1 Aba Kolinti 1 - IBAYIBOLO 2024

¹ Ane ne Pabuli, nene nkitiziwa pakuba mutumiwa uwa Kilisitu Yesu, ukuyana nu bwighane ubwa Chala, sona na ku mukamu witu u Sositeni.

² Tukuchisimbila ichipanga icha Chala icha mu Kolinti, abantu babo bakapaghuliwa mwa Kilisitu Yesu, sona babo bitiziwe pakuba bantu bazelu, poka na bantu bosi kosi na kosi, babo bakulichindika itabwa ilya Mwene witu u Yesu Kilisitu, u Mwene wabo nu Mwene witu.

³ Ichisa nu mutende ivyakufuma kwa Chala Utata witu, sona na kwa Mwene u Yesu Kilisitu vibanje namwe.

Ukupalizya

⁴ Akabalilo kosi nkumupalizya u Chala wane pachifukwa icha mwemwe, pachifukwa icha chisa chicho akabalanjizya mwa Kilisitu Yesu.

⁵ Pakuti pakumamatilana poka nu Kilisitu, mwaba bantu bakabi muvintu vyosi bulo, nkaninkani mukanenele kinyu kosi, sona na mubumanyi bwinyu bosi.

⁶ Pakuti ulusimikizyo nizya Kilisitu lwikaziwe nkani mumwinyu,

⁷ umwakuti mutakusobelwapo ichabupi icha buzimu, bo mukulindilila ukuti u Mwene witu u Yesu Kilisitu avumbuliwe.

⁸ Umwene akwiza pakubakazya ukufika mupaka pabumalilo, ukuti mubanje bantu abasita chilema nachimochimo pisiku ilya Mwene witu Yesu Kilisitu.

⁹ U Chala musubiliwa, sona weyuyo akabitizya ukuti mubanje bakumamatilana poka nu Mwana wache u Yesu Kilisitu, u Mwene witu.

Ukugabinkana muchipanga

¹⁰ Mwee bakamu bane, nkubalaba mwitabwa ilya Mwene witu u Yesu Kilisitu ukuti mwivwanaye pa zizyo mukunena. Patakabepo ukugabinkana pakasi papinyu. Mubanje poka munyinong'ono, sona na mufundo zyinyu.

¹¹ Pakuti abantu bamo abamunyumba iya Kolobe bambuzya pabuzelu ukuti pali ukudalinkana pakasi papinyu, mwe bakamu bane.

¹² Chicho nkulonda pakunena chakuti, umuntu wesi mumwinyu akunena izyache, wepe uyunji akunena izyache akuti, “Ane indikulubazu ulwa Pabuli.” Uyunji akuti, “Ane indikulubazu ulwa Apolo.” Uyunji akuti, “Ane indikulubazu ulwa Pitala.” Uyunji akuti, “Ane indikulubazu ulwa Kilisitu.”

¹³ Nkimba u Kilisitu agabinkanite? Nkimba we Pabuli yuyo akakomeliwa pachipinjika? Fwandi, mukoziwa mwitabwa ilya Pabuli?

¹⁴ Nkumupalizya u Chala ukuti pakasi papinyu intakamozyapo umuntu nayumo, loli mwene u Kilisipa nu Gayi.

¹⁵ Polelo nayumo umuntu yuyo anganena ukuti mukoziwa mwitabwa lyane.

¹⁶ Eee, nkabozya sona abamunyumba iya Sitefanasi, loli kumbuka nanti nkamozyapo yumo.

¹⁷ Pakuti u Kilisitu atakantuma ane pakozya, loli pakulumbilila Amazyu Amiza. Atakantuma ukuti ndumbilile ukuyana na mahala agha buntu, awe, umwakuti ichipinjika icha Kilisitu chitakaboneke ukuti chite na maka.

U Kilisitu we maka na mahala agha Chala

¹⁸ Pakuti ukulumbilila nizya bufwe ubwa Kilisitu pachipinjika, bo bupunganu ku bantu babo basobelite, loli kukwitu aswe twe twapokiwa, gho maka agha Chala.

¹⁹ Pakuti Amasimbo ghakuti, “Nkwiza pakughanangannya amahala agha bantu abamahala, sona nkwiza pakubuvulungannya ubumanyi ubwa bantu abamanyi.”

²⁰ Polelo ali ko kwiyi umuntu uwamahala? Ali ko kwiyi umuntu umumanyi? Nkimba ali ko kwiyi umuntu uwakwinong'ona umwakufikapo muchisu ichapasi? U Chala alanjizya ukuti amahala agha muchisu ichapasi ghabupunganu.

²¹ Pakuti u Chala mumahala ghache, akabatikila zila ukuti abantu batakamumanye na mahala ghabo. Loli chikamuhobosya u Chala ukuti abapoke abantu babo bakughasubila amazyu ghagho tukulumbilila, napapo abene bakuti ghabupunganu.

²² Aba Yuda bakulonda ivyika, loli aba Giliki bakulonda amahala.

²³ Loli aswe tukumulumbilila u Kilisitu yuyo akakomeliwa pachipinjika. Aba Yuda bakunena ukuti ichipinjika cho chipunulo, sona abantu babo bate ba Yuda bakuti bo bupunganu.

²⁴ Loli abantu babo bitiziwe nu Chala, aba Yuda pamo abantu babo bate ba Yuda, bosi bazimenye ukuti u Kilisitu we maka agha Chala, sona we mahala agha Chala.

²⁵ Pakuti ubupunganu ubwa Chala bwamahala ukuchila amahala agha bantu, sona ubudedebazu ubwa Chala bwamaka ukuchila amaka agha bantu.

²⁶ Mwee bakamu bane, mukumbukaye namumo mukabela, pakabalilo kako u Chala akabitizizya. Abantu aba muchisu ichapasi bakinong'ona ukuti banandi mumwinyu bakaba bamahala, pamo bamaka, pamo baluko ulumanyikwe.

²⁷ Loli u Chala akavisala ivintu vivyo vipunganu ivya muchisu ichapasi, umwakuti abakozyanje isoni abamahala. Sona akavisala ivintu vivyo videdebazu ivya muchisu ichapasi, umwakuti abakozyanje isoni abamaka.

²⁸ Po akavisala ivintu vivyo vite ni mbombo, sona vivyo abantu aba muchisu ichapasi bavisulite, umwakuti anangannye ivintu vivyo abantu aba muchisu ichapasi bakwinong'ona ukuti vyapamwanya.

²⁹ U Chala akabomba zinizi, umwakuti patakabepo nayumo umuntu uwakwituvya pantazi papache.

³⁰ U Chala weyuyo abamamatizya poka nu Kilisitu u Yesu, sona akamupima pakuba mahala ghitu. Ukwendela mumwache, twaneniwa pakuba bantu bagholosu pamaso pa Chala. Aswe twaba bantu abazelu aba Chala, sona twapokiwa.

³¹ Ichi cho chicho Amasimbo ghakunena, “Wesi yuyo akulonda ukwituvya, ituvikizyanje mwa Mwene.”