1 Aba Kolinti 7 - IBAYIBOLO 2024

Nizya sendwa

¹ Ilelo imbamule ukuyana ni fundo yiyo mukansimbila mwakalata winyu iyakuti: Umwanavuli akubomba akiza nkani nanti atakusenda.

² Loli pachifukwa ichakuti ubwamalaya bwabala nkani, umwanavuli wesi abanje nu muchi uwache nu wache, sona umukolo wesi abanje nu mulume uwache nu wache.

³ Umulume amupanje umuchi chicho chikulondiwa. Umwakuyana bulo, wepe umuchi amupanje umulume chicho chikulondiwa.

⁴ Pakuti umubili uwa mukolo ghute wache nu wache, loli wa mulume wache. Umwakuyana bulo, ghope umubili uwa mwanavuli ghute wache nu wache, loli wa muchi wache.

⁵ Mutakakananaye, loli pene papo nanti mwivwana tasi pakupaghula akabalilo akakwiputila poka. Pisinda pache mungakomana sona ukuti u Satana atakabayele pachifukwa icha ukusita kwilema kwinyu.

⁶ Nkunena ichi pakubitikizya bulo, loli intakunena ukuyana nu lulaghilo, awe.

⁷ Nalondagha ukuti abantu bosi babanje ngati mumo imbeleye. Loli umuntu wesi ali ni chabupi chache chicho u Chala akamupa, weka ichi, sona uyunji ichinji.

⁸ Amazyu ghagho nkulonda pakubabuzya abakenja, sona na bakolo abafwilwe gho agha: Chingaba chizapo ukuti bendelele pakwikala ngati mumo imbeleye.

⁹ Loli nanti bakupotwa pakwilema, basendaye bulo, pakuti chizapo pakusenda nukuchila ukutamiwa ni vinyonywa.

¹⁰ Abantu babo basendanite nkubapa ilamulo ili: Umuchi atakasoke ku mulume wache. Inte nene nkunena zinizi, loli we Mwene.

¹¹ Loli nanti akusoka atakasendiwanje sona, pamo asayane nu mulume wache. Wepe umulume atakamusosye umuchi, awe.

¹² Abantu abanji nkubabuzya amazyu agha: Nanti umukilisitu asendite umukolo yuyo ate mukilisitu, sona wepe akwitika ukwikala nawe, umulume yula atakamusosye, awe. Nene nkunena, ate we Mwene, awe.

¹³ Sona nanti umukolo umukilisitu asendiwe nu mwanavuli yuyo ate mukilisitu, sona wepe akwitika ukwikala nawe, umuchi yula atakasoke ku mulume wache, awe.

¹⁴ Pakuti umwanavuli yuyo ate mukilisitu akupalamila kwa Chala ukwendela mu muchi wache. Umwakuyana bulo, wepe umukolo yuyo ate mukilisitu akupalamila kwa Chala ukwendela mu mulume wache. Nanti zitakabanga bunubu, po ngali abana binyu bakuzi, loli ukuyana namumo zibeleye, naloli bakupalamila kwa Chala.

¹⁵ Loli nanti umuntu yuyo ate mukilisitu akulonda pakumuleka umukilisitu, mumuleke abombe bunubu. Po nanti zili bunubu, umukilisitu manyi mwanavuli, manyi mukolo musatuke pakubomba bunubu. U Chala yuyo akabitizya amwe akulonda ukuti mwikale mumutende.

¹⁶ Awe we mukolo umukilisitu, nkimba ungazimanya bulibuli ukuti pamo ukwiza pakumupoka umulume wako umukilisitu? Pamo awe we mwanavuli umukilisitu, nkimba ungazimanya bulibuli ukuti pamo ukwiza pakumupoka umuchi wako?

Mwikalaye ukuyana namumo u Chala akabitizizya

¹⁷ Umuntu wesi endelele pakuba nubumi bubo akaba nabo, bo u Chala akumwitizya. Ulu lo lulaghilo lulo nkumanyisya muvipanga vyosi.

¹⁸ Nanti umuntu akitiziwa nu Chala bo asilimuliwa, atakatamiwanje nukufisa amabala aghakusilimuliwa. Umwakuyana bulo, nanti umuntu akitiziwa nu Chala bo atasilimuliwe, atakasilimuliwepo nalumo.

¹⁹ Pakuti ukusilimuliwa pamo ukusita ukusilimuliwa kute ni mbombo nayimoyimo. Ichapamwanya nkani ko kukonka amalamulo agha Chala.

²⁰ Umuntu wesi endelele bulo pakuba mumo u Chala akamwitizizya.

²¹ Nkimba ukaba muzya, bo u Chala akukwitizya? Ichi chitakakutamyanje. Loli nanti ungalwagha ulusako ulwakubila musatuke, ulubombezye ulusako lulalula.

²² Pakuti umuntu yuyo akaba muzya bo akwitiziwa nu Mwene, we musatuke uwa Mwene. Umwakuyana bulo, umuntu yuyo akaba musatuke bo akwitiziwa nu Kilisitu, we muzya uwa Kilisitu.

²³ U Chala akabaghula nu mutengo uwapamwanya, po mutakabanje bazya aba bantu.

²⁴ Mwee bakamu bane, umuntu wesi endelele pakwikala pamaso pa Chala ukuyana namumo akabela, bo u Chala akumwitizya.

Nizya balindu, sona na bakolo abafwilwe

²⁵ Pakunena nizya balindu babo batasendiwepo, ane inte ni lamulo nalimolimo ilyakufuma kwa Mwene, loli nkubapa inyinong'ono zyane pachifukwa ichakuti u Mwene akampelela ichisa ukuti imbanje ne muntu musubiliwa.

²⁶ Pachifukwa icha ntamyo izya kabalilo aka, chizapo ukuti umuntu endelele bulo pakuba mumo abeleye.

²⁷ Nkimba usendite? Po utakayezyanje pakumusosya. Nkimba we mukenja? Po utakasendaye.

²⁸ Loli nanti ukusenda, utakunanga, awe. Sona nanti umulindu akusendiwa, atakunanga, awe. Loli abantu babo basendanite bakwiza pakukomana nintamyo muchisu ichapasi, po nkulonda pakubapoka bulo muntamyo izya isiku ni siku zila.

²⁹ Mwee bakamu bane, chicho nkubabuzya cho ichi: Akabalilo kasyete kapimpa. Ukwanda akabalilo aka, abantu babo basendite batakikolezannyanje nizya sendwa zyene.

³⁰ Abantu babo bakulila babanje ngati po batakulila, babo bahobokite babanje ngati po batahobokite. Abantu babo bakughula babanje ngati po ivintu vivyo bakughula vite vyabo.

³¹ Sona abantu babo bikolezannya nivya muchisu ichapasi babanje ngati po batikolezanizye navyo. Pakuti ichisu ichapasi ukuyana namumo chibeleye ilelo, weya, chikumala.

³² Nalondagha ukuti chitakabepo nachimo ichakunyazya umoyo winyu. Umwanavuli yuyo atasendite akwikolezannya nizya mbombo iya Mwene, ukwinong'ona bulo namumo angamuhobosekezya u Mwene.

³³ Loli umwanavuli yuyo asendite akwikolezannya nivya muchisu ichapasi, ukwinong'ona bulo namumo angamuhobosekezya umuchi,

³⁴ po sona akuwesiwa kubili. Umukolo yuyo atasendiwe pamo umulindu yuyo atamumenye nalumo umwanavuli akwikolezannya ni mbombo iya Mwene, ukwinong'ona bulo namumo angaghupaghulila umubili wache poka nu muzimu kwa Mwene. Loli umukolo yuyo asendiwe akwikolezannya nivya muchisu ichapasi pakuti akulonda pakumuhobosya umulume.

³⁵ Nkunena zinizi pakuti nkulonda pakubavwa. Intakuyezya pakubakanizya, awe. Nkulonda ukuti mubombaye ingolosu, sona na zizyo zibabaghiliye, sona nukuti mwiyulaye pakumubombela u Mwene.

³⁶ Loli nanti uwise akwinong'ona ukuti akumunangila umulindu yuyo azingililiwe, sona nanti ikala akabalilo akatali mu bulindu bwache, sona umwanavuli akulonda ukuti amusende, po amwitikizye ukuti asendiwe ukuyana namumo akulondela. Pakubomba bunubu atakunanga.

³⁷ Loli nanti umuntu asimikizya mumoyo wache ukusita kufyengiwa bulo, ukuti atakamusende umulindu yula, wepe abomba akiza.

³⁸ Po umwanavuli yuyo akumusenda, akubomba chiza, loli yuyo atakumusenda, wepe bulo abomba akiza nkani.

³⁹ Umukolo apinyiwe akabalilo kosi kako umulume mumi, loli nanti umulume wache afwa, po musatuke pakusendiwa nu mwanavuli wesi yuyo akumulonda, loli pene papo nanti umwanavuli mukilisitu.

⁴⁰ Loli ukuyana ni nyinong'ono zyane, umukolo yula akwiza pakuhoboka nkani nanti akwendelela bulo pakwikala mumo abeleye. Nkwinong'ona sona ukuti nane bulo indi nu Muzimu uwa Chala.