1 Aba Kolinti 9 - IBAYIBOLO 2024

Ubusatuke ni mbombo izya mutumiwa

¹ Nkimba ane inte ne musatuke? Fwandi, ane inte ne mutumiwa? Nkimba intamwenizyepo u Yesu, u Mwene witu? Nkimba amwe mute mwe seke izya mbombo yiyo nkamubombela u Mwene?

² Napapo abantu abanji bakwinong'ona ukuti inte ne mutumiwa, loli amwe muzimenye ukuti ne mutumiwa naloli, pakuti amwe mwe chisimikizyo chane ichakuti ane ne mutumiwa naloli.

³ Bo abantu bakundalusyandalusya nkwiyimila nemwene ulu:

⁴ Nkimba aswe tute nu busatuke ubwakupokela ivyakulya ni vyakung'wela?

⁵ Nkimba aswe tute nu busatuke ubwakubomba vivyo bakubomba abatumiwa abanji, sona na bakamu aba Mwene, sona nu Pitala, pakulongozannya nu muchi uwa Chikilisitu pabulendo bwitu?

⁶ Nkimba nene ne mwene nu Balanabasi twe tubaghiye pakubomba imbombo ukuti twilondele twebene vivyo tukusobelwa?

⁷ Nkimba musilikali wenu yuyo akwilipilila mwene? Nkimba mulimi wenu uwa mampesya yuyo atakulyapo amampesya ghache? Nkimba mudimi wenu yuyo atakung'welapo ulukama ulwa ng'ozi zizyo akudima?

⁸ Nkimba nkunena zinizi na mahala agha buntu bulo? Nkimba Indaghilo zyope zitakunena ivintu vyoka?

⁹ Pakuti zisimbiwe mu Ndaghilo izya Mozesi ukuti, “Mutakayipinyaye ing'ombe kumulomo, bo yikukoma amalezi.” Nkimba kokuti u Chala akwinong'onela ni nkambaku bulo?

¹⁰ Naloli akanena zinizi pachifukwa icha sweswe, buli, mute momumo? Izi zikasimbiwa pachifukwa icha sweswe, umwakuti yuyo akulima, sona na wepe yuyo akukoma, babombe nu lusubilo ulwakuti bakwiza pakupokela ichigaba icha nyinulo yilayila.

¹¹ Nanti aswe tukapesa imbeyu iya buzimu mumwinyu, po choni chicho chipala ukuti aswe tupotwe pakupokela ivyakusobelwa vyitu kukwinyu?

¹² Nanti abanji bali nu busatuke ubwakupokela vinivi kukwinyu, po nkimba aswe tutangapokela ukuchilapo? Aswe tutakabombezya ubusatuke bwitu, awe. Loli tukafisa ilyoyo muvintu vyosi, umwakuti kutakabeko nachimo ichakukanizya Amazyu Amiza agha Kilisitu.

¹³ Nkimba mutazimenye ukuti abantu babo bakubomba mu Nyumba iya Chala bakulya ivya mu Nyumba iya Chala, sona nukuti babo bakubika ivyabupi pachighemo bakupokela pa vyakwiyipa vilavila?

¹⁴ Umwakuyana bulo, u Mwene akalamula ukuti abantu babo bakulumbilila Amazyu Amiza bapokelaye ubwavwilizi bwabo mu bulumbilili bulabula.

¹⁵ Loli ane intabubombeyepo nalumolumo ubusatuke bunubu napo panandi, awe, pamo intakusimba ukalata uyu ilelo nu lusubilo ulwakuti mukwiza pakumbombela ivintu vinivi. Pakuti chingaba chizapo ukuti ane imfwe nukuchila ukuti umuntu anfyule ichintu chicho nkwituvikizyamo.

¹⁶ Loli bo nkulumbilila Amazyu Amiza, intakwituvikizyamo pakuti u Mwene akandamula pakubomba bunubu. Chighune kukwane nanti intakulumbilila Amazyu Amiza.

¹⁷ Pakuti nanti nkabombagha imbombo iyi nu bwighane ubwane nu bwane, po ngali napokela umuvwalo, loli nkubomba bulo imbombo yiyo u Chala akampa.

¹⁸ Po nkimba umuvwalo wane gho ghoni? Umuvwalo wane wakuti indumbililaye Amazyu agha Chala ukusita kulipiliwa kamo, pamo ukubombezya ubusatuke bwane ubwakupokela pachifukwa icha kulumbilila Amazyu Amiza.

¹⁹ Ane ne musatuke, sona inte ne muzya uwa muntu yumo, awe. Loli nkipela nemwene pakuba muzya uwa bantu bosi, umwakuti nkabepo abantu abinji.

²⁰ Bo nkubomba naba Yuda nkaba ngati ne mu Yuda, umwakuti nkabepo aba Yuda balabala. Bo nkubomba na bantu babo bakaba pasi pa Ndaghilo izya Mozesi, nkaba ngati ne yumo uwa pasi pa Ndaghilo, umwakuti nkabepo abantu babo bali pasi pa Ndaghilo izya Mozesi, napapo ane inte pasi pa Ndaghilo zilazila.

²¹ Bo nkubomba na bantu babo bate ba Yuda, nkaba ngati ne yumo uwa babo, umwakuti nkabepo abantu balabala, napapo inte ne musatuke ku Ndaghilo izya Chala, awe, loli indi pasi pa ndaghilo izya Kilisitu.

²² Bo nkubomba na bantu abadedebazu nkaba ngati ne muntu umudedebazu, umwakuti nkabepo abantu balabala. Bo indi poka na bantu bosi nkaba ngati bo babo, umwakuti nanti zingabombiwa impokepo abantu bamo mumwabo.

²³ Nkubomba zyosi zinizi pachifukwa icha Mazyu Amiza, umwakuti nane bulo impokele nabo ulusayo ulwa Mazyu Amiza.

²⁴ Nkimba mutazimenye ukuti pakupotana abantu abinji bakuchimbila, loli umuntu weka bulo weyuyo akupokela umuvwalo? Po, ukuchimbila kwinyu kubanje kwakuti mupokele nako umuvwalo.

²⁵ Umuntu wesi yuyo ali panyangalo iyakuchimbila, akwikanizya muvintu vyosi, umwakuti apokele inkata iya maluba yiyo yikufoka, loli aswe tukulonda pakupokela inkata yiyo yitakufokapo nalumo.

²⁶ Ichi cho chifukwa intakuchimbila ngati ne muntu yuyo akuchimbila mwalwemwalwe bulo, ane intakuyana nu wankonya yuyo akubwindabwinda bulo.

²⁷ Loli nkughufunda nukughukazya umubili wane ni nkonya nukughupela pakuba muzya, umwakuti bo nalumbilila Amazyu Amiza pakasi pabantu banji, ane nemwene, intakapotwe pakupokela umuvwalo.