1 Aba Kolinti 10 - IBAYIBOLO 2024

Mutakavyiputaye ivifwani

¹ Mwee bakamu bane, nkulonda ukuti imbakumbuzye zizyo zikababonekela abanyenya bitu. Bosi bakenda mumuzyezye uwibingu, sona bosi bakaloboka pa Nyanja Inchesamu.

² Abakonki bosi aba Mozesi bakoziwa mwibingu, sona na munyanja mulamula.

³ Abantu bosi bakalya ichakulya ichakuyana bulo ichabuzimu,

⁴ sona bosi bakang'wela ichakung'wela ichakuyana bulo ichabuzimu. Pakuti bakang'wela amizi aghakufuma kwibwe ilya buzimu, lilyo likabuka poka nabo. Ibwe lila akaba we Kilisitu umwenecho.

⁵ Loli u Chala atakahoboka nabo abinji mumwabo, umwakuti imivimba yabo yikanyampana bulo munkolongo.

⁶ Ivintu vyosi vivyo vikababonekela vikutusoka aswe ukuti tuleke pakunyonywa ivintu ivibibi ukuyana namumo bakabombela.

⁷ Tutakiputaye ivifwani ukuyana namumo bamo bakabombelagha. Pakuti Amasimbo ghakuti, “Abantu bala bakalya nukung'wela, po bakanda pakwimba nukwisamula bene.”

⁸ Tutakabombaye ubwamalaya bubo abantu bamo bakabombagha, umwakuti pisiku lyoka abantu 23,000 bakafwa.

⁹ Tutakamuyelaye u Mwene ukuyana namumo abantu bamo bakabombelagha, po bakaghoghiwa ni njoka.

¹⁰ Tutakilumbusyanje ukuyana namumo abantu bamo bakabombelagha, po bakaghoghiwa nu wantumi yuyo akughogha abantu.

¹¹ Ivintu vinivi vikababonekela pakuba chifwanikizyo, sona vikasimbiwa ukuti vitusoke. Pakuti tuli pakabalilo, kako ubumalilo buli papipi pakwiza.

¹² Polelo umuntu wesi yuyo akwinong'ona ukuti imiliye, achebaye ukuti atakawe.

¹³ Injelo zizyo amwe mwakomana nazyo zyo zizyo abantu abanji bosi bakukomana nazyo. U Chala musubiliwa, umwakuti atakwiza pakwitikizya ukuti muyeliwe ukuchila amaka ghinyu, awe. Loli bo mukuyeliwa, umwenecho akwiza pakubayanizya izila iyakuponelamo, umwakuti mungajimba.

¹⁴ Polelo baghaniwa bane, muvileghuke ivifwani.

¹⁵ Nkunena namwe pakuba mwe bantu abamahala, mwidumulile mwebene zizyo nkunena.

¹⁶ Ulubako lulo tukubombezya bo tukumupalizya u Chala, nkimba tutakugabana poka mwibanda ilya Kilisitu? Sona ichibama chicho tukuchimenya bo tukulya, nkimba tutakugabana poka umubili uwa Kilisitu?

¹⁷ Pakuti pali ichibama choka, napapo twe binji, aswe twebosi twe mubili ghoka pakuti twebosi tukugabana ichibama choka.

¹⁸ Ennya zizyo aba Izilayeli bakubomba: Bo bakulya ivyakwiyipa vivyo vyabikiwa pachighemo chilachila, nkimba batakusendapo ichigaba pa vyakwiyipa vilavila?

¹⁹ Nkimba po nkung'anamula ukuti ivyakwiyipa vivyo vyabikiwa ku vifwani ukuti chibanje chakwiyipa vyanaloli, pamo ukuti ivifwani vilavila vyanaloli?

²⁰ Awe, mute momumo! Loli chicho nkunena chakuti ivyakwiyipa vivyo abantu abakuzi bakubika, bakuvibika ku mizimu imibibi, kute ko kwa Chala, awe. Sona intakulonda ukuti mumanyane ni mizimu imibibi.

²¹ Mutangang'welela mulubako ulwa Mwene, sona na mulubako ulwa mizimu imibibi; mutangalyela pitebulo ilya Mwene, sona na pitebulo ilya mizimu imibibi.

²² Fwandi, tukulonda pakumupela u Mwene ukuti abanje wakabini? Nkimba tukwinong'ona ukuti aswe twe bamaka ukumuchila yuyo?

²³ Abantu bamo bakuti, “Vyosi bulo vyitikiziwe,” loli vyosi vitakubapa ubwiza. Abanji bakuti, “Vyosi bulo vyitikiziwe,” loli vyosi vitakutwavwa.

²⁴ Atakabepo umuntu uwakwinong'onela ivyache vyene, loli abinong'onelaye ubwiza na banji bulo.

²⁵ Mulyanje bulo chosi chicho chikughuliziwa pamunalo uwa nyama, ukusita ukulalusya pachifukwa icha mabyebye wako.

²⁶ Pakuti Amasimbo ghakuti, “Ichisu ichapasi, ni vintu vivyo vili mumo vya Mwene.”

²⁷ Nanti umuntu uwakuzi akukwitizya pakulya nukuti awe ukulonda pakubuka kulakula, lyanga chosi chicho akukwikazikizya pantazi papako ukusita kulalusyapo nachimo pachifukwa icha mabyebye wako.

²⁸ Loli nanti yumo akukubuzya ukuti, “Ichakulya ichi chikabikiwa ku vifwani ukuti chibanje chakwiyipa,” po utakalyanje ichakulya chilachila pachifukwa icha yuyo akakubuzya, sona na pachifukwa icha mabyebye.

²⁹ Intakunena umabyebye wako, awe, loli umabyebye uwa muntu uyunji yula. Nkimba choni chicho ubusatuke bwane ubwakubombela ivintu bulongiwe nu mabyebye uwa muntu uyunji?

³⁰ Nanti nkumupalizya u Chala pachifukwa icha chakulya chicho nkulya, nkimba choni chicho nkusamuliwa pachakulya chicho nkumupalizikizyapo u Chala?

³¹ Po manyi mukulya, pamo mukung'wela, manyi mukubomba akantu kosi, mubombaye vyosi bulo ukuti mumuchindike u Chala.

³² Mutakabapunuzye abantu abanji, manyi ba Yuda, manyi ba Giliki, manyi chipanga icha Chala.

³³ Ane nkuyezya pakubahobosya abantu bosi muvyosi vivyo nkubomba, ukusita ukwinong'onela ivyane vyene bulo. Loli nkubinong'onela ubwiza abantu bosi, umwakuti bangapokiwa.