1 Imbili 10 - IBAYIBOLO 2024

Ubufwe ubwa mwene u Sabuli

¹ Pakabalilo kalakala aba Filisiti bakalwa ubwite naba Izilayeli. Aba Izilayeli bala bakabachimbila aba Filisiti sona abinji nkani bakaghoghiwa pighamba ilya Gilibowa.

² Aba Filisiti bala bakamuchimbizya u Sabuli poka na bana bache, po bakamughogha u Yonatani nu Abinadabu sona nu Malikishuwa.

³ Ubwite bula bukaba bwakoghofya nkani umwakuti bakamwavwanila u Sabuli. Bo abantu ababwele bamwagha bakamuvulazya nkani nu tulasilo.

⁴ U Sabuli akamubuzya umulumendo uwakumunyamulila ivilwilo akati, “Weya wee, wesa upanga wako, undase, lumo abantu abasita kusilimuliwa banganseka nukungogha.” Umulumendo yula akanyila nkani, umwakuti akakana pakumulasa. Loli u Sabuli akasenda impalala yache nukwisumbapo.

⁵ Bo umulumendo yula ennya ukuti u Sabuli afuye, wepe akisumbila pa panga wache nukufwila poka nu Sabuli.

⁶ Po u Sabuli na bana bache batatu bakafwila poka na bamunyumba yache.

⁷ Bo aba Izilayeli bosi babo bakaba mwikombe bennya ukuti abasilikali bachimbila sona nukuti u Sabuli poka na bana bache bafuye, bakatuleka utwaya twabo nukuchimbila. Po aba Filisiti bakiza nukwikala mulamula.

⁸ Indabi yache bo aba Filisiti biza pakuyivula amenda imivimba iya bantu babo bakaghoghiwa, bakamwagha u Sabuli poka na bana bache bafuye pighamba ilya Gilibowa.

⁹ Bakamudumula u Sabuli umutu nukumuvula ivilwilo vyache ivya bwite, Po bakatuma intumi muchisu chosi icha ba Filisiti ukuti bafumusye ipangwi ilyiza ili ku bachala babo sona na pakasi pabantu babo.

¹⁰ Bakavibika ivilwilo vyache munyumba iya bachala wabo, sona bakaghupayika umutu wache munyumba iya chala wabo u Dagoni.

¹¹ Bo abantu bosi aba mu Yabeshi Giliyadi bivwa zyosi zizyo aba Filisiti bakamubombela u Sabuli,

¹² abanavuli bosi abajivu nkani bakabuka pakughusenda umuvimba uwa Sabuli poka nimivimba iya bana bache batatu bala, nukwiza nayo ku Yabeshi. Po bakaghasyila amafupa ghabo muntende mwikwi ikulu ilya mupandapanda mu Yabeshi, po bakatuzya pakulya amasiku seveni.

¹³ U Sabuli akafwa pachifukwa ichakuti atakaba musubiliwa kwa Mwene. Atakamwivwilagha u Mwene sona akabuzikizyanga ku mizimu iya bantu abafwe.

¹⁴ Atakalondagha pakubuzikizya kwa Mwene. Po u Mwene akamughogha nukumupa ubumwene u Devedi umwana uwa Yese.