1 Imbili 18 - IBAYIBOLO 2024

Ubupoti ubwa Devedi

¹ Pisinda pache u Devedi akalwa ubwite naba Filisiti nukubapota. Po akakafyula akaya akakulu aka Gati, poka nutwaya twache tosi utupalamani munyobe izya ba Filisiti.

² U Devedi akabapota sona aba Mowabu, po bakaba pasi pabulaghili bwache nukwanda pakusonka umusonko kukwache.

³ U Devedi akamupota sona u Hadadezeli u mwene uwamu Zoba mupaka ku Hamati, bo u Hadadezeli akubuka pakubwikazya ubumwene bwache mulubazu ulwa lusoko ulwa Yufuleti.

⁴ U Devedi akazilema ingolo zyache izya bwite 7,000 sona na basilikali abakwenda pasi 20,000. Akazidumula inkole izya vinama izya ifalasi zyache izya ngolo, loli akazisungako ingolo zimo 100.

⁵ Bo aba Siliya aba mu Damasika, biza pakumwavwa u mwene u Hadadezeli uwamu Zoba, u Devedi akabaghogha abasilikali 22,000.

⁶ U Devedi akazenga ubuzilo ubwa bwite muchigaba icha Siliya mu Damasika, po aba Siliya bakaba pasi pabulaghili bwache nukusonka umusonko kukwache. U Mwene akamupa u Devedi ubupoti kosi kuko akabukagha.

⁷ U Devedi akasenda ingulu izya golide zizyo amakambala agha Hadadezeli bakanyamula nukubuka nazyo ku Yelusalemu.

⁸ U Devedi akafyula umukuba umwinji nkani mukaya aka Teba naka Kuni, tuto tukaba twaya utwa Hadadezeli. U Solomoni akabombezya umukuba ghunughu pakupanga ibeseni ilya mukuba ni mpanda sona ni vibombelo ivinji ivya mukuba.

⁹ Bo u mwene u Towu uwamu Hamati ivwa ukuti u Devedi abapota abasilikali bosi aba mwene u Hadadezeli uwamu Zoba,

¹⁰ akamutuma umwana wache u Hadolamu pakumulamuka nukumulondela ivyiza u Devedi pachifukwa ichakumupota u Hadadezeli, yuyo akalwanga ubwite nu Towu. U Hadolamu akamupa u golide nu siliva sona nu mukuba pakuba vyabupi.

¹¹ U Devedi akavipaghulila kwa Mwene ivintu vinivi ngati mumo akabombela nu siliva nu golide, vivyo akabafyula inko izi: Aba Edomu naba Mowabu naba Amoni naba Filisiti sona naba Amaleki.

¹² U Abishayi umwana uwa Zeluya akabaghogha aba Edomu 18,000 mwikombe ilya Mbeya.

¹³ U Devedi akazenga ubuzilo ubwa bwite mu Edomu, umwakuti aba Edomu bosi bakaba pasi pabulaghili ubwa Devedi. Po u Mwene akamupa u Devedi ubupoti kosi kuko akabukagha.

¹⁴ U Devedi akalaghilagha mu Izilayeli mosi sona akabombelagha vyosi mubwanaloli na mubugholosu pakasi pa bantu bosi.

¹⁵ U Yowabu umwana uwa Zeluya akaba we songo uwa basilikali. U Yehoshafati umwana uwa Ahiludi akaba musimbi uwa mabuku agha mbili.

¹⁶ U Zadoki umwana uwa Ahitubi nu Ahimeleki umwana uwa Abiyatala bakaba baputi. U Shavisha akaba musimbi.

¹⁷ U Benaya umwana uwa Yehoyada akaba we songo uwa ba Keleti naba Peleti sona abana aba Devedi bakaba makambala agha songo, ghagho ghakabombagha pamaso pa mwene.