1 Aba Kolinti 15 - IBAYIBOLO 2024

U Kilisitu azyuka kubufwe

¹ Mwee bakamu bane, nkulonda pakubakumbusya nizya Mazyu Amiza ghagho nkalumbilila kukwinyu, sona ghagho mukapokela, ghagho ulwitiko lwinyu lwimiliyepo na maka.

² Pa Amazyu Amiza ghanagha mubwaghiyepo ubupoki nanti mukughasunga akiza amazyu ghagho nkalumbilila kukwinyu. Loli nanti mutakabomba zinizi, ngali ulwitiko lwinyu lukaba lwa pabulo.

³ Ane nkabapa amwe chicho nkapokela pakuba chintu ichapamwanya nkani. U Kilisitu akafwa pachifukwa icha mbibi zyitu, ukuyana na Masimbo.

⁴ Akasyiliwa nukuzyuka kubufwe, bo ghachilapo amasiku matatu, ukuyana na Masimbo.

⁵ Akamubonekela u Pitala, sona pisinda pache na batumiwa 12 bala.

⁶ Pisinda pache akababonekela abakonki bache ukuchila 500 pakabalilo koka. Abinji bachili bumi, napapo bamo bafuye.

⁷ Po akamubonekela u Yakobo, sona pisinda pache na batumiwa bosi.

⁸ Pabumalilo ubwa bosi, akambonekela ane napapo injanite bulo na yumo yuyo akapapiwa bo amezi ghatakwanite.

⁹ Pakuti ane ne munandi nkani pa batumiwa bosi, sona intabaghiye nukwitiziwapo nalumolumo mutumiwa, pachifukwa ichakuti nkachivwima ichipanga icha Chala.

¹⁰ Loli muchisa icha Chala indi mumo imbeleye, sona ichisa chache papane chitakaba chabulo, awe. Loli nkiyula nkani ukuchila abatumiwa abanji bosi, napapo intakaba nene, loli chisa icha Chala chicho chili nane.

¹¹ Po manyi nene nkalumbilila, manyi bo babo, ichi cho chicho tukulumbilila, po cho chicho mukusubila.

Abantu abafwe bakwiza pakuzyuka kubufwe

¹² Loli nanti chicho tukulumbilila chakuti u Kilisitu akazyuka kubufwe, nkimba bamo mumwinyu banganena bulibuli ukuti abantu abafwe batakwiza pakuzyuka?

¹³ Nanti abantu abafwe batakwiza pakuzyuka, kokuti wepe u Kilisitu atazyukite kubufwe.

¹⁴ Sona nanti u Kilisitu atazyukite kubufwe, po ubulumbilili bwitu bwabulo, sona lope ulwitiko lwinyu lwabulo.

¹⁵ Nanti zili bunubu, kokuti aswe twe bakaboni aba bumyasi nizya Chala, pachifukwa ichakuti twabikila ubwakaboni ubwakuti u Chala akamuzyusya u Kilisitu kubufwe. Loli nanti zyanaloli ukuti abafwe batakuzyuka kubufwe, po atakamuzyusya u Kilisitu kubufwe.

¹⁶ Pakuti nanti abantu abafwe batakuzyuka kubufwe, po wepe u Kilisitu atakazyuka kubufwe.

¹⁷ Sona nanti u Kilisitu atakazyuka kubufwe, po ulwitiko lwinyu lwabulo, sona muchili muli mumbibi zyinyu.

¹⁸ Po kokuti babo bakafwila mwa Kilisitu, naloli bope basobelite bulo.

¹⁹ Nanti ulusubilo lwitu mwa Kilisitu lwiza mubumi bwene ubu, po tubaghiye pakupeleliwa ichisa nkani ukubachila abantu bosi.

²⁰ Loli ubwanaloli bwakuti u Kilisitu azyukite kubufwe, ukusimikizya ukuti bosi babo bafuye, bope bakwiza pakuzyuka kubufwe.

²¹ Ubufwe bukiza ukwendela mumuntu. Umwakuyana bulo, kope nukuzyuka kubufwe kukiza ukwendela mumuntu.

²² Pakuti ukuyana namumo abantu bosi bakufwila ukwendela mwa Adamu, momumo bope bakwiza pakuzyuka kubufwe ukwendela mwa Kilisitu.

²³ Loli umuntu wesi akwiza pakuzyuka kubufwe ukuyana na kabalilo kache: Uwakwanda we Kilisitu, pisinda pache abantu babo bache bakwiza pakuzyuka, bo akwiza sona.

²⁴ Po ubumalilo bukwiza, bo u Kilisitu amazya ubumwene bosi nu bulaghili bosi, sona na maka ghosi nukubika Ubumwene bula kwa Chala, Uwise.

²⁵ Pakuti u Kilisitu alaghilaye mupaka papo u Chala ababika abalwani bache kusi kunyayo zyache.

²⁶ Umulwani uwabumalilo pakumupota akwiza pakuba bufwe.

²⁷ Pakuti Amasimbo ghakuti, “U Chala akavibika ivintu vyosi kusi kunyayo zyache.” Amazyu ghagho ghakuti, “Ivintu vyosi” ghali pabuzelu bulo ukuti ghatakumongannya nu Chala umwenecho, pakuti weyuyo akabika ivintu vyosi kusi kunyayo izya Kilisitu.

²⁸ Loli bo ivintu vyosi vyabikiwa pasi pabulaghili ubwa Kilisitu, po umwene, yuyo we Mwana, akwiza pakwibika mwene pasi pa Chala, yuyo akavibika ivintu vyosi pasi papache, umwakuti u Chala abanje nu bulaghili pavintu vyosi.

²⁹ Nanti abantu abafwe batakazyuka kubufwe nkimba abantu babo bakoziwa mubuzilo ubwa bantu abafwe bakubomba choni? Nanti abantu abafwe batakwiza pakuzyukapo kubufwe nalumo, po nkimba choni chicho bamo bakoziwa mubuzilo ubwa bantu abafwe?

³⁰ Buli aswe, nkimba choni chicho aswe tukubika ubumi bwitu pachulu akabalilo kosi?

³¹ Mwee bakamu bane, isiku ni siku nkwenda nu bufwe. Nkunena zinizi pachifukwa icha kwituvya kuko indi nako mumwinyu mwa Kilisitu u Yesu u Mwene witu.

³² Nanti nkalwanga na bantu muno mu Efeso babo bakaba ngati po vinyamana, pakukonka bulo inyinong'ono izya buntu, po nkimba nakabapo ichoni? Loli nanti abantu abafwe batakuzyuka kubufwe, po tubombaye bulo vivyo abantu bakunena ukuti, “Leka tulyanje nukung'wela uvinyo, pachifukwa ichakuti indabi tukwiza pakufwa.”

³³ Mutakizimbulaye mwebene, “Abamanyani ababibi bakunanga inkalo inyiza.”

³⁴ Nyokelamo munyinong'ono zyinyu, sona muleke pakubomba imbibi, pachifukwa ichakuti balimo bamo mumwinyu babo batamumenye u Chala. Nkunena zinizi ukuti zibakozye isoni.

Nizya mubili ghugho ghukwiza pakuzyuka kubufwe

³⁵ Loli yumo akwiza pakulalusya ukuti, “Nkimba abantu abafwe bakwiza pakuzyuka bulibuli? Fwandi, bakwiza pakuba na mubili ghoni?”

³⁶ Wee mupunganu wee! Chicho ukubyala chitakumela, pene papo nanti chafwa tasi.

³⁷ Sona chicho ukubyala chite chibyalwa, chicho chikwiza pakubapo, awe, loli mbeyu bulo, manyi iya ngano, pamo yamwabo bulo.

³⁸ Loli u Chala akuyipa akabonekele kako ighanite, imbeyu yosi akuyipa akabonekele kache, kako kakuyiyana.

³⁹ Umwakuyana bulo, amabili ghosi ghatayanite. Pali umubili uwa muntu, uwamwabo uwa chinyamana, ughunji uwa chiyuni, sona nu wamwabo uwa swi.

⁴⁰ Vilipo ivipeliwa ivya kumwanya, sona ni vipeliwa ivya pachisu ichapasi. Loli ubuchindamu ubwa vipeliwa ivya kumwanya butayanite nu buchindamu ubwa vipeliwa ivya pachisu ichapasi, awe.

⁴¹ Izuba lili nukulama ukwache nu kwache, ghope umwezi ghuli nukulama ukunji, sona intondwa zyope zili nukulama ukunji; sona pope pakasi pa ntondwa pali ukulama ukwakulekanalekana.

⁴² Momumo zikwiza pakubela, bo abantu abafwe bakuzyuka kubufwe. Bo umubili ghukusyiliwa ghukubola, loli bo wazyuka ghutakwiza pakuba mubozu.

⁴³ Bo umubili ghukusyiliwa, ghukuba mubibi, loli bo wazyuka ghukuba nu buchindamu. Bo umubili ghukusyiliwa, ghukuba mudedebazu, loli bo wazyuka ghukuba wamaka.

⁴⁴ Bo wasyiliwa, gho mubili uwa buntu, loli bo wazyuka ghukuba mubili wabuzimu. Nanti ghulipo umubili uwa buntu, po kokuti ghulipo sona umubili uwabuzimu.

⁴⁵ Pakuti Amasimbo ghakuti, “U Adamu, umuntu uwakwanda yula, akaba nubumi.” Loli u Adamu uwabumalilo yula we Muzimu umupela bumi.

⁴⁶ Umubili uwakwanda ghute mubili uwabuzimu, awe, loli mubili uwa buntu. Po pisinda pache ghukwiza umubili uwabuzimu.

⁴⁷ Umuntu wakwanda yula, akamatiwa ni tope ilya muchisu ichapasi. Loli umuntu uwabubili yula akafuma kumwanya.

⁴⁸ Abantu aba muchisu ichapasi bayanite bulo nu muntu yuyo akamatiwa ni tope. Loli abantu bosi aba kumwanya bayanite bulo nu muntu yuyo akafuma kumwanya.

⁴⁹ Ngati mumo aswe twe nkozya iya muntu yuyo akamatiwa ni tope, umwakuyana bulo naswe tukwiza pakuba nkozya iya muntu yuyo akafuma kumwanya.

⁵⁰ Mwee bakamu bane, chicho nkunena chakuti, inyama ni banda vitangapyana Ubumwene ubwa Chala, sona chicho chibozu chitangapyana chicho chite chibozu.

⁵¹ Teghelezya, imbabuzye ichintu ichakubusyefu. Aswe tute tukafwe twebosi, awe, loli twebosi tukwiza pakwanduliwa.

⁵² Chikwiza pakubombiwa umwakuchenusya bulo ngati kukapizya ukwa lyiso, bo ipati ilyabumalilo likulila. Pakuti bo ipati likulila, abantu abafwe bakwiza pakuzyuka na mabili ghagho ghatakubola, sona aswe tukwiza pakwanduliwa.

⁵³ Pakuti chicho chibozu chanduliwanje pakuba chicho chite chibozu, sona ichifwe ichi chitanganduliwa pakuba chicho chite chifwe.

⁵⁴ Bo chicho chibozu chanduliwa pakuba chicho chite chibozu, sona bo ichifwe chanduliwa pakuba chicho chite chifwe, po Amasimbo ghakwiza pakukwanilisiwa ghagho ghakuti, “Ubufwe bwapotiwa zila.

⁵⁵ Wee bufwe wee, nkimba ubupoti bwako buli ko kwiyi? Wee bufwe wee, luli ko kwiyi ulubolela lwako?”

⁵⁶ Ulubolela ulwa bufwe yo mbibi, sona amaka agha mbibi zyo Ndaghilo.

⁵⁷ Loli u Chala apaliwanje, yuyo akutupa ubupoti ukwendela mwa Mwene witu u Yesu Kilisitu.

⁵⁸ Polelo bakamu bane baghaniwa mwimaye nkani, sona mutakayinganaye. Akabalilo kosi mwikolezannyanje nkani pakumubombela u Mwene pakuti muzimenye ukuti imbombo zizyo mukumubombela u Mwene zite izya bulo, awe.