1 Aba Kolinti 13 - IBAYIBOLO 2024

Ulughano luchilite ivintu vyosi

¹ Napapo ninganenela mundimi izya bantu nizya bantumi, loli nanti inte nu lughano, injanite bulo ni chela chicho chikulila, pamo ibangala lilyo likuzuma bulo ichongo.

² Napapo ningaba nacho ichabupi icha bulaghuzi, napapo ningamanya akiza bulo vyosi izyakubusyefu, napapo ningaba nu bumanyi bosi, sona ningaba nu lwitiko losi ulwakuti ningasamya na maghamba bulo, loli nanti inte nu lughano, pope ne wabulo.

³ Napapo ningabagabila abapina ichuma chane chosi, nukwitikizya umubili wane ukuti ghochiwe pamoto, loli nanti inte nu lughano, pope ne wabulo.

⁴ Ulughano lufisalyoyo, sona lwachisa; ulughano lute lwakabini. Ulughano lute lwakwitutumula, pamo lwakwituvya.

⁵ Ulughano lute lwamadinko, pamo lwakwiyighana lwene, awe. Ulughano lutakukalala mwalwe, pamo ukusunga ububibi kusingo.

⁶ Ulughano lutakuhoboka nu bubibi, loli lukuhoboka nu bwanaloli.

⁷ Ulughano lutakuvwituka, sona lukwitika vyosi, lukusubila vyosi nukufisa ilyoyo

⁸ Ulughano lwa bwila na bwila. Bulipo ubulaghuzi, loli bukwiza pakumala. Vilipo ivyabupi ivyakunenela mundimi injeni, loli vikwiza pakumala. Bulipo ubumanyi, loli bukwiza pakumala.

⁹ Pakuti ubumanyi bwitu bute bwakufikapo, sona ubulaghuzi bwitu bope bute bwakufikapo;

¹⁰ loli bo chicho chakufikapo chikwiza pakuboneka, chicho chite chakufikapo chikwiza pakuzimila bulo.

¹¹ Bo ne mwana, nkanenagha ngati ne mwana, nkinong'onagha ngati ne mwana, nkennyanga vyosi ngati ne mwana. Ilelo pakuti nakula, navileka vyosi ivyabwana.

¹² Chicho ilelo tukwennya chiyanite bulo nu muzyezye pigalasi ilyakwenezyapo, loli pakabalilo kalakala tukwiza pakwenannya icheni ni cheni. Chicho inchimenye ilelo ukuti chite chakufikapo, chikwiza pakuba chakufikapo—ngati mumo u Chala amanyiye umwakufikapo.

¹³ Pakabalilo aka vilipo ivintu vitatu: Ulwitiko nu lusubilo, sona nu lughano. Loli chicho chikuchilapo pavyosi, lo lughano.