1 Aba Kolinti 3 - IBAYIBOLO 2024

Ababombi aba Chala

¹ Mwee bakamu bane, ane intakanena namwe ukuyana namumo ninganenela na bantu babo bali nu Muzimu Umuzelu, loli nkanenagha namwe ngati po mwe bantu aba muchisu ichapasi, ngati bo babonda mubumi ubwa Chikilisitu.

² Ane nkabang'wesya ulukama, ukusita ukubapa ichakulya ichikafu, awe, pachifukwa ichakuti mutakiyannya pakuchilya. Po mupaka nilelo bulo mutiyanizye pakuchilya.

³ Muchili mwe bantu aba muchisu ichapasi, pakuti nanti pakasi papinyu pali akabini sona nukudalinkana, nkimba zinizi zitakusimikizya ukuti amwe mwe bantu ba muchisu ichapasi, babo bakukonka ivintu ivya muchisu ichapasi?

⁴ Nanti yumo akuti, “Ane indikulubazu ulwa Pabuli.” Uyunji akuti, “Ane indikulubazu ulwa Apolo.” Nkimba panapa mutakubomba vivyo abantu aba muchisu ichapasi bakubomba?

⁵ Nkimba u Pabuli wepe wewenu? Fwandi, u Apolo wepe wewenu? Aswe twe babombi bulo aba Chala, babo bakabalanjizya izila ukuti musubile. U Mwene akamupa umuntu weka na weka imbombo yache.

⁶ Ane nkabyala imbeyu, wepe u Apolo akasembelela amizi, loli akaba we Chala yuyo akayimezya imbeyu yila.

⁷ Polelo yuyo akabyala, sona na yuyo akasembelela amizi ate ni mbombo, loli u Chala mwene, yuyo akumezya, weyuyo ali ni mbombo.

⁸ Po yuyo akubyala, sona na yuyo akusembelela amizi bayanite bulo, pakuti u Chala akwiza pakumupa umuntu wesi umuvwalo ukuyana ni mbombo zyache.

⁹ Pakuti aswe tukubombela poka imbombo iya Chala, amwe mwe mughunda uwa Chala, sona mwe Nyumba iya Chala.

¹⁰ Ukuyana ni chabupi chicho u Chala akampa, ane nkala ulwalo ngati ne muzengi uwamahala nkani, sona uyunji akuzenga palwalo lulalula. Loli umuntu wesi achebaye nkani namumo akuzengela.

¹¹ Pakuti u Chala amubikite kale u Yesu Kilisitu pakuba lwalo loka mpela, sona lutalipo ulwalo ulunji lulo lungaliwa.

¹² Nanti umuntu akuzenga palwalo ulu pakubombezya ugolide, pamo usiliva pamo utumabwe utwamutengo, pamo amakwi, pamo isote pamo amapembezannya,

¹³ imbombo izya muntu wesi zikwiza pakubonekela bulo pabuzelu, bo isiku ilya Kilisitu likwiza pakuzilanjizya pabuzelu. Pakuti pisiku lilalila umoto ghukwiza pakuzivumbula imbombo izya muntu wesi. Po umoto ghulaghula ghukwiza pakuziyela imbombo izya muntu wesi.

¹⁴ Nanti imbombo yiyo umuntu azenga palwalo yapona umoto, umuntu yula akwiza pakupokela umuvwalo.

¹⁵ Loli nanti yapya numoto, umuntu yula atakwiza pakupokela umuvwalo. Umwene akwiza pakupona, loli ngati we muntu yuyo apona umoto.

¹⁶ Nkimba mutazimenye ukuti amwe mwe Nyumba iya Chala, sona nukuti u Muzimu uwa Chala akwikala mumwinyu?

¹⁷ Po nanti umuntu akunangannya Inyumba iya Chala, wepe u Chala akwiza pakumunangannya. Pakuti Inyumba iya Chala zelu, sona mwenemwe mwe nyumba yache.

¹⁸ Mutakizimbulaye mwebene. Nanti yumo akwipima mwene ukuti wamahala ukuyana na mahala agha muchisu ichapasi, umwene muleke abanje muntu umupunganu, umwakuti abanje muntu wamahala naloli.

¹⁹ Pakuti amahala agha bantu aba muchisu ichapasi, bo bupunganu pamaso pa Chala. Pakuti Amasimbo ghakuti, “U chala akubategha abamahala mubuchevu bwabo.”

²⁰ Aghanji ghakunena sona ukuti, “U Mwene azimenye inyinong'ono izya bantu abamahala ukuti zite ni mbombo.”

²¹ Polelo patakabepo umuntu uwakwituvya pavintu vivyo abantu bangabomba, pakuti ivintu vyosi vyinyu,

²² manyi we Pabuli, pamo u Apolo, manyi we Pitala, pamo ichisu ichapasi, manyi bumi, pamo ivintu vivyo vilipo ilelo, manyi vintu vivyo vikwiza muntazi—ivintu vyosi ivi vyinyu,

²³ po amwe mwe bantu ba Kilisitu, sona u Kilisitu wa Chala.