1 Aba Tesalonika 2 - IBAYIBOLO 2024

Nizya mbombo iya Pabuli mu Tesalonika

¹ Mwee bakamu bane, muzimenye ukuti ubulendo bwitu kukwinyu butakaba bwapabulo.

² Muzimenye namumo tukayimbila nukusamuliwa mu Filipi. Loli pakuti u Chala akatwavwa, tukajimba nkani pakulumbilila Amazyu ghache Amiza, napapo kukabako ukususyiwa ukukulu nkani.

³ Pakuti ukulaba kwitu kutimite pabumyasi, pamo pa nyinong'ono imbibi, pamo pakulonda pakubazimbula abantu, awe.

⁴ Loli tukunena ngati twe bantu babo bitikiziwe nu Chala ukuti balumbilile Amazyu Amiza. Po bo tukulumbilila tutakulonda pakuhobosya abantu, awe, loli pakumuhobosya u Chala, yuyo azimenye inyinong'ono zyitu.

⁵ Muzimenye akiza nkani ukuti tutakiza kukwinyu ni sunga, pamo nu moyo uwakukabilapo, awe. U Chala we kaboni witu!

⁶ Tutakalondagha amapalo agha bantu, pamo aghinyu, pamo agha muntu uyunji bulo.

⁷ Napapo twe batumiwa aba Kilisitu, aswe tukabaghila pakupokela vimo ivintu ukufuma kukwinyu, loli tukaba bololo kukwinyu ukuyana namumo umayi akubasungila abana bache.

⁸ Tukabaghana nkani umwakuti tukahoboka pakugabana namwe, ghate Mazyu Amiza ghene agha Chala, awe, loli nubumi bwitu bulo, pakuti mukaba mwe ba pamoyo ghitu.

⁹ Mwee bakamu bane, naloli mukukumbuka namumo tukiyulila. Tukabomba imbombo umusanya nu busiku, umwakuti tutakabatamye, bo tukulumbilila kukwinyu Amazyu Amiza agha Chala.

¹⁰ Amwe mwe bakaboni bitu, sona nu Chala wepe, we kaboni witu ukuti inkalo yitu kukwinyu mwe bitiki yikaba nzelu, yikaba ngolosu, sona yitakaba ni chilema nachimochimo.

¹¹ Pakuti muzimenye ukuti tukamusunga akiza umuntu wesi uwa amwe ukuyana bulo namumo uwise akasungila abana bache.

¹² Tukabakazya umoyo nukubapumizya, sona tukendelela pakubalaba ukuti mwikalaye nubumi ubwa kumuhobosya u Chala, yuyo akubitizya amwe ukuti mugabane nawe Ubumwene, sona nu buchindamu bwache.

¹³ Chilipo sona ichifukwa ichinji chicho tukwendelela pakumupalizya u Chala. Bo mwapokela amazyu ghache ghagho mukivwa kukwitu, mutakaghitika ngati gho mazyu agha bantu, loli mukaghitika ukuyana namumo ghabeleye bulo, amazyu agha Chala. Amazyu ghanagha ghali pambombo mumwinyu amwe mwe mukusubila.

¹⁴ Mwee bakamu bane, zizyo zikabawila amwe zyo zizyo zikawila ivipanga ivya Chala ivya mu Yudeya, babo bantu aba Kilisitu u Yesu. Abantu aba muchisu chinyu bakabayivya nkani ukuyana namumo aba Yuda bakabayivizya abakilisitu aba mu Yudeya.

¹⁵ Aba Yuda balabala bakamughogha u Mwene u Yesu, poka na balaghuzi, sona nukutuvwima aswe. Abene batakumuhobosya u Chala, sona balwani aba bantu bosi.

¹⁶ Bakayezya pakutuzigha ukuti tuleke pakulumbilila amazyu pakasi pabantu babo bate ba Yuda umwakuti bangapokiwa. Bunubu akabalilo kosi biyonjelezyanga bulo imbibi zyabo, umwakuti ubukali ubwa Chala bwabawila.

U Pabuli akulonda sona pakubendela Aba Tesalonika

¹⁷ Mwee bakamu bane, bo twalekana namwe pakabalilo akapimpa bulo, te mo munyinong'ono awe, loli mumubili wene nukuba ngati twe balanda, tukabasamba nkani, sona tukayezya nkani ukuti twenannye amaso na amaso.

¹⁸ Cho chifukwa tukalondagha ukwiza sona kukwinyu. Nkaninkani ane ne Pabuli nkayezyayezya akinji bulo, loli u Satana akatuzigha izila.

¹⁹ Pakuti nayumo umuntu, loli mwemwe mwebene, babo bakwiza pakuba lusubilo lwitu nu buhobosu bwitu, sona ni mpumpu yitu iyakulanjizya ubupoti bwitu pamaso pa Mwene witu u Yesu, bo akwiza sona.

²⁰ Naloli, amwe mwe buchindamu bwitu, sona mwe buhobosu bwitu.