1 Imbili 17 - IBAYIBOLO 2024

U Chala akumulayizya u Devedi

¹ Bo u Devedi ikalana munyumba yache iya bumwene, akamubuzya umulaghuzi u Natani akati, “Ane nkwikala munyumba iya makwi agha mwale, loli Ibokosi ilya Lufingo ilya Mwene lili muchisakasa.”

² U Natani akamwamula akati, “Bomba chosi chicho ukwinong'ona ukuti chiza, pakuti u Chala ali nawe.”

³ Ubusiku bulabula u Chala akamubuzya u Natani akati,

⁴ “Buka umubuzye umubombi wane u Devedi, uti: U Mwene akuti, ‘Fwandi ukwinong'ona ukuti awe ukwiza pakunzengela inyumba iyakuti nikalayemo?

⁵ Ukwandila pisiku lilyo nkabefezya aba Izilayeli mu Ijiputi mupaka nilelo bulo, ane ntikayepo nalumo munyumba. Pakuti ane nendanendagha muchisakasa ichi na chila, sona akabalilo kosi nikalagha muchisakasa.

⁶ Kosi kuko nabukagha poka naba Izilayeli, nkimba nkabalalusyapo abalongozi babo nkabapa imbombo iya kubadima abantu bane aba Izilayeli ukuti, “Nkimba choni chicho mutanzengeye inyumba iya makwi agha mwale?” ’

⁷ “Losi ulu umubuzye umubombi wane u Devedi uti, ‘U Mwene Uwamaka Ghosi akuti: Nkakwefyako kuludimo kuko ukadimagha ing'ozi ukuti ubanje we mulaghili uwa bantu bane aba Izilayeli.

⁸ Ane nabanga nawe kosi kuko wabukagha, sona nabachimbizya abalwani bako pamaso papako. Losi ulu nkwiza pakulipela itabwa lyako pakuba likulu nkani ngati amatabwa agha bantu abamanyikwe aba muchisu ichapasi.

⁹ Nkwiza pakubapa ubuzilo abantu bane aba Izilayeli, sona nkwiza pakubikazya, umwakuti babanje nakaya akabo na kabo, nukubazighilila kubalwani babo. Abantu ababibi batakwiza pakubayivya sona, ngati mumo bakabombelagha pakwanda pala,

¹⁰ pakabalilo kako nkabimikila abalongi abantu bane aba Izilayeli. Nkwiza pakukuzighilila kubalwani bako bosi. U Mwene akukubuzya ukuti, akwiza pakukuzengela inyumba.

¹¹ Nanti amasiku ghako ghamala, sona nanti wabakonka abanyenya bako kwipumpa, nkwiza pakumupela weka uwa baluko lwako pakuba wampyana wako, yuyo akwiza pakuba weka uwabana bako, po nkwiza pakubwikazya ubumwene bwache.

¹² Umwana yunuyu akwiza pakunzengela inyumba, sona nkwiza pakubwikazya ubumwene bwache bwila na bwila.

¹³ Nkwiza pakuba ne wise, po umwene akwiza pakuba mwana wane. Ntakwiza pakwefyapo ulughano lwane papache, awe, ngati mumo nkalwefezya pa Sabuli, yuyo akabalaghilapo kwisinda.

¹⁴ Nkwiza pakumwikazya munyumba yane, sona na mubumwene bwane bwila na bwila. Ubumwene bwache bukwiza pakubapo bwila na bwila.’ ”

¹⁵ U Natani akamubuzya u Devedi amazyu ghosi ghagho u Mwene akamuvumbulila.

Ulwiputo ulwa Devedi

¹⁶ U mwene u Devedi akinjila muchisakasa nukwikala pamaso pa Mwene, po akiputa akati, “Wee Mwene u Chala, nkimba ane ne wenu, sona abamunyumba yane bo bawenu, ukuti unfisye mupaka po indi pano ilelo?

¹⁷ Wee Chala, zinizi zitakakwana pamaso papako, loli ukanenela zila nizya muntazi izya bamunyumba yane, ne mubombi wako. Wee Mwene Uwamaka Ghosi, wanyennya ngati po ne muntu umuchindikiwa pakasi pabantu bosi.

¹⁸ “Nkimba u Devedi anganena sona ichoni, pakuti wanchindika? Awe umenye nkani ane ne mubombi wako.

¹⁹ Pachifukwa icha ane ne mubombi wako, sona nukuyana nu bwighane bwako, awe wabomba ivintu ivikulu nkani umwakuti wamanyisya ilayizyo lyako ikulu.

²⁰ “Wee Mwene, atalipo nayumo yuyo ayanite nawe. Atalipo sona u Chala uyunji, loli wewe mpela, ukuyana namumo twivwila na makutu ghitu.

²¹ Nkimba bawenu babo bayanite na bantu bako aba Izilayeli, uluko loka muchisu ichapasi, lulo u Chala akabuka pakwitabulila mwene, nukuti itabwa lyache limanyikwanje pachifukwa icha mwemwe pakubomba iviswigho ivikulu ni vyakoghofya. Ukazichimbizya inko izinji, poka na bachala babo pamaso pabantu bako, babo ukabatabula mu Ijiputi?

²² Wee Mwene, ukabapela aba Izilayeli pakuba bantu bako bwila na bwila, po waba we Chala wabo.

²³ “Wee Mwene, ilayizyo lilyo ukandayizya ne mubombi wako na bamunyumba yane libanje lya bwila na bwila, sona lyikalanaye bwila na bwila. Bomba vivyo ukalayizya

²⁴ umwakuti lyikalane, sona nukuti itabwa lyako libanje likulu bwila na bwila. Abantu bakwiza pakunenagha ukuti, ‘U Mwene Uwamaka Ghosi, u Chala uwa Izilayeli, naloli we Chala uwa Izilayeli.’ Po abamunyumba yane ne mubombi wako u Devedi bakwiza pakwikalana pamaso papako.

²⁵ “Wee Chala wanvumbulila ane ne mubombi wako ukuti nkwiza pakukuzengela inyumba. Po ane ne mubombi wako niputa bunubu nu bujivu.

²⁶ Wee Mwene, awe we Chala, sona wandayizya ane ne mubombi wako ivintu ivyiza vinivi.

²⁷ Po ilelo nkukulaba ukuti uyisaye inyumba yane ne mubombi wako, ukuti yibanje nsayiwa pamaso papako bwila na bwila, pakuti awe we Mwene wabasaya, po bakwiza pakubanga basayiwa bwila na bwila.”