1 Imbili 13 - IBAYIBOLO 2024

Ibokosi ilya Lufingo biza sona nalyo mu Kiliyati Yeyalimu

¹ U Devedi akanenezannya na basongo bosi aba basilikali 1,000 sona na basongo aba basilikali 100.

² Po akachibuzya ichilundilo chosi icha ba Izilayeli akati, “Nanti naloli chingabahobosya sona nanti bwighane ubwa Mwene u Chala witu, zagha tubatumile amazyu abakamu bitu muvigaba vyosi mu Izilayeli. Tubatumile sona amazyu abaputi poka naba Levi, babo bakwikala poka nabo mutwaya twabo utukulu na mubuzilo ubwakudimilako ivitekwa ukuti bize kuno pakutwavwa.

³ Zagha tubuke pakulisenda Ibokosi ilya Lufingo ulwa Chala nukulinyosezya kuno, pakuti pakabalilo aka mwene u Sabuli, tutakabuzikizya kwa Mwene.”

⁴ Po ichilundilo chosi chila chikitinkana nazyo zinizi, pachifukwa ichakuti abantu bosi bakahoboka ni fundo yiniyi.

⁵ U Devedi akababungannya poka aba Izilayeli bosi, ukwandila kulusoko ulwa Shiholi mu Ijiputi mupaka ku Lebo Hamati ukuti babuke ku Kiliyati Yeyalimu pakulisenda Ibokosi ilya Lufingo ilya Chala.

⁶ Po u Devedi poka naba Izilayeli bosi babo bakaba nawe bakabuka kuchigaba icha Baala muchisu icha Yuda, kokuti Kiliyati Yeyalimu pakulisenda Ibokosi ilya Lufingo ilya Chala, lilyo likwitiziwanga ni tabwa ilya Mwene, yuyo ikaye pachitengo icha bumwene pakasi pa bakelubi.

⁷ Bakalinyamula Ibokosi ilya Chala mungolo impya ukwepako nalyo kunyumba iya Abinadabu, sona u Uza nu Ahiyo bo babo bakendezyanga ingolo yila.

⁸ U Devedi poka naba Izilayeli bosi bakasekelagha na maka ghabo ghosi pamaso pa Chala bo bakwimba inyimbo nukulizya ivinanda na mapango ni vivisekeseke nu malimba sona na mapati.

⁹ Bo bafika pabuzilo ubwakukomelapo inyinulo pa Kidoni, u Uza akagholosya inyobe yache nukulipalamasya Ibokosi ilya Lufingo lila, pachifukwa ichakuti inkambaku zikipunula.

¹⁰ Panapo na panapo u Mwene akamukalalila u Uza nukumughogha, pachifukwa ichakuti akalipalamasya Ibokosi lila. Po akafwila palapala pamaso pa Chala.

¹¹ Po u Devedi akakalala pachifukwa ichakuti u Mwene akamughogha u Uza. Ubuzilo bula bukwitiziwa ukuti Pelezi Uza mupaka nilelo bulo.

¹² U Devedi akamunyilagha u Chala, po akati, “Nkimba Ibokosi ilya Lufingo ilya Chala lingiza bulibuli kukwane?”

¹³ U Devedi atakalisendela Ibokosi lila mukaya aka Devedi mu Yelusalemu. Loli akapaghuka nukubuka nalyo kunyumba iya Obedi Edomu umu Giti.

¹⁴ Ibokosi ilya Lufingo ilya Chala lila likikala na bamunyumba iya Obedi Edomu amezi matatu, po u Mwene akabasaya, poka ni vintu vyosi vivyo akaba navyo.