1 Imbili 15 - IBAYIBOLO 2024

Ibokosi ilya Lufingo ilya Mwene biza nalyo mu Yelusalemu

¹ Bo u Devedi izengela inyumba mukaya akakulu nkani aka Devedi, akaliyanizizya ubuzilo Ibokosi ilya Lufingo ilya Chala, nukulizengela ichisakasa.

² Po u Devedi akati, “Aba Levi bene bo babo balinyamulaye Ibokosi ilya Lufingo ilya Chala, pakuti u Mwene akabasala ukuti banyamulaye Ibokosi lila, nukumubombela bwila na bwila.”

³ U Devedi akababungannya poka aba Izilayeli bosi mu Yelusalemu ukuti bize ni Bokosi ilya Lufingo ilya Mwene kubuzilo bwache bubo akaliyanizizya.

⁴ Akababungannya poka abaluko ulwa Aloni naba Levi. Abantu babo akabitizya bakaba bo aba:

⁵ Pakasi pa baluko ulwa Kohati pakabapo umulongozi u Uliyeli poka na bakamu bache 120.

⁶ Pakasi pa baluko ulwa Melali pakabapo umulongozi u Asaya poka na bakamu bache 220.

⁷ Pakasi pa baluko ulwa Gelishoni pakabapo umulongozi u Yoweli poka na bakamu bache 130.

⁸ Pakasi pa baluko ulwa Elizafani pakabapo umulongozi u Shemaya poka na bakamu bache 200.

⁹ Pakasi pa baluko ulwa Hebuloni pakabapo umulongozi u Eliyeli poka na bakamu bache 80.

¹⁰ Pakasi pa baluko ulwa Uziyeli pakabapo umulongozi u Aminadabu poka na bakamu bache 112.

¹¹ Po u Devedi akamwitizya umuputi u Zadoki nu Abiyatala, poka nu Uliyeli nu Asaya nu Yoweli nu Shemaya nu Eliyeli sona nu Aminadabu babo bakaba ba Levi.

¹² Akababuzya akati, “Amwe mwe balongozi abanyumba izya ba Levi. Po amwe poka naba Levi abamwinyu mwipaghule mwebene nukwiza ni Bokosi ilya Lufingo ilya Mwene, u Chala uwa Izilayeli kubuzilo bubo naliyanizizya.

¹³ Pachifukwa ichakuti amwe mwe ba Levi mutakiza nalyo pakabalilo kako u Mwene u Chala witu akatukalalila. Pakuti tutakabuzikizya kukwache namumo tungalinyamulila.”

¹⁴ Abaputi poka naba Levi bakipaghula bene ukuti balinyamule Ibokosi ilya Lufingo ilya Mwene u Chala uwa Izilayeli.

¹⁵ Po aba Levi bala bakalibaghala na makwi, ukuyana namumo u Mwene akamulamulila u Mozesi.

¹⁶ U Devedi akabalamula abalongozi aba ba Levi ukuti basale abawamwabo bamo pakwimba inyimbo izya palusekelo pakubombezya amapango ni vinanda na malimba.

¹⁷ Po aba Levi bala bakamusala u Hemani umwana uwa Yoweli nu wamwabo u Asafu umwana uwa Belekiya nu Etani umwana uwa Kushaya uwaluko ulwa Melali

¹⁸ poka na bawamwabo babo bakaba babubili pambombo: U Zekaliya nu Yaziyeli nu Shemilamoti nu Yehiyeli nu Uni nu Eliyabu nu Benaya nu Maseya nu Matitiya nu Elifelehu nu Mikineya nu Obedi Edomu sona nu Yeyeli babo bakaba balindilili aba pamulyango.

¹⁹ Abimbi bakaba bo aba: U Hemani nu Asafu sona nu Etani abantu aba bo babo bakalizyanga amalimba agha mukuba.

²⁰ U Zekaliya nu Aziyeli nu Shemilamoti nu Yehiyeli nu Uni nu Eliyabu nu Maseya sona nu Benaya bakalizyanga ivinanda ivya mazyu agha pamwanya.

²¹ Loli u Matitiya nu Elifelehu nu Mikineya nu Obedi Edomu nu Yeyeli sona nu Azaziya bakalongolela pakwimba amapati agha mazyu agha pasi.

²² U Kenaniya umulongozi uwa ba Levi akaba ni mbombo iyakwenelezya ubwimbi pachifukwa ichakuti akamanya nkani pakwimba.

²³ U Belekiya nu Elikana bo babo bakalindililagha Ibokosi ilya Lufingo lila.

²⁴ U Shebaniya nu Yoshafati nu Netaneli nu Amasayi Zekaliya nu Benaya sona nu Eliyezeli babo bakaba baputi, bakasaliwa ukuti balizyanje amapati pantazi pa Bokosi ilya Lufingo ilya Chala. U Obedi Edomu nu Yehiya bope bakalindililagha pamulyango uwa Bokosi ilya Lufingo.

Bakulisamizizya ku Yelusalemu Ibokosi ilya Lufingo

²⁵ Po u Devedi poka na balongozi aba ba Izilayeli na basongo aba basilikali 1,000 bakabuka kunyumba iya Obedi Edomu pakulisenda Ibokosi ilya Lufingo ilya Mwene, bo bakusekela nkani.

²⁶ Pachifukwa ichakuti u Chala akabavwa aba Levi babo bakanyamulagha Ibokosi ilya Lufingo ilya Mwene lila, bakabika inkambaku seveni na badubi seveni ukuti vibanje vyakwiyipa.

²⁷ Pakabalilo kalakala u Devedi akavwala inkazo intonte poka naba Levi babo bakanyamula Ibokosi lila sona na bimbi nu Kenaniya umulongozi uwa bimbi. Loli u Devedi akavwala sona u efodi umutonte.

²⁸ Po aba Izilayeli bosi bakiza ni Bokosi ilya Lufingo ilya Mwene bo bakukolomoka nkani nukulizya impembe izya badubi na mapati na malimba na mapango sona ni vinanda.

²⁹ Bo Ibokosi ilya Lufingo ilya Mwene likwinjila mukaya akakulu aka Devedi, u Mikali umwana umulindu uwa Sabuli akananamizya pibwindo, Bo amwennya u mwene u Devedi akunyelanyela nukwimba pamaso pa Mwene, akanda pakumusamula mumoyo wache.