiza aghakulekanalekana agha onikisi nu tumabwe utwamutengo utwa malabuli.

³ Ukonjelezyapo pavintu vivyo nkavibika pa nyumba impaghuliwa iyi, indi nu golide nu siliva. Pachifukwa icha lweke lwane pa Nyumba iya Mwene wane, nkumupa u Chala ubukabi bwane.

⁴ Nabika amatani 100 agha golide umwiza nkani uwamu Ofili, sona na matani 240 agha siliva umwenecho. Vyosi vinivi vikwiza pakuba vyakusingulila ulubumba ulwa Nyumba.

⁵ Imbombo yosi yiniyi yibombiwanje, ugolide abanje wakupangila ivya golide sona usiliva abanje wakupangila ivya siliva. Nkimba alipo ufundi yumo yuyo akulonda pakwiyipa kwa Mwene?”

⁶ Po abalongozi abamunyumba zyabo bakabika ivintu vyabo vyosi mubwighane bwabo, ukuyana namumo bakabombela abalongozi aba inko na basongo aba basilikali 1,000 na basilikali 100 sona na makambala agha chisu ghope ghakiyipa mubwighane bwabo.

⁷ Ivintu vivyo bakabika pambombo vikaba vyo ivi: Amakilogalamu 170 agha golide na makilogalamu 340 agha siliva na makilogalamu 620 agha mukuba sona na makilogalamu 3,400 agha vyela.

⁸ Umuntu wesi yuyo akaba nu tumabwe utwamutengo tuto akasangula kunyumba yakusungilamo ichuma icha Mwene. Ivintu vinivi vikasungiwa nu Yehiyeli umu Gelishoni.

⁹ Po abantu bosi bakahoboka nkani pachifukwa ichakuti abalongozi babo bakabika kwa Mwene umwakwiyipa na moyo ghosi. Wepe u mwene u Devedi akahoboka nkani.

Ulwiputo ulwa Devedi

¹⁰ U Devedi akamupalizya u Mwene pantazi pa chilundilo chosi akati, “Wee Mwene u Chala witu uwa Izilayeli, upaliwanje bwila na bwila.

¹¹ Awe we Mwene we mukulu nkani, sona we wamaka nu wabuchindamu sona we mupoti. Pakuti ivintu vyosi ivya kumwanya ni vya pachisu ichapasi vyosi vyako. Wee Mwene, wemwenecho uwa vintu vyosi ivya pachisu ichapasi.

¹² Ubukabi nu muchizi vyako, sona we mulaghili uwa vintu vyosi. Awe mwenecho uwa maka, ukumukwezya umuntu nukuvipa amaka ivintu vyosi.

¹³ Wee Chala witu, tukukupalizya, tukulichindika itabwa lyako ichindamu.

¹⁴ “Loli ane ne wenu, sona abantu bane bo bawenu, ukuti tukupanje na moyo ghitu ghosi bunubu? Ivintu vyosi vyako, sona ivintu vivyo tukukupa vyako.

¹⁵ Wee Mwene uzimenye ukuti aswe twe bayeni bulo pachisu ichapasi ngati banyenya bitu. Amasiku ghitu pachisu ichapasi ghali ngati chizyezye chicho chikuzyebeluka bulo.

¹⁶ Wee Mwene Chala witu, ni vibombelo bulo vivyo twabika ukuti tuzengele Inyumba yakulichindikilamo itabwa lyako izelu vikufuma kukwako, sona vyako.

¹⁷ Wee Chala wane, inzimenye ukuti ukwennya mumoyo uwa muntu sona ukuhoboka na bantu aba bwanaloli. Niyipa nukubika nu moyo ghosi sona na mubwanaloli, sona nabennya abantu namumo biyipila na moyo ghabo ghosi sona nu mwakuhoboka nkani.

¹⁸ Wee Mwene, u Chala uwa munyenya witu u Abulahamu nu Yisaki nu Izilayeli uvibike mumoyo bwila na bwila ivintu vivyo abantu bako bakulonda pakuvibomba sona babanje wakukusubila.

¹⁹ Umupanje umwana wane u Solomoni umoyo uwakufikapo, umwakuti azikonkaye indaghilo na malamulo ukuti azenge inyumba yiyo nayannya pakukuzengela.”

²⁰ Po u Devedi akachibuzya ichilundilo chosi chila akati, “Apaliwanje u Mwene u Chala winyu.” Po abantu bosi bakamupala u Mwene u Chala uwa banyenya babo. Bakamuchindika u Mwene pakumufughamilila.

U Solomoni imikiwa pakuba we mwene

²¹ Indabi yache bakabika ivyakwiyipa kwa Mwene nukubika ivyakwiyipa ivyakocha inkambaku 1,000 na badubi 1,000 sona na bana abang'ozi 1,000 poka ni chakwiyipa icha vinyo sona ni vyakwiyipa ivinji ukuti vibanje vya Izilayeli.

²² Pisiku lilalila akalya nukung'wela nu lusekelo ulukulu nkani pamaso pa Mwene. Po bakamupakazya amafuta u Solomoni umwana uwa Devedi pakuba mulaghili akabubili sona bakamupakazya u Zadoki pakuba muputi.

²³ U Solomoni akikala pachitengo icha Mwene pakuba we mwene munyumba iya bumwene iya wise u Devedi. Ivintu vyosi vikamwendelagha akiza, sona aba Izilayeli bosi bakamwivwilagha.

²⁴ Abasongo bosi aba basilikali, sona na bantu aba bana bosi aba Devedi bakamulambila u Solomoni.

²⁵ U Mwene akamukwezya nkani u Solomoni pakasi paba Izilayeli bosi akamupa ubukulu bubo atalipo nayumoyumo u mwene apokelitepo muchisu icha Izilayeli.

Ubufwe ubwa Devedi

²⁶ Umu momumo u Devedi umwana uwa Yese akalaghilila ichisu chosi icha Izilayeli.

²⁷ Akalaghila muchisu icha Izilayeli amaka 40. Akalaghila sona amaka 7 muchisu icha Hebuloni, po akalaghila sona mu Yelusalemu amaka 33.

²⁸ Akafwa bo aghosipa nkani, sona bo mukabi nu muntu umuchindikiwa. Po umwana wache u Solomoni akamupyana pakuba we mwene.

²⁹ Imbombo zyosi izya mwene u Devedi ukwandila pakwanda mupaka pabumalilo zisimbiwe mwibuku ilya mwenelezyi u Samuweli, ni ilya mulaghuzi u Natani, sona ni ilya mulaghuzi u Gadi.

³⁰ Bakasimbamo nizya bulaghili bwache, sona ni vintu vivyo vikababonekelagha aba Izilayeli sona ni inko izinji.