1 Aba Kolinti 4 - IBAYIBOLO 2024

Nizya mbombo iya batumiwa ba Kilisitu

¹ Amwe mutupimaye ngati twe bambombo ba Kilisitu, sona abakapitawa abakulingannya ivintu ivyakubusyefu ivya Chala.

² Po ichintu chicho chikulondiwa na bakapitawa banaba, chakuti babanje basubiliwa.

³ Kukwane chintu chipepe nkani nanti nkulongiwa namwe, pamo nkulongiwa na balongi aba muchisu ichapasi. Ane intakwilonga nemwene, awe.

⁴ Pakuti umabyebye wane atakunsusyapo, loli ichi chitakusimikizya ukuti ane inte ninongwa nayimoyimo, awe. Uwakundonga ane, we Mwene mpela.

⁵ Polelo mutakamulongaye nayumo umuntu, bo na kabalilo akiza katafikite. Mulindililaye mupaka u Mwene ize. Umwene akwiza pakuvumbula pabuzelu ivintu vivyo vifisiwe muchisi. Akwiza pakuvumbula sona inyinong'ono izya bantu. Pakabalilo kalakala umuntu wesi akwiza pakupokela amapalo agha Chala.

⁶ Mwee bakamu bane, nanena zyosi zinizi ukulingannya nizya ane nu Apolo, umwakuti mungamanyila chicho Amasimbo ghakung'anamula ghagho ghakuti, “Mutakachilaye pa zizyo Amasimbo ghakunena.” Po mutakwiza pakwituvya pachifukwa icha muntu weka nukumusula umuntu uyunji.

⁷ Nkimba wewenu akakupela pakuba wapamwanya ukuchila na bamwinyu? Nkimba u Chala atakakupa vyosi vivyo uli navyo? Polelo ungituvya bulibuli, ngati po ivintu vivyo uli navyo vitakaba chabupi?

⁸ Kokuti muli navyo kale vivyo mukuvilonda! Kokuti mwaba kale mwe bakabi! Kokuti mwipela mwebene pakuba bamwene, napapo aswe tute twe bamwene! Nalondagha nkani ukuti ngali mukaba mwe bamwene, umwakuti tungaba bamwene poka namwe.

⁹ Pakuti ane nkwennya ukuti u Chala atubikite aswe twe batumiwa pabuzilo ubwa bumalilo nkani, tuyanite bulo na bantu babo kwadumuliwa ukuti baghoghiwe bulo pabuzelu. Pakuti twaba twe kantu akalwangalo aka bantu aba muchisu chosi ichapasi, sona naka bantumi aba Chala.

¹⁰ Aswe twe bapunganu pachifukwa icha Kilisitu, loli amwe mwe bamahala mwa Kilisitu. Aswe twe badedebazu, loli amwe mwe bamaka. Amwe muchindikiwe, loli aswe tusuliwe.

¹¹ Ukufika nilelo tuli nizala, sona ni nyota. Aswe tuvwalite ivisepe. Abantu bakutukoma, sona tukwendakwenda bulo.

¹² Tukwiyula nkani pakubomba imbombo ni nyobe zyitu. Bo tukughuniwa, aswe tukusaya, bo tukuvwimiwa, aswe tukufisa ilyoyo,

¹³ bo tukusamuliwa, aswe tukwamula na mazyu amiza. Mupaka nilelo bulo, tukupimiwa pakuba twe vinyazu ivya muchisu ichapasi, sona ngati twe mintu iya muchisu ichapasi.

¹⁴ Ane intakusimba zinizi ukuti imbakozye amwe isoni awe, loli ukuti imbamanyisye pakuti mwe bana abane na bane abaghaniwa.

¹⁵ Napapo mungaba na bamanyisi 10,000 mubumi bwinyu ubwa Chikilisitu, loli mute na baghuso abinji. Pakuti pakumamatilana poka nu Kilisitu u Yesu nipela nemwene pakuba ne ghuso pakulumbilila Amazyu Amiza.

¹⁶ Polelo ane nkubalambilizya ukuti mweghelelaye zizyo nkubomba.

¹⁷ Pachifukwa chinichi, nkubatumila u Timoti, yuyo mwana wane umughaniwa. Umwene we musubiliwa mwa Mwene. Akwiza pakubakumbusya nizya bumi bwane mwa Kilisitu u Yesu, bubo nkumanyisya kosi na kosi muvipanga vyosi.

¹⁸ Bamo mumwinyu bakwitutumula pachifukwa ichakuti bakwinong'ona ukuti ntakwizako kukwinyu.

¹⁹ Loli nkwiza kukwinyu lunulu bulo nanti u Mwene itika. Po nkwiza pakughamanya nemwene amaka ghagho abantu abakwitutumula banaba bali nagho, vite vyene vivyo bakuvinena, awe.

²⁰ Pakuti Ubumwene ubwa Chala bute mumazyu, loli mumaka.

²¹ Mukulonda ichoni? Nkimba mukulonda ukuti nize kukwinyu ni ndisa, pamo nize nu moyo uwa lughano, sona nu moyo umololo?