1 Aba Kolinti 11 - IBAYIBOLO 2024

¹ Munyeghelelaye ane ngati mumo nane nkumweghelela u Kilisitu.

Nizya kuvwala kumutu pakwiputa

² Nkubapala amwe pakuti mukunkumbuka muvintu vyosi, sona mukukonka ivimanyisyo vivyo nkabalekela.

³ Loli nkulonda mumanye ukuti u Kilisitu we mutu uwa mwanavuli wesi, umwanavuli wepe we mutu uwa mukolo, sona u Chala wepe we mutu uwa Kilisitu.

⁴ Umwanavuli wesi yuyo akuvwala chimo kumutu wache, bo akwiputa pamo bo akulaghula, akumusamula u Kilisitu, yuyo mutu wache.

⁵ Loli nanti umukolo akwiputa pamo akulaghula ukusita ukuvwala chimo kumutu wache, akumusamula umulume, yuyo mutu wache, pakuti ichi chiyanite bulo nu mukolo yuyo amwiye ulupala.

⁶ Pakuti nanti umukolo atakuvwala chimo kumutu wache, chizapo ukuti amwanje isisi zyache, sona nanti umukolo ali ni soni pakumwa isisi zyache, pamo pakumwa ulupala, po avwalaye chimo kumutu wache.

⁷ Umwanavuli atakavwalaye chimo kumutu wache, pakuti we chifwani icha Chala, sona akulanjizya ubuchindamu ubwa Chala. Loli umukolo bo buchindamu ubwa mwanavuli,

⁸ pakuti umwanavuli atakapeliwa ku mukolo, loli umukolo weyuyo akapeliwa ku mwanavuli.

⁹ Sona umwanavuli atakapeliwa pachifukwa icha mukolo, loli umukolo weyuyo akapeliwa pachifukwa icha mwanavuli.

¹⁰ Polelo umukolo avwalaye chimo kumutu wache pachifukwa icha bantumi pakulanjizya ukuti ali pasi pabulaghili ubwa mulume wache.

¹¹ Loli mumbatiko izya Mwene, abakolo batangikala bene ukusita banavuli, umwakuyana bulo, bope abanavuli batangikala bene abasita bakolo.

¹² Pakuti umukolo akafuma ku mwanavuli, momumo wepe umwanavuli akapapiwa mu mukolo. Loli ivintu vyosi vikufuma kwa Chala.

¹³ Mulonge mwebene: Nkimba zibaghiye pakuti umukolo amwiputaye u Chala, bo atavwalite chimo kumutu wache?

¹⁴ Mukikalile kitu aka isiku ni siku, nkimba chitakukozya isoni ukuti umwanavuli alimbike isisi?

¹⁵ Nkimba tutakumanyila ukuti nanti umukolo alimbikite isisi intali, kukwache gho muchizi? Pakuti apeghiwe isisi intali ukuti chibanje chakuvwala kumutu wache.

¹⁶ Loli nanti yumo akulonda pakususya chinichi, ane nkubabuzya ukuti aswe pamo ivipanga ivya Chala tute nu lwiho nalumolumo ulunji mumwitu.

Ichakulya icha Mwene

¹⁷ Pali ifundo yimo yiyo intakulonda pakubapala nayo pakuti inkomano zyinyu zikupapa ububibi ukuchila u bwiza.

¹⁸ Ichintu ichakwanda chakuti, nkwivwa ukuti, bo mukukomana poka muchipanga, muli ukugabinkana pakasi papinyu, umwakuti nkusubila ukuti muli ubwanaloli bumo.

¹⁹ Pakuti pabaghiye pabepo ukugabinkana pakasi papinyu, umwakuti babo banaloli baboneke pabuzelu.

²⁰ Bo mukukomana poka, chite chakulya icha Mwene chicho mukulya.

²¹ Pakuti bo mukulya, umuntu wesi akuchimbilila pakulya ichakulya chache, umwakuti bamo bali nizala, kuno abanji bakolizwe nkani.

²² Nkimba mute ni nyumba izyakuti mungalyelamo nukung'welelamo? Pamo nkimba mukulonda ukuchisamula ichipanga icha Chala nukubakozya isoni abantu babo bakusobelwa? Fwandi, mukulonda ukuti imbabuzye choni? Nkimba imbapale amwe pazinizi? Awe, napo panandi.

²³ Pakuti u Mwene akampa ichimanyisyo chicho nane nkabamanyisya amwe ichakuti: U Mwene u Yesu, ubusiku bubo akabikiwa munyobe izya balwani, akasenda ichabama.

²⁴ Akamupalizya u Chala, po akachimenyannya nukuti, “Ughu gho mubili wane, ghugho wapeghiwa pachifukwa icha mwemwe. Mubombaye ichi ukuti munkumbukilayepo.”

²⁵ Umwakuyana bulo, bo bamala pakulya, akasenda ulubako nukuti, “Ulubako ulu lo lufingo ulupya ulwa Chala mwibanda lyane. Mubombaye bunubu akabalilo kosi kako mukung'wela ukuti munkumbukilayepo.”

²⁶ Pakuti akabalilo kosi kako mukulya ichibama ichi, sona nukung'wela ulubako ulu, po mukufumusya ubufwe ubwa Mwene mupaka ukwiza kwache.

²⁷ Polelo umuntu wesi yuyo akulya ichabama pamo ukung'wela ulubako ulwa Mwene mubusita pakubaghila, akwiza pakuba ninongwa iyakughunangila umubili uwa Mwene ni banda lyache.

²⁸ Umuntu ipime tasi mwene, bo ataliye ichibama nukung'wela ulubako.

²⁹ Pakuti nanti umuntu akulya ichibama nukung'wela ulubako ukusita kumanya iching'anamulo icha mubili uwa Mwene, akwisendela bulo mwene ubulongi bo akulya nukung'wela.

³⁰ Ichi cho chifukwa abinji mumwinyu badedebazu, sona babine, sona abinji bafuye kale.

³¹ Loli nanti tukipimagha twebene umwakufikapo ngali tutakulongiwa.

³² Loli pope bo u Mwene akutulonga nukutufunda, akutumanyisya amahala, umwakuti tutakasusyiwe poka na bantu aba muchisu ichapasi.

³³ Polelo bakamu bane, bo mukukomana poka pakulya ichakulya icha Mwene, mulindililanaye.

³⁴ Nanti yumo ali nizala, alyanje kunyumba, umwakuti mutakalongiwe nu Chala, bo mukukomana poka. Ivintu ivyinji vivyo visyalite, vyo nkwiza pakubalingannya bo niza.