1 Imbili 19 - IBAYIBOLO 2024

U Devedi akubapota aba Amoni

¹ Bo pachilapo akabalilo, u mwene u Nahashi uwa aba Amoni akafwa, po umwana wache u Hanuni akamupyana pakuba we mwene.

² U Devedi akinong'ona akati, “Nkwiza pakumupelela ichisa u Hanuni umwana uwa Nahashi, pakuti uwise wepe akampelela ichisa.” Po u Devedi akatuma intumi pakumulema inyobe u Hanuni pachifukwa icha bufwe ubwa wise. Bo intumi zila zyafika mu Amoni,

³ amakambala agha mu Amoni ghakamulalusya u Hanuni ghakati, “Nkimba ukwinong'ona ukuti u Devedi akumuchindika ughuso pakuzituma intumi pakukulema inyobe? Awe, nkimba intumi zila zitizite kuno pakuchitendela ichisu ukuti bachifyule?”

⁴ Po Hanuni akazilema intumi zila, akazimwa indevu, nukudumula inkazo zyabo mupaka mumusana, po akazibwezya.

⁵ Bo umuntu yumo iza kwa Devedi nukumubuzya nizya bantu banaba, akatuma intumi pakukomana nabo, pachifukwa ichakuti bakaba ni soni nkani. U mwene akati, “Mwikale tasi mu Yeliko mupaka indevu zyinyu zimele, po mwizaye.”

⁶ Bo aba Amoni bazyaghannya ukuti bipalaghulila ubukali ubwa Devedi, u mwene u Hanuni, poka naba Amoni bakatuma amakilogalamu 1,000 agha siliva ukuti baghule ingolo izya bwite, poka na bendezya ingolo zila ukufuma ku Siliya Nahaliyamu nu Siliya Maaka sona nu Zoba.

⁷ Bakaghula ingolo izya bwite 32,000 poka na bendezya ingolo sona nu mwene uwamu Maaka poka na basilikali bache. Abasilikali bala bakiza nukuzenga ivisakasa ivya bwite papipi nu Medeba. Pakabalilo kalakala aba Amoni bope bakepamo mutwaya twabo utukulu nukwiza pakulwa ubwite.

⁸ Bo u Devedi ivwa zinizi, akamutuma u Yowabu, poka na basilikali bosi pakulwa nabo ubwite.

⁹ Aba Amoni bakiza nukubamba mumizele iya bwite pamulyango uwa kaya akakulu nkani, bo abamwene babo bakiza poka nabo bakaba bene mwikombe.

¹⁰ U Yowabu akennya ukuti kuntazi sona na kwisinda kukaba utubukatila utwa basilikali. Po akabasala abasilikali abamaka nkani aba mu Izilayeli, nukubabambika umwakwenannya naba Siliya.

¹¹ Abasilikali abanji bosi akababika pasi pabulaghili ubwa wamwabo u Abishayi nukubabambika umwakwenannya naba Amoni.

¹² U Yowabu akati, “Nanti aba Siliya baba na maka nkani ukunchila, po wize pakunyavwa. Loli nanti aba Amoni baba na maka ukukuchila nkwiza pakukwavwa.

¹³ Mujimbaye sona tulwanje ichanavuli pakubalwila abantu bitu nutwaya utukulu nkani utwa Chala. Ubwighane ubwa Mwene bubombiwanje.”

¹⁴ U Yowabu poka na basilikali bache bakabuka pakulwa ubwite naba Siliya, po aba Siliya bakachimbila pamaso papache.

¹⁵ Bo aba Amoni bennya ukuti aba Siliya bakuchimbila, bope bakachimbila pamaso pa wamwabo u Abishayi nukwinjila mukaya akakulu nkani. Po u Yowabu akanyokela ku Yelusalemu.

¹⁶ Bo aba Siliya bazyaghannya ukuti aba Izilayeli babapota, po bakatumako intumi pakubasenda aba Siliya, babo bakaba kwisila ilya lusoko ulwa Yufuleti, umwakulongoziwa nu Shofaki usongo uwa basilikali aba Hadadezeli.

¹⁷ Bo u Devedi ivwa zinizi akababungannya aba Izilayeli bosi poka nukuloboka ulusoko ulwa Yolodani. Akiza kukwabo nukubabambika abasilikali bache ukuti balwe ubwite naba Siliya. Po bakalwa nawe ubwite.

¹⁸ Loli aba Siliya bakabachimbila aba Izilayeli. Po u Devedi akabaghogha abasilikali 7,000 abendezya ingolo, sona na basilikali 40,000 abakwenda pasi. Akamughogha sona u Shofaki usongo uwa basilikali.

¹⁹ Bo abamwene babo bakaba pasi pabulaghili ubwa Hadadezeli bennya ukuti aba Izilayeli babapota, bakivwana nizya mutende nu Devedi, umwakuti bakaba pasi pabulaghili bwache. Po aba Siliya bakanyilagha nkani pakubavwa sona aba Amoni bala.