1 Aba Kolinti 6 - IBAYIBOLO 2024

Nizya nongwa mu bakilisitu

¹ Nanti yumo mumwinyu ali ninongwa nu mukilisitu uyunji, nkimba angajimba bulibuli pakubuka ninongwa yilayila ku balongi babo batamumenye u Chala, mubuzilo ubwakubuka nayo ku bantu abazelu aba Chala?

² Nkimba mutazimenye ukuti abantu abazelu aba Chala bakwiza pakubalonga abantu aba muchisu ichapasi? Po nanti amwe mukwiza pakubalonga abantu aba muchisu ichapasi, fwandi, mutangalonga utunongwa utunanditunandi?

³ Nkimba mutazimenye ukuti tukwiza pakubalonga na bantumi aba kumwanya? Po tungapotwa bulibuli pakulonga inongwa izya isiku ni siku?

⁴ Nanti muli ninongwa izya bunubu, choni chicho mukubuka nazyo ku bantu babo batakubelengiwa ni chipanga?

⁵ Nkunena zinizi ukuti imbakozye isoni. Nkimba kokuti atalimo nayumo umuntu mumwinyu, yuyo ali na mahala aghakuti angalonga inongwa izya bunubu pakasi pa mukilisitu nu mukilisitu uyunji?

⁶ Loli umwitiki akumusitaka umwitiki uwamwabo, ukwitikizya ukuti inongwa yila yilongiwe na bantu babo bate bitiki!

⁷ Ukulongana ukwa nongwa kuko kuli mumwinyu kukulanjizya pabuzelu ukuti mwapotwa zila. Nkimba choni chicho mutakufisa ilyoyo nanti bamo bakubanangila? Nkimba choni chicho mutakubitikizya abantu ukuti babibile?

⁸ Loli mukunangilana mwebene, sona mukufyulana mwebenebene ivintu vyinyu, po vinivi mukubabombela na bakilisitu abamwinyu bulo.

⁹ Naloli muzimenye ukuti abantu ababibi batakwiza pakupyana Ubumwene ubwa Chala. Mutakizimbulaye mwebene pakuti abamalaya, pamo abantu babo bakwiputa ivifwani, pamo abalowe, pamo abanavuli na bakolo babo bakughonana benebene,

¹⁰ pamo abiba, pamo abapafu, pamo abaching'wela, pamo abantu abiyebo, pamo amavyondongo batakwiza pakupyana Ubumwene ubwa Chala.

¹¹ Umu momumo bamo mumwinyu mukabela, loli mukaswefiwa nukupaghuliwa, sona mwaneniwa ukuti mute ninongwa nayimoyimo pamaso pa Chala mwitabwa ilya Mwene u Yesu Kilisitu, sona nukwendela mu Muzimu uwa Chala witu.

Amabili ghitu ghabanje ghakumuchindikila u Chala

¹² Umuntu yumo akwiza pakunena ukuti, “Ane ne musatuke pakubomba vyosi bulo.” Eee, momumo, loli vyosi vitakubapa ubwiza. Ninganena ukuti ane ne musatuke pakubomba vyosi bulo, loli ntakwiza pakwitikizya nachimo ukuti chimpele pakuba muzya wache.

¹³ Umuntu uyunji akwiza pakunena ukuti, “Ichakulya chikapeliwa ukuti chinjilaye mulwanda, lope ulwanda lukapeliwa ukuti lupokelaye ichakulya.” Eee, momumo, loli u Chala akwiza pakuvinangannya vyosi vibili. Umubili ghute wakubombela ubwamalaya awe, loli wakumubombela u Mwene. Po u Mwene wemwenecho uwa mubili.

¹⁴ U Chala akamuzyusya u Mwene kubufwe, po naswe bulo akwiza pakutuzyusya kubufwe na maka ghache.

¹⁵ Nkimba mutazimenye ukuti amabili ghinyu vyo vigaba ivya mubili uwa Kilisitu? Fwandi, ningasenda bulibuli ichigaba chimo icha mubili uwa Kilisitu nukuchimamatizya poka nu mubili uwa mukolo umalaya? Zitangabombiwa napo panandi!

¹⁶ Pamo mutazimenye ukuti umuntu yuyo akwipatinkannya mwene nu mukolo umalaya, yuyo nu mukolo bakwipela bene pakuba mubili ghoka? Amasimbo ghakunena pabuzelu ghakuti, “Babili banaba bakwiza pakuba mubili ghoka.”

¹⁷ Loli umuntu yuyo akwimamatizya mwene kwa Mwene, akwiza pakuba poka nu Mwene mubuzimu.

¹⁸ Mubuleghuke ubwamalaya. Imbibi izinji zyosi zizyo umuntu akubomba zitakupalamasya umubili wache, loli nanti umuntu akubomba ubwamalaya akughunangila umubili wache.

¹⁹ Nkimba mutazimenye ukuti umubili winyu yo nyumba iya Muzimu Umuzelu, yuyo akwikala mumwinyu, sona yuyo mukapokela ukufuma kwa Chala? Ichi cho chifukwa ubumi bubo muli nabo, bute bwinyu mwebene, awe.

²⁰ Pakuti amwe mughuliwe nu mutengo uwapamwanya nkani. Po mumuchindikaye u Chala na mabili ghinyu.