1 Aba Kolinti 14 - IBAYIBOLO 2024

Ivyabupi ivya bulaghuzi nivya indimi

¹ Yezya nkani pakuba nu lughano. Bika umoyo winyu pa vyabupi ivya Muzimu Umuzelu, nkaninkani ichabupi icha bulaghuzi.

² Umuntu wesi yuyo akunenela mundimi injeni atakunena na bantu abanji, loli akunena kwa Chala, pakuti ataliko nayumo umuntu yuyo akwivwa zizyo akunena. Akunena izyakubusyefu ukwendela mumaka agha Muzimu Umuzelu.

³ Loli umuntu wesi yuyo akulaghula, akunena na bantu ukuti abavwe, nukubakazya, sona nukubasangalusya.

⁴ Umuntu wesi yuyo akunenela mundimi injeni akwiyavwa mwene, loli yuyo akulaghula akuchavwa ichipanga.

⁵ Ane nalondagha ukuti ngali mwebosi mwaba ni chabupi ichakunenela mundimi injeni, loli nkaninkani ngali mwaba ni chabupi icha bulaghuzi. Pakuti umuntu yuyo akulaghula mukulupo ukuchila yuyo akunenela mundimi injeni, pene papo nanti alipo yumo uwakusanusya, umwakuti ichipanga chosi chingavwiliziwa.

⁶ Polelo bakamu bane, nanti nkwiza kukwinyu nukunenela mundimi injeni, mungakabapo choni? Awe, nachimochimo, pene papo nanti niza kukwinyu nu buvumbuli, pamo nu bumanyi, pamo nu bulaghuzi, pamo nu bumanyili?

⁷ Nanti ivyimbilo vyosi vivyo vite nubumi, ngati lyo lilongi pamo ichinanda, vikulila umwakuyana bulo. Nkimba umuntu angalesannya bulibuli akalilile aka ipati naka chinanda?

⁸ Sona nanti umuntu yuyo akulizya ipati atakulizya akiza, nkimba wewenu angiyannya pakubuka kubwite?

⁹ Momumo zibeleye namwe bulo; nkimba umuntu angamanya bulibuli chicho mukunena, nanti zizyo mukunena zitakwivwika? Po mukwiza pakunenagha bulo mumpepo.

¹⁰ Muchisu ichapasi mulimo ineno izyakulekanalekana, loli yitalipo nayimoyimo yiyo yite ni ching'anamulo.

¹¹ Loli nanti intakwivwisya ineno yiyo yikuneniwa, nkwiza pakuba ne muyeni ku muntu yuyo akuyinena, sona yuyo akuyinena akwiza pakuba muyeni kukwane.

¹² Momumo zibeleye namwe bulo, pakuti mukwiyula pakuba ni vyabupi ivya Muzimu Umuzelu. Po mubaghiye pakubombezya imbombo ivyabupi vivyo vingavwa pakuzenga ichipanga.

¹³ Polelo umuntu wesi yuyo akunenela mundimi injeni, iputaye ukuti apokele ichabupi ichakusanusya zizyo akunena.

¹⁴ Pakuti nanti nkwiputila mundimi injeni, umuzimu wane gho ghugho ghukwiputa, loli inyinong'ono zyane zitakukabapo nachimochimo.

¹⁵ Po, nkimba imbombe choni? Nkwiza pakwiputa nu muzimu wane, loli nkwiza pakwiputa sona ni nyinong'ono zyane bulo. Nkwiza pakwimba nu muzimu wane, loli nkwiza pakwimba sona ni nyinong'ono zyane bulo.

¹⁶ Bo mukumupalizya u Chala nu muzimu winyu, nkimba umuntu yuyo ali poka namwe, anganena bulibuli ukuti, “Ameni,” pachifukwa icha nyiputo zyinyu zizyo mukumupalizya u Chala, bo atakumanya na chicho mukunena?

¹⁷ Napapo ulwiputo lwinyu ulwa kumupalizya u Chala lwiza nkani, loli umuntu yumo lutakumwavwa napo panandi.

¹⁸ Nkumupalizya u Chala ukuti nkunenela mundimi injeni ukubachila mwebosi amwe.

¹⁹ Loli muchipanga ningighana pakunena amazyu fayivi ghagho ghangivwika, umwakuti imbamanyisye abanji, ukuchila nukunenela mundimi injeni amazyu aminji nkani.

²⁰ Mwee bakamu bane, mutakinong'onaye ngati mwe bana abanandi. Bo mwakomana ni vintu ivibibi mubanje ngati mwe bana abanandi, loli munyinong'ono zyinyu mubanje ngati mwe basongo.

²¹ Mu Masimbo zisimbiwe ukuti, “U Mwene akuti, ‘Nkwiza pakunena na bantu bane pakubombezya abantu babo bakunenela mundimi injeni. Nkwiza pakubombezya imilomo iya bayeni, loli napapo zingaba bunubu, batakwiza pakunteghelezya.’ ”

²² Polelo ukunenela mundimi injeni cho chimanyilo icha bantu babo bate nu lusubilo, chite icha bantu babo bali nu lusubilo, awe. Loli ubulaghuzi cho chimanyilo icha bantu babo bali nu lusubilo, chite icha bantu babo bate nu lusubilo, awe.

²³ Polelo nanti ichipanga chosi chikukomana poka, sona nanti umuntu wesi akwanda pakunenela mundimi injeni, sona buli nanti abantu babo batakwivwisya, sona na babo bate nu lusubilo, bakwinjila mulamula, nkimba batakwiza pakunena ukuti mupenite?

²⁴ Loli nanti bosi bakulaghula, sona buli nanti umuntu yuyo ate nu lusubilo pamo yuyo atakwivwisya, akwinjila mulamula akwiza pakuzyaghannya ukuti wambibi, sona akwiza pakwikutisiwa na zizyo ivwa.

²⁵ Inyinong'ono zyache izyakubusyefu zikwiza pakuboneka pabuzelu. Po akwiza pakufughamila pasi nukumwiputa u Chala nukwilata ukuti, “Naloli u Chala ali mumwinyu.”

Akendezekezye aka chipanga

²⁶ Mwee bakamu bane, nkimba po tungati choni? Bo mukukomana pakwiputa, umuntu yumo ali nu lwimbo, uyunji ni chimanyisyo, uwamwabo ali nu buvumbuli ubwakufuma kwa Chala, uyunji ukunenela mundimi injeni, sona uwamwabo akusanusya zizyo zikuneniwa. Zyosi zinizi zibaghiye pakubombiwa ukuti ichipanga chizengiwe.

²⁷ Nanti abantu bamo bakulonda pakunenela mundimi injeni, babanje babili, nkaninkani batatu, loli umwakukonkana bulo, sona weka asanusye zizyo zikuneniwa.

²⁸ Loli nanti nayumo umuntu uwakusanusya, po yuyo akunenela mundimi injeni abanje myee muchipanga nukunena mwene, sona na kwa Chala.

²⁹ Abalaghuzi babili pamo batatu balaghule, sona abanji bapimaye zizyo bakulaghula.

³⁰ Sona nanti umuntu yumo yuyo ikaye palapala akupokela ubuvumbuli ubwakufuma kwa Chala, umuntu uwakwanda yula abanje myee.

³¹ Mwebosi mungalaghula, loli umwakukonkana bulo, umwakuti bosi bangamanyila nukukaziwa.

³² Umulaghuzi aghulamulaye umuzimu wache.

³³ Pakuti u Chala ate we Chala uwa buvulunganu, awe, loli we Chala uwa mutende. Ukuyana namumo zibeleye muvipanga vyosi ivya bantu abazelu aba Chala,

³⁴ abakolo babanje myee muvipanga. Pakuti batakwitikiziwa pakunena, loli babanje bakwivwila, ukuyana ni Ndaghilo izya Chiyuda.

³⁵ Nanti chilipo chimo chicho bakulonda pakumanya, babalalusye abalume babo kunyumba. Pakuti chakukozya isoni ukuti umukolo anenaye muchipanga.

³⁶ Fwandi, amazyu agha Chala ghakafuma kukwinyu? Pamo ghakabizila amwe mwebene?

³⁷ Nanti yumo akwinong'ona ukuti we mulaghuzi, pamo ukuti ali ni chabupi icha buzimu, azyaghannye ukuti zizyo nkubasimbila amwe lyo lilamulo ilya Mwene.

³⁸ Loli nanti umuntu akusulannya zinizi, yuyo umwenecho akwiza pakusuliwa.

³⁹ Polelo bakamu bane, mwiyulaye pakulaghula, sona mutakabakanizyanje abantu pakunenela mundimi injeni,

⁴⁰ loli ivintu vyosi vibombiwanje akiza, sona mulubatiko.