1 Imbili 28 - IBAYIBOLO 2024

U Devedi akubabuzya abantu akazengele aka Inyumba iya Chala

¹ U Devedi akaghitizya amakambala ghosi agha ba Izilayeli ukuti babungane poka mu Yelusalemu, kokuti amakambala agha inko, na basongo aba tubukatila utwa basilikali, tuto tukamubombelagha u mwene. Akabitizya sona abasongo aba basilikali aba tubukatila utwa basilikali 1,000 nu twa basilikali 100 na makambala aghakwenelezya ukatundu ni vitekwa ivya mwene na bana bache poka na makambala agha kunyumba iya bumwene na bantu abamaka sona na basilikali bosi abajivu.

² U Devedi akimilila nukubabuzya ukuti, “Mwee bakamu bane mwee bantu bane ivwa kuno! Nalondagha pakuzenga inyumba umwakuti Ibokosi ilya Lufingo ilya Mwene likalayemo pakuba chitengo ichakutambalizizyapo inyayo izya Chala sona injanizye kale ivyakuzengela inyumba yilayila.

³ Loli u Chala akati, ‘Utanganzengela inyumba iya kuti inchindikiliwanjemo, pachifukwa ichakuti we musilikali sona wakupula ibanda.’

⁴ “Pope bulo akaba we Mwene u Chala uwa Izilayeli yuyo akansala pakasi pa bamunyumba iya tata ukuti imbanje ne mwene uwa ba Izilayeli bwila na bwila. Akamusala u Yuda ukuti abanje mulongozi sona pakasi pabaluko lwane, akabasala abamunyumba yane sona pakasi pa munyumba iya tata wane, u Mwene akahoboka nabo pakunyimika pakuba ne mwene uwa ba Izilayeli.

⁵ Sona pakasi pa bana bosi babo u Mwene ampiye, akamusala u Solomoni ukuti ikale pachitengo icha bumwene ubwa Mwene ukuti amulaghilaye u Izilayeli.

⁶ Akambuzya akati, ‘Umwana wako u Solomoni akwiza pakunzengela inyumba nu lubinjilo, pakuti yunuyu namusala pakuba mwana wane, po ane nkwiza pakuba ne wise.

⁷ Nkwiza pakubwikazya ubumwene bwache bwila na bwila, nanti akughakonka amalamulo ni ndaghilo zyane, ukuyana namumo zikubombeliwa pakabalilo aka.’

⁸ “Polelo nkubalamula pamaso paba Izilayeli bosi, na pamaso pa chilundilo chosi icha Mwene, sona na pamaso pa Chala witu ukuti: Mwenelezye ukuti mukughakonka amalamulo agha Mwene u Chala winyu, umwakuti ichisu ichiza ichi chibanje chinyu, nukubalekela abaluko lwinyu ukuti chibanje mpyana yabo bwila na bwila.

⁹ “Wee mwana wane Solomoni, umwivwilaye nukumubombela u Chala uwa ghuso nu moyo wako ghosi pakuti u Mwene azimenye inyinong'ono izya muntu na kabombele kache. Nanti ukumulondelezya, ukwiza pakumwagha, loli nanti ukumusula, wepe akwiza pakukukana bwila na bwila.

¹⁰ Uzimanye ukuti u Mwene akusala ukuti umuzengele Inyumba iya Chala ukuti yibanje buzilo ubuzelu. Ujimbaye nkani, po uyibombaye imbombo iyi.”

¹¹ Po u Devedi akamupa umwana wache u Solomoni ulubatiko ulwa kazengele aka Nyumba iya Chala. Ulubatiko lula lukalanjizya intanda ni ivipinda ivyakusungilamo ivintu ni vipinda ivya mumwanya ni vipinda ivya mukasi sona nu buzilo ubwakupepesezyapo imbibi.

¹² Akamupa sona u Solomoni ukuyana namumo akinong'onelagha nizya balaza, ni vipinda vyosi ivyakusungilamo ivintu ivya mu Nyumba iya Chala sona ni chipinda ichakusungilamo ivyabupi ivipaghuliwa.

¹³ Akamupa sona indaghilo izyakabombele aka mbombo aka tubukatila utwa baputi naba Levi, na kabombele aka mbombo zyosi mu Nyumba iya Mwene, sona na kabombezezye aka vibombelo vyosi ivya pachiputo.

¹⁴ Akamulanjizya sona ubung'wamu bosi ubwa vibombelo ivya golide ni vya siliva vivyo vikabombeziwanga pa vyiputo ivyakulekanalekana, kokuti

¹⁵ ubung'wamu ubwa golide ubwa vyakubikapo inyale izya golide ni nyale zyache nu bung'wamu ubwa vyakubikapo nyale ni nyale zyache nu bung'wamu ubwa siliva ubwa vyakubikapo inyale ivya siliva ni nyale zyache ukuyana ni mbombo izya vyakubikapo inyale.

¹⁶ Akamulanjizya sona ubung'wamu ubwa golide ubwa tebulo ilyakubikapo ivibama ivipaghuliwa nu bung'wamu ubwa siliva ubwa matebulo aghanji.

¹⁷ Akamulanjizya sona ubung'wamu ubwa golide umwenecho uwa mafoloko na mabeseni aghakunyafilila sona ni sonta, ubung'wamu ubwa beseni ilya golide lililyosi sona ni beseni ilya siliva lililyosi

¹⁸ nu golide umwenecho uwakuzengela ichighemo ichakufukizyapo utwakununkila. Akamulanjizya sona akapangile aka ngolo izya bwite kokuti abakelubi aba golide, babo bakavwinka Ibokosi ilya Lufingo ulwa Mwene ni vipapande vyabo.

¹⁹ U mwene u Devedi akati, “Ivintu vyosi vinivi vivyo na visimba vyo vivyo u Mwene akampa ukuti nkwanilisye ukuyana nu lubatiko lulo akampa.”

²⁰ U Devedi akamubuzya sona u Solomoni akati, “Ujimbaye sona ubanje wamaka, uyibombaye imbombo yiniyi. Utakanyilaye pamo ukuwa amaka, pakuti u Mwene u Chala, ali nawe. Atakwiza pakupotwa pamo pakukuleka nalumo mupaka imbombo yosi iyakuzenga Inyumba iya Mwene yimale.

²¹ Utubukatila utwa baputi naba Levi twiyanizye pakuyibomba imbombo yiniyi. Po awe ukwiza pakuba na bantu na bafundi abakwiyipa pakubomba imbombo. Amakambala na bantu bosi bakwiza pakwivwila zizyo ukwiza pakubalamula.”