1 Imbili 24 - IBAYIBOLO 2024

Imbombo iya baputi

¹ Utubukatila utwa baluko ulwa Aloni to utu: Abana aba Aloni bakaba bo aba: U Nadabu nu Abihu nu Eleyazala nu Itamali.

² U Nadabu nu Abihu bakafwa bo uwise achili mumi, sona batakaba na bana. Po u Eleyazala nu Itamali bakaba baputi.

³ Nu bwavwilizi ubwa Zadoki uwaluko ulwa Eleyazala nu Ahimeleki uwaluko ulwa Itamali, u Devedi akabagaba mutubukatila utwakuyana ni mbombo yabo.

⁴ Abaluko ulwa Eleyazala bakagabiwa mutubukatila 16, sona abaluko ulwa Itamali bakagabiwa mutubukatila eyiti. Ichi chikabombiwa bunubu pachifukwa ichakuti abalongozi abanavuli abamunyumba izya baluko ulwa Eleyazala bakabapo binji.

⁵ Imbombo yosi yikagabiwa pakasi pa tubukatila pakupanga amayele, pakuti pakabapo amakambala agha Mubuzilo Ubuzelu na makambala agha mu Nyumba iya Chala pakasi pa baluko ulwa Eleyazala na baluko ulwa Itamali.

⁶ Umu Levi u Shemaya umwana uwa Netaneli akaba musimbi, yuyo akasimba amatabwa pamaso pa mwene napa makambala. Po umuputi u Zadoki nu Ahimeleki umwana uwa Abiyatala na balongozi abanyumba izya baputi nizya ba Levi. Abamunyumba yoka bakasaliwa ukufuma mwa Eleyazala sona abanji bakasaliwa ukufuma mwa Itamali.

⁷ Po amayele aghakwanda ghakamuwila u Yehoyalibu, aghabubili ghakamuwila u Yedaya,

⁸ aghabutatu ghakamuwila u Halimu, aghafolo ghakamuwila u Sewolimu,

⁹ aghafayivi ghakamuwila Malikiya, aghasikisi ghakamuwila u Miyamini,

¹⁰ aghaseveni ghakamuwila u Hakozi, aghaeyiti ghakamuwila u Abiya,

¹¹ aghanayini ghakamuwila u Yeshuwa, agha 10 ghakamuwila u Shekaniya

¹² agha 11 ghakamuwila u Eliyashibu, agha 12 ghakamuwila u Yakimu,

¹³ agha 13 ghakamuwila u Hupa, agha 14 ghakamuwila u Yeshebeyabu,

¹⁴ agha 15 ghakamuwila u Biliga, agha 16 ghakamuwila u Imeli,

¹⁵ agha 17 ghakamuwila u Hezili, agha 18 ghakamuwila u Hapizezi,

¹⁶ agha 19 ghakamuwila u Petahiya, agha 20 ghakamuwila u Yehezikeli,

¹⁷ agha 21 ghakamuwila u Yakini, agha 22 ghakamuwila u Gamuli,

¹⁸ agha 23 ghakamuwila u Delaya, agha 24 ghakamuwila u Maziya.

¹⁹ Imbombo iya bantu banaba yikaba yakubomba mu Nyumba iya Mwene, ukuyana namumo u Mwene u Chala uwa ba Izilayeli akamulamulila u Aloni umunyenya wabo.

Amatabwa agha ba Levi

²⁰ Abaluko abanji aba Levi bakaba bo aba: Pakasi pa bana aba Amulamu umulongozi akaba we Shubayeli. Pakasi pa bana aba Shubayeli, umulongozi akaba we Yehideya.

²¹ Pakasi pa bana aba Lehabiya, umulongozi akaba we Ishiya.

²² Pakasi pa baluko ulwa Izihali, umulongozi akaba we Shelomoti, pakasi pa baluko ulwa Shelomoti, umulongozi akaba we Yahati.

²³ Pakasi pa baluko ulwa Hebuloni, umulongozi akaba we Yeliya, uwabubili akaba we Amaliya, uwabutatu akaba we Yahaziyeli, wafolo akaba we Yekameyamu.

²⁴ Pakasi pa baluko ulwa Uziyeli, umulongozi akaba we Mika. Pakasi pa baluko ulwa Mika, umulongozi akaba we Shamili.

²⁵ Uwamwabo uwa Mika akaba we Ishiya wepe akaba mulongozi. Pakasi pa baluko ulwa Ishiya, umulongozi akaba we Zekaliya.

²⁶ Abana aba Melali bakaba bo aba: U Mahili nu Mushi. U Yaziya akapapa u Beno.

²⁷ U Yaziya akapapa u Shohamu nu Zakuli nu Ibili.

²⁸ U Mahili akapapa u Eleyazala, loli u Eleyazala atakaba nu mwana umulumendo nayumoyumo.

²⁹ U Kishi akapapa u Yelameli.

³⁰ U Mushi akapapa u Mahili nu Edeli nu Yelimoti. Banaba bakaba ba Levi ukuyana ni nyumba zyabo.

³¹ Bope bakapanga amayele ukuyana namumo bakapangila abakamu babo aba Levi pamaso pa mwene u Devedi nu Zadoki nu Ahimeleki, sona na pamaso pa balongozi abanyumba izya baputi, nizya ba Levi. Inyumba izya wamwabo izya bakatote zikabelengiwa ngati mumo zikabelengiliwa inyumba iya nkwangu.