1 Aba Tesalonika 1 - IBAYIBOLO 2024

¹ Ane ne Pabuli, poka nu Silivana, sona nu Timoti. Tukuchisimbila ichipanga icha mu Tesalonika, chicho icha Chala u Tata, sona nu Mwene u Yesu Kilisitu. Ichisa nu mutende vibanje namwe.

Nizya bumi nu lwitiko ulwa ba Tesalonika

² Tukumupalizya u Chala akabalilo kosi pachifukwa icha mwemwe mwebosi, sona bo tukwiputa tukubatambula munyiputo zyitu.

³ Pakuti bwila bulo tukukumbuka pamaso pa Chala nu Tata witu, nizya lwitiko lwinyu, mumo mukiyulila ukulanjizya ulughano lwinyu, sona namumo ulusubilo lwinyu lwimiye nkani mwa Mwene witu u Yesu Kilisitu.

⁴ Bakamu bitu, tuzimenye ukuti u Chala abaghanite, abasalite pakuba bantu abache na bache.

⁵ Pakuti Amazyu Amiza ghagho tukiza nagho kukwinyu, ghatakaba mazyu ghene awe, loli na maka, sona nu Muzimu Umuzelu nu bwanaloli ubwakufikapo. Muzimenye namumo tukikalilagha, bo tuli poka namwe. Tukabombagha bunubu ukuti tubavwe.

⁶ Amwe mukeghelela kukwitu poka nu Mwene. Napapo mukayimba nkani, amwe mukapokela amazyu nu buhobosu ubwa Muzimu Umuzelu.

⁷ Po mukaba chifwanikizyo icha bitiki bosi mu Makedoniya, sona na mu Akaya bulo.

⁸ Naloli ukwandila mumwinyu amazyu agha Mwene ghakasata mu Makedoniya, na mu Akaya bulo, sona ipangwi nizya lwitiko lwinyu mwa Chala likasata posi na posi. Polelo chitalipo nachimochimo chicho tunganenapo.

⁹ Pakuti abene bakunena nizya mumo mukatupokelela akiza, sona namumo mukavileghukila ivifwani nukumubombela u Chala umumi, sona nu wanaloli.

¹⁰ Po mukulindilila ukwiza ukwa Mwana wache u Yesu ukufuma kumwanya, yuyo akamuzyusya kubufwe, sona yuyo akatupoka ku bukali ubwa Chala bubo bukwiza.