1 Aba Tesalonika 5 - IBAYIBOLO 2024

Mubanje bakwiyannya pakwiza ukwa Mwene

¹ Mwee bakamu bane, chitakulondiwa ukuti imbasimbile nizya tubalilo pamo amasiku, ghagho ivintu vyosi ivi vikwiza pakuboneka.

² Pakuti muzimenye akiza nkani ukuti Isiku ilya Mwene likwiza umwakuchenusya bulo ukuyana namumo umwiba akwizila pabusiku.

³ Bo abantu bakunena ukuti, “Pali umutende, vyosi vili akiza bulo”, panapo ukumongoka kukwiza pakubawila lubilolubilo. Chikwiza pakubachenusya bulo ukuyana nu bubavu bubo umukolo akwivwa pakupapa, po bate bakalyeghe napo panandi.

⁴ Loli bakamu bane, mute muchisi ukuti isiku lila libachenusye bulo ukuyana namumo umwiba akwizila.

⁵ Amwe mwebosi mwe bantu abalukozyo, sona bantu aba musanya. Aswe tute twe bantu aba busiku, pamo bantu aba muchisi, awe.

⁶ Po tutakabanje ngati twe bantu abanji, babo baghonite utulo, loli tubanje maso, sona tutakakolwe.

⁷ Pakuti abantu babo bakughona utulo, bakughona pabusiku, sona abantu babo bakukolwa, bakukolwa pabusiku.

⁸ Loli aswe twe bantu aba musanya, sona tutakakolwanje. Tubaghiye pakuvwala ulwitiko nu lughano pakuba chela ichakuzighila pachifuba, sona nu lusubilo lwitu kumutu pakuba chisote icha bupoki.

⁹ Pakuti u Chala atakatusala ukuti atufunde nu bukali bwache, awe, loli ukuti atupoke ukwendela mwa Mwene witu u Yesu Kilisitu.

¹⁰ Umwene akatufwila aswe umwakuti tubanje nubumi poka nawe, manyi twe bafwe, manyi twe bumi.

¹¹ Polelo mukazannyanje nukwavwana ukuyana namumo mukubombela ilelo.

Ukulayizya ukwabumalilo nukulamuka

¹² Bakamu bitu, tukubalaba ukuti mubachindikaye nkani abantu babo bakubomba imbombo pakasi papinyu, sona na babo u Mwene akabimika ukuti babalongozyanje nukubamanyisya.

¹³ Mubachindikaye nkani nu lughano pachifukwa icha mbombo yiyo bakubomba. Mwikalaye mumutende mwebosi.

¹⁴ Bakamu bitu, tukubalaba ukuti mubasokaye abantu abakata. Abantu babo bali nubogha mubakazyanje. Mubakazyanje nukubavwa babo badedebazu, sona mubanje mwe bafisalyoyo nu muntu wesi.

¹⁵ Mwenelezye ukuti nayumo umuntu akunyosezya ububibi pabubibi, loli akabalilo kosi mubombelanaye ubwiza mwebenebene, sona na bantu bosi.

¹⁶ Mubanje mwe bahobosu akabalilo kosi,

¹⁷ sona mwiputaye akabalilo kosi.

¹⁸ Mubanje bantu bakupalizya muvintu vyosi. Ichi cho chicho u Chala akuchilonda ukuti mubombaye mubumi bwinyu ubwakumamatilana poka nu Kilisitu Yesu.

¹⁹ Mutakazimyanje umoto uwa Muzimu Umuzelu.

²⁰ Mutakaghasulaye amazyu aghabulaghuzi,

²¹ loli muviyelaye ivintu vyosi. Mukakatile ichintu chicho chiza.

²² Muchileghukaye ichintu chosi chicho chibibi.

²³ U Chala umwenecho uwa mutende abapelaye pakuba bazelu muvintu vyosi. Umuzimu winyu ghosi nu moyo winyu ghosi, sona nu mubili winyu ghosi, vitakabanje ni chilema nachimochimo pakwiza ukwa Mwene witu u Yesu Kilisitu.

²⁴ U Chala yuyo akubitizya we musubiliwa, sona akwiza pakuzibomba zyosi zinizi.

²⁵ Bakamu bitu, mutwiputilaye.

²⁶ Mubalamuke abitiki bosi pakulanjizya ulughano lwinyu ulwenecho.

²⁷ Nkubalamula nu bulaghili ubwa Mwene ukuti mubabelengele abitiki bosi ukalata uyu.

²⁸ Ichisa icha Mwene witu u Yesu Kilisitu chibanje namwe.