1 Aba Kolinti 12 - IBAYIBOLO 2024

Ivyabupi ivya Muzimu Umuzelu

¹ Mwee bakamu bane, ilelo nkulonda ukuti mumanye akiza nizya vyabupi ivya Muzimu Umuzelu.

² Muzimenye ukuti, bo muchili mwe bantu abakuzi, bakabasobezya ukuti mwiputaye ivifwani vivyo vitakunena.

³ Polelo nkulonda ukuti muzimanye ukuti umuntu yuyo akulongoziwa nu Muzimu uwa Chala atanganena ukuti, “U Yesu aghuniwanje.” Sona umuntu yuyo atakulongoziwa nu Muzimu Umuzelu atanganena ukuti, “U Yesu we Mwene.”

⁴ Vilipo ivyabupi ivyakulekanalekana, loli u Muzimu Umuzelu ali weka mpela.

⁵ Bulipo ububombeli ubwakulekanalekana, loli u Mwene ali weka mpela.

⁶ Ghalipo amaka aghakulekanalekana aghakubombela imbombo, loli u Chala alipo weka mpela, yuyo akumupa umuntu wesi amaka aghakubombela imbombo.

⁷ U Muzimu Umuzelu akumupa umuntu wesi ichabupi, umwakuti chibavwanje abantu bosi.

⁸ U Muzimu Umuzelu akumupa umuntu yumo ichabupi ichakunenela amazyu aghamahala, po uyunji akumupa ichabupi icha mazyu agha bumanyi,

⁹ nu Muzimu weka mpela akumupa ichabupi icha lwitiko, po uyunji akumupa amaka aghakupozezya ububine ubwakulekanalekana,

¹⁰ yumo akumupa amaka aghakupelela ivyika, po uyunji ichabupi icha bulaghuzi. Umuntu yumo akumupa ichabupi ichakupaghulannya imizimu, uyunji akumupa ichabupi ichakunenela mundimi injeni, sona uyunji akumupa ichabupi ichakusanusya indimi injeni.

¹¹ Loli zyosi zinizi akuzibomba we Muzimu Umuzelu weka mpela, yuyo akumupa umuntu wesi ukuyana nu bwighane bwache.

Umubili ghoka, loli ivigaba vyinji

¹² Pakuti ukuyana namumo umubili ghubeleye ghoka, sona ghuli ni vigaba ivyinji, po ivigaba vyosi vya mubili ghoka, napapo vyinji, vili mubili ghoka, po momumo zibeleye nu Kilisitu.

¹³ Pakuti aswe twebosi, manyi mu Yuda, pamo umuntu yuyo ate mu Yuda, manyi muzya, manyi musatuke, tukoziwa mu Muzimu Umuzelu weka ukuti tubanje mubili ghoka, sona twebosi tupeghiwe u Muzimu weka ukuti tung'wele.

¹⁴ Pakuti umubili ghute chigaba choka, awe, loli ghuli ni vigaba ivyinji.

¹⁵ Nanti ichinama chikuti, “Pakuti ane inte ne nyobe, ane inte ne chigaba icha mubili,” ichi chitangaba chifukwa icha kukanizizya pakuba chigaba icha mubili, awe.

¹⁶ Sona nanti ikutu likuti, “Pakuti ane inte ne lyiso, ane inte ne chigaba icha mubili,” ichi chitangaba chifukwa ichakukanizizya pakuba chigaba icha mubili, awe.

¹⁷ Nanti umubili ghosi ghukabanga lyiso, nkimba po ngali ghukwivwa bulibuli? Sona nanti umubili ghosi ghukabanga likutu, nkimba po ngali ghukunusya bulibuli?

¹⁸ Loli ukuyana namumo zibeleye, u Chala akabika ichigaba chosi ichakulekanalekana mu mubili ukuyana namumo akalondela ukuti zibelaye.

¹⁹ Nanti umubili ghosi ghukabanga chigaba choka, ngali kute umubili.

²⁰ Ukuyana namumo zibeleye, ivigaba vilipo ivyinji, loli umubili ghuli ghoka.

²¹ Ilyiso litangayibuzya inyobe ukuti, “Intakukulonda.” Sona umutu ghutangavibuzya ivinama ukuti, “Intakukulonda.”

²² Awe, mute momumo, loli ivigaba vivyo vikuboneka pakuba videdebazu nkani, vyo vivyo vikulondiwa nkani,

²³ sona ivigaba vivyo tukwinong'ona ukuti vite ni mbombo nkani, vyo vivyo tukubikapo umuchizi nkani. Po ivigaba ivya mubili vivyo vitakuboneka akiza vikupeghiwa umuchizi uwapamwanya nkani.

²⁴ Loli ivigaba ivya mubili vivyo vikuboneka akiza nkani vitakulonda pakupeghiwa umuchizi, awe. U Chala akavipatinkannya ivigaba ivya mubili ukuti ivigaba vivyo vitakuchindikiwa, vipokele umuchizi umukulu nkani.

²⁵ Sona nukuti patakabeko ukugabinkana mumubili, loli ukuti ivigaba vyosi vipazikizannyanje.

²⁶ Nanti ichigaba choka chikwivwa ukubaba, ivigaba vyosi vikwivwila poka ukubaba nacho. Nanti ichigaba choka chikuchindikiwa, ivigaba vyosi vikuhobokela poka nacho.

²⁷ Ilelo amwe mwebosi mwe mubili uwa Kilisitu, sona wesi uwa amwe, we chigaba icha mubili ghulaghula.

²⁸ Muchipanga ichakwanda u Chala akasala abatumiwa, ichabubili abalaghuzi, ichabutatu abamanyisi, pisinda pache babo bakupela ivyika, sona babo bali ni chabupi ichakupozezya ububine, pamo babo bali ni chabupi ichakubavwa abanji, pamo babo bali ni chabupi icha bulongozi, pamo babo bali ni chabupi ichakunenela mundimi injeni.

²⁹ Nkimba bosi bo batumiwa? Fwandi, bosi bo balaghuzi? Nkimba bosi bo bamanyisi? Fwandi, bosi bali na maka aghakupelela ivyika?

³⁰ Nkimba bosi bali ni chabupi ichakupozezya ububine? Fwandi, bosi bali ni chabupi ichakunenela mundimi injeni? Nkimba bosi bali ni chabupi ichakusanusya indimi injeni?

³¹ Loli bikapo umoyo winyu pa vyabupi ivyapamwanya nkani. Polelo nkwiza pakubalanjizya ichintu ichizapo nkani.