1 Aba Kolinti 2 - IBAYIBOLO 2024

Nizya Kilisitu yuyo akakomeliwa pachipinjika

¹ Mwee bakamu bane, bo niza kukwinyu, intakabombezyapo amazyu amakafu pamo aghabumanyi pakulumbilila nizya bwanaloli ubwa Chala bubo bufisiwe.

² Pakuti bo indinamwe, nkadumula pakuluvya ivintu vyosi, loli mwene u Yesu Kilisitu, sona nkaninkani ubufwe bwache ubwa pachipinjika.

³ Po nkiza kukwinyu nu budedebazu, nubogha, sona nukutetema nkani.

⁴ Amazyu ghane sona nu bulumbilili bwane intakavinena na mazyu aghamahala na ghakudeba, loli nu lusimikizyo ulwa maka agha Muzimu uwa Chala,

⁵ umwakuti ulwitiko lwinyu lutakime mumahala agha buntu, awe, loli mumaka agha Chala.

Amahala agha Chala

⁶ Loli tukunena amazyu aghamahala na bantu babo bamaka mubuzimu, napapo amahala agha ghate mahala agha masiku agha, pamo agha balaghili aba muchisu ichapasi, babo amaka ghabo ghakumala.

⁷ Loli amahala ghagho tukughanena gho mahala agha Chala, ghagho abantu batangaghennya. U Chala akaghasala kale, bo achili nukupela ichisu ichapasi ukuti ghatupe ubuchindamu.

⁸ Abalaghili aba muchisu ichapasi batakazimanya zinizi. Nanti bakazimanyagha ngali batakamukomela u Mwene uwa buchindamu pachipinjika.

⁹ Loli ukuyana na Masimbo aghakuti, “Chicho ilyiso litachenizyepo, pamo chicho ni kutu litachivuyepo pamo chicho umoyo uwa muntu ghutakachinong'onagha, ichintu chilachila, cho chicho u Chala akabayanizizya abantu babo bamughanite.”

¹⁰ Loli u Chala akatuvumbulila ivintu vinivi ukwendela mu Muzimu Umuzelu. Pakuti u Muzimu akwenelezya ivintu vyosi, napapo zingaba inyinong'ono inyibizu izya Chala.

¹¹ Pakuti we muzimu yuyo ali mukasi mumuntu, weyuyo azimenye inyinong'ono izya muntu. Umwakuyana bulo, wepe u Muzimu uwa Chala mwene, weyuyo azimenye zyosi izya Chala.

¹² Aswe tutakapokela umuzimu uwa muchisu ichapasi, awe, loli tukapokela u Muzimu Umuzelu yuyo akufuma kwa Chala, umwakuti tungavimanya vivyo u Chala atupiye.

¹³ Polelo tutakunena na mazyu ghagho ghakumanyisiwa na mahala agha bantu, awe, loli na mazyu ghagho u Muzimu Umuzelu akumanyisya. Tukubamanyisya abantu babo bali nu Muzimu Umuzelu ivintu ivyanaloli ivya buzimu.

¹⁴ Umuntu yuyo ate nu Muzimu, atangavipokela ivyabupi vivyo u Muzimu uwa Chala akupa pakuti kukwache vya bupunganu sona atangavyaghannya, pachifukwa ichakuti mwene yuyo ali nu Muzimu, weyuyo angavyaghannya ivya buzimu.

¹⁵ Loli umuntu yuyo ali nu Muzimu, akuvyaghannya vyosi, loli nayumo umuntu yuyo angamwaghannya umuntu yulayula.

¹⁶ Pakuti Amasimbo ghakuti, “Nkimba wewenu azimenye inyinong'ono izya Mwene, umwakuti angamumanyisya amahala?” Loli aswe, tuli ni nyinong'ono izya Kilisitu.