1 Imbili 20 - IBAYIBOLO 2024

U Devedi akukafyula akaya akakulu nkani aka Laba

¹ Pakabalilo kako amakwi ghakalembagha amani sona bo abamwene bakubuka pakulwa ubwite, u Yowabu akabalongozya abasilikali nukuchinangannya ichisu icha ba Amoni, mupaka nukukafyula akaya akakulu nkani aka Laba, loli u Devedi akasyalikila mu Yelusalemu. U Yowabu akakanangannya akaya kala nukukapela pakuba chisami.

² U Devedi yula akamufyula u mwene uwa ba Amoni impumpu. Ubung'wamu bwache bukaba amakilogalamu 35 agha golide sona yikaba na mabwe aghamutengo. Po bakamuvwika u Devedi. Akavifyula ivintu ivyinji nkani ivya mukaya akakulu kala

³ nukubefyamo abantu aba mukaya. Po akababombezya imbombo iyakupala amatabwa na bapiki ni ntemo. U Devedi akatubombela bunubu utwaya tosi utukulu utwa ba Amoni. Po u Devedi na basilikali bache bosi bakabwela ku Yelusalemu.

Ubwite naba Filisiti

⁴ Bo pachilapo akabalilo pakabapo ubwite naba Filisiti mu Gezeli. Pakabalilo kalakala u Sibekayi uwamu Husha akamughogha u Sipayi uwaluko ulwa Lefayimu, po aba Filisiti bakapotwa.

⁵ Kukabako sona ubwite naba Filisiti, po u Elihanani umwana uwa Yayili akamughogha u Lahimi uwamwabo uwa Goliyati umu Giti, yuyo ichilemelo icha impalala yache yikaba ni chikwi ngati chakulukila amenda.

⁶ Kukabako sona ubwite mu Gati. Kulakula kukabako umuntu yumo umutali nkani, yuyo akaba nu tufingwi sikisi kunyobe zyosi zibili nu tusalala sikisi kunyayo zyosi zibili, po tosi poka tukaba 24. Umuntu yunuyu akaba waluko ulwa Lafa.

⁷ Bo abasamula aba Izilayeli, u Yonatani umwana uwa Shimeya, uwamwabo uwa Devedi akamughogha.

⁸ Banaba bakaba baluko ulwa Lafa, babo bakikala mu Gati. Po u Devedi poka na basilikali bache bakabaghogha abantu bosi banaba.