1 Imbili 11 - IBAYIBOLO 2024U mwene u Devedi akulaghila mu Izilayeli ( 2 Sam. 5.1-10 ) 1 Aba Izilayeli bosi bakabungana poka kwa Devedi mu Hebuloni nukumubuzya ukuti, “Aswe poka nawe twe bana muntu. 2 Kale bo u Sabuli we mwene witu, awe ukabalongolela aba Izilayeli kubwite. U Mwene u Chala witu akakubuzya akati, ‘Ukwiza pakuba we mulaghili uwa bantu bane aba Izilayeli, sona ukwiza pakuba we mwene wabo.’ ” 3 Bo abalongozi bosi aba Izilayeli biza kwa mwene u Devedi mu Hebuloni, akafingana nabo ulufingo. Po bakamupakazya amafuta pakuba we mwene uwa ba Izilayeli, ukuyana namumo u Mwene akamubuzizya u Samuweli. 4 U Devedi poka naba Izilayeli bosi bakabuka pakulwa ubwite mu Yelusalemu. Aba Yebusi babo bakikalagha mulamula 5 bakamubuzya u Devedi bakati, “Te ukinjilemo muno.” Loli u Devedi akafyula ilinga ilya Ziyoni, akaya akakulu nkani aka Devedi. 6 U Devedi akati, “Umuntu wesi yuyo aba wakwanda pakumughogha umu Yebusi, akwiza pakuba we songo uwa basilikali.” U Yowabu umwana uwa Zeluya akaba wakwanda pakubukako, po akaba we songo uwa basilikali. 7 Po u Devedi akafyula ilinga lila, akikala mulamula nukulyita ukuti akaya akakulu nkani aka Devedi. 8 Akazenga akaya akakulu nkani ukuzyungulila ilinga lila ukwandila pa Milo. U Yowabu akazenga sona ulubazu ulunji ulwa kaya akakulu nkani kala. 9 Po u Devedi akabanga na maka nkani, pachifukwa ichakuti u Mwene Uwamaka Ghosi akaba nawe. Abasilikali abamaka nkani aba Devedi ( 2 Sam. 23.8-39 ) 10 Abasongo aba basilikali aba Devedi, poka naba Izilayeli bosi babo bakamwavwa nkani u Devedi pakubwikazya ubumwene bwache muchisu chosi ukayana namumo u Mwene akalayizizya bo aba: 11 Ulu lo lubatiko ulwa basilikali abamaka aba Devedi: Yashobeyamu uwamu Hakimoni akaba we songo uwa makambala. Pakabalilo kamo u Yashobeyamu akabaghogha abantu 300 ni mpalala yache. 12 Uwabubili wache akaba we Eleyazala umwana uwa Dodayi umu Ahohi. U Eleyazala akaba weka uwa basilikali batatu abamaka nkani bala. 13 Akaba poka nu Devedi bo bakulwa ubwite naba Filisiti, babo bapa Pasi Damimu. Aba Izilayeli bakabachimbila aba Filisiti, pabuzilo bubo pakabapo umughunda uwa mapemba. 14 Loli abantu babili banaba bakima pakasikasi pa mughunda. Bakabazighilila nukubaghogha aba Filisiti, pachifukwa ichakuti u Mwene akabapa ubupoti ubukulu nkani. 15 Isiku limo abasongo batatu aba basilikali pakasi pa basongo 30 bakabuka kwa Devedi pilyalabwe mumpako iya Adulamu, bo akabukatila aka basilikali aka ba Filisiti kazengite ivisakasa vyabo mwikombe ilya Lefayimu. 16 Pakabalilo kalakala u Devedi akaba mwilinga, bo akabukatila aka basilikali aba ba Filisiti kali mu Betelehemu. 17 U Devedi akaba ni nyota nkani, po akati, “Nalondagha nkani nanti umuntu yumo ansembelagha amizi muchiziba papipi nu mulyango uwa lupaso ulwa Betelehemu.” 18 Abantu batatu banaba bakapankula ulupaso ulwa basilikali aba ba Filisiti, nukusemba amizi papipi nu mulyango uwa lupaso ulwa Betelehemu, po bakiza nagho kwa Devedi. Loli u Devedi akakana pakung'wela. Mubuzilo bwache, akaghakupulila pamaso pa Mwene. 19 Po akati, “Nkulapa pamaso pa Chala ukuti ntangabomba bunubu, pachifukwa ichakuti chikuba ngati po nkung'wela ibanda ilya bantu babo bakabika ubumi bwabo pachulu.” Pachifukwa ichakuti abantu banaba bakabika ubumi bwabo pachulu pakusemba amizi ghalaghala, po u Devedi atakaghang'wela amizi ghala. Umu momumo abasilikali abajivu aba bakabombela. 20 U Abishayi uwamwabo uwa Yowabu akaba mulongozi uwa bantu 30. Akabaghogha abantu 300 ni mpalala yache, po akaba muntu mumanyikwe nkani ngati bantu batatu bala. 21 Akaba muntu mumanyikwe nkani pakasi pabantu 30 bala, sona akaba mulongozi wabo, loli atakaba mumanyikwe ngati bantu batatu bala. 22 U Benaya umwana uwa Yehoyada uwamu Kabizele akaba musilikali umujivu nkani, yuyo akabomba imbombo inkulu nkani. Akabaghogha abasilikali abamaka babili aba Mowabu, sona akinjila muchiliba pisiku lilyo kukaba kabefu nkani nukughogha inkalamu. 23 Akamughogha sona umu Ijiputi, yuyo akaba mukulu nkani sona mubutali akaba amamita mabili nuhafu. Napapo umu Ijiputi yula akaba ni mpalala munyobe yache yiyo yikaba ngati chikwi ichakulukila amenda, loli u Benaya akalwa nawe pakubombezya intughu. Akamufyula umu Ijiputi yula impalala nukumughogha ni mpalala yache yilayila. 24 Zinizi zikaba mbombo izya Benaya, umwana uwa Yehoyada. Wepe akaba muntu umumanyikwe ngati abantu batatu abamaka bala. 25 U Benaya akaba muntu umumanyikwe nkani ukubachila abantu 30 bala, loli atakamanyikwa ngati bantu batatu bala. Po u Devedi akamubika pakuba we songo uwa basilikali uwa bavighilili bache. 26 Abantu abamaka nkani bala bo aba: U Asaheli uwamwabo uwa Yowabu nu Elihanani umwana uwa Dodo uwamu Betelehemu 27 nu Shamoti umu Haloli nu Helezi umu Peloni 28 nu Ila umwana uwa Ikeshi uwamu Tekowa nu Abiyezeli uwamu Anatoti 29 nu Sibekayi umu Husha nu Ilayi umu Ahohi 30 nu Mahalayi umu Netofa nu Heledi umwana uwa Baana uwamu Netofa 31 nu Itayi umwana uwa Libayi uwamu Gibeya muchisu icha Benjamini. Pakakonkapo sona nu Benaya uwamu Pilatoni 32 nu Hulayi uwa kumakombe agha mu Gashi nu Abiyeli uwamu Alabati 33 nu Azimaveti umu Bahalumi nu Eliyaba uwamu Shaliboni 34 na bana aba Hasemu uwamu Gizoni nu Yonatani umwana uwa Sage umu Halali 35 nu Ahiyamu umwana uwa Sakali umu Halali nu Elifali umwana uwa Uli 36 nu Hefeli umu Mekelati nu Ahiya umu Peloni 37 nu Hezilo uwamu Kalimeli nu Nalayi umwana uwa Ezibayi 38 nu Yoweli uwamwabo uwa Natani nu Mibali umwana uwa Hagili 39 nu Zeleki umu Amoni nu Nahalayi umu Beloti uwakunyamula ivilwilo ivya Yowabu umwana uwa Zeluya 40 nu Ila uwamu Itili nu Galebu uwamu Itili 41 nu Uliya umu Hiti nu Zabadi umwana uwa Alayi 42 nu Adina umwana uwa Shiza uwaluko ulwa Lubeni, umulongozi uwa ba Lubeni sona na bantu 30 babo bakaba poka nawe 43 nu Hanani umwana uwa Maaka, nu Yoshafati uwamu Mitini 44 nu Uziya uwamu Ashitelati nu Shama sona nu Yeyeli abana aba Hotamu uwamu Aloyeli 45 nu Yediyaweli umwana uwa Shimuli, poka nu wamwabo u Yoha uwamu Tizi 46 nu Eliyeli uwamu Mahavi nu Yelibayi nu Yoshaviya abana aba Elinamu nu Itima umu Mowabu 47 nu Eliyeli nu Obedi sona nu Yasiyeli uwamu Mezobayi. |
Lambya Bible © Bible Society of Malawi, 2024.
Bible Society of Malawi