1 Imbili 23 - IBAYIBOLO 2024

¹ Bo u Devedi aghosipa nkani, akamwimika umwana wache u Solomoni pakuba we mwene uwa Izilayeli.

Imbombo iya ba Levi

² U mwene u Devedi akababungannya poka abalongozi bosi aba Izilayeli, poka na baputi, sona naba Levi.

³ Akababelenga aba Levi bosi abamaka 30 pamo ukuchilapo, po bosi poka bakabapo 38,000.

⁴ Po akati, “Abantu 24 babanje bakapitawa abakwenelezya imbombo iyakuzenga Inyumba iya Mwene, po abanji 6,000 babanje makambala na balongi.

⁵ Abanji 4,000 babanje balindilili pamulyango uwa lupaso, sona abanji 4,000 bamupalizyanje u Mwene ni vyakwimbila vivyo navibika ukuti vibombaye imbombo yiniyi.”

⁶ U Devedi akabagaba aba Levi muvigaba vitatu, ukuyana ni nyumba zyabo: U Gelishoni nu Kohati nu Melali.

⁷ U Gelishoni akaba na bana babili: U Ladani nu Shimeyi.

⁸ Abana aba Ladani bakaba bo aba: U Yehiyeli ukatote nu Zatani nu Yoweli. Bosi poka bakabapo batatu.

⁹ Abana aba Shimeyi bakaba bo aba: U Shelomoti nu Haziyeli nu Halani. Bosi poka bakabapo batatu, sona bakaba balongozi abanyumba zyabo.

¹⁰ Abana aba Shimeyi bakaba bo aba: U Yahati nu Ziza nu Yewushi nu Beliya. Banaba bakaba bana aba Shimeyi. Bosi poka bakabapo folo.

¹¹ U Yahati akaba we katote, u Ziza akaba wabubili, loli u Yewushi nu Beliya batakaba na bana abinji abalumendo. Ichi cho chifukwa bakabelengiwa pakuba ba nyumba yoka.

¹² Abana aba Kohati bakaba bo aba: U Amulamu nu Izihali nu Hebuloni nu Uziyeli. Bosi poka bakabapo folo.

¹³ Abana aba Amulamu bakaba bo aba: U Aloni nu Mozesi: U Aloni poka na baluko lwache bakasaliwa pakwenelezya ivintu ivizelu. Bakabika ivyakwiyipa pamaso pa Mwene, bakamubombela u Mwene, sona bakabasaya abantu mwitabwa ilya Mwene bwila na bwila.

¹⁴ Abana aba Mozesi umubombi uwa Chala, bakabelengiwa pakuba bamo abaluko ulwa ba Levi.

¹⁵ Abana aba Mozesi bakaba bo aba: U Gelishomu nu Eliyezeli.

¹⁶ Umwana ukatote uwa Gelishomu akaba we Shebuweli.

¹⁷ U Eliyezeli akaba nu mwana weka, itabwa lyache akaba we Lehabiya. U Eliyezeli atakaba na bana abanji abalumendo, loli u Lehabiya akaba na bana abalumendo abinji nkani.

¹⁸ Umwana uwa Izihali akaba we Shelomiti, yuyo akaba mulongozi uwa luko ulwa Shelomiti.

¹⁹ Abana aba Hebuloni bakaba bo aba: Ukatote akaba we Yeliya, uwabubili akaba we Amaliya, uwabutatu akaba we Yahaziyeli wafolo akaba we Yekameyamu.

²⁰ Abana aba Uziyeli bakaba bo aba: Ukatote akaba we Mika, uwabubili akaba we Ishiya.

²¹ Abana aba Melali bakaba bo aba: U Mahili nu Mushi. Abana aba Mahili bakaba bo aba: U Eleyazala nu Kishi.

²² U Eleyazala akafwa umusita bana abalumendo, loli akaba na bana abalindu bene. Abavyala babo, abana aba Kishi bo babo bakabasenda.

²³ Abana aba Mushi bakaba bo aba: U Mahili nu Edeli nu Yelemoti. Bosi poka bakabapo batatu.

²⁴ Banaba bakaba baluko ulwa Levi ukuyana ni nyumba zyabo, sona bakaba balongozi abanyumba zyabo ukuyana namumo bakabelengeliwa pa muntu wesi, kokuti abantu abamaka 20 pamo ukuchilapo, babo bakabomba imbombo mu Nyumba iya Mwene.

²⁵ Pakuti u Devedi akati, “U Mwene u Chala uwa ba Izilayeli abapa umutende abantu bache, sona akwiza pakwikala mu Yelusalemu bwila na bwila.

²⁶ Po aba Levi batakwiza pakunyamula nalumo ichisakasa icha Mwene, pamo ivibombelo vyosi vivyo vikubombeziwa pa chiputo.”

²⁷ Ukuyana na mazyu aghabumalilo agha Devedi, aba Levi abamaka 20 pamo ukuchilapo bo babo bakabelengiwa.

²⁸ Imbombo iya ba Levi yikaba yakubavwa abaluko ulwa Aloni pakubomba imbombo mu Nyumba iya Mwene pakwenelezya ulubinjilo ni vipinda nukuswefya ivibombelo ivizelu sona nukubomba imbombo izyakulekanalekana mu Nyumba iya Chala.

²⁹ Bakaba ni mbombo iyakwenelezya akapiyile aka vibama ivipaghuliwa, vivyo vikabikiwa pitebulo ni chakwiyipa icha busu ni vibama vivyo vite ni chilungo ni vyakwiyipa ivyakupiyiwa sona ni vyakwiyipa ivya busu ubwakongannya na mafuta. Bakaba sona ni mbombo iyakupima ivintu vyosi vivyo vikabikiwa mu Nyumba iya Mwene.

³⁰ Bakaba sona ni mbombo iyakumupalizya nukumukwezya u Mwene pandabindabi na pachamabwila posi,

³¹ sona bo bakubika ivyakwiyipa ivyakocha kwa Mwene Pisiku Ilyakutuzya, na palusekelo ulwa Kupanta ukwa Mwezi, sona na pamasiku agha lusekelo, ukuyana nu bwinji ubwa chakwiyipa chicho chikulondiwa kabilikabili pamaso pa Mwene.

³² Aba Levi benelezyanje Ichisakasa icha Mwene mu Chipinda Ichizelu pakubavwa abakamu babo, abaluko ulwa Aloni. Babanje sona ni mbombo iyakwenelezya ichiputo mu Nyumba iya Mwene.