1 Abamwene 7 - IBAYIBOLO 2024

Inyumba iya bumwene iya Solomoni

¹ Inyumba iya bumwene u Solomoni yikamusendela amaka 13 ukuti amalizye pakuyizenga.

² Inyumba yila yikaba ni chigaba chimo ichikulu nkani chicho chikitiziwa ukuti Umusitu uwa Lebanoni. Mubutali chikaba amamita 44, mububaba chikaba amamita 22, sona mumwanya chikaba amamita 13 nu hafu. Akayizenga pamwanya pa mizele iya mwale, sona pakaba isondo pamwanya pa kasonje

³ Pachisonje pakaba imizele mitatu iya mpanda izya matabwa agha mwale, chicho chikaba ni sondo 45, kokuti isondo 15 pamuzele ghoka.

⁴ Pakaba sona imizele mitatu iya mumabwindo, yiyo yikaba umwakwenannya.

⁵ Imilyango na mabwindo, vyosi vikaba na mafulemu aghakuyana bulo, sona imizele mitatu iya mumabwindo yikaba umwakwenannya.

⁶ U Solomoni akazenga sona inyumba inkulu iya mpanda yiyo mubutali yikaba amamita 22, mububaba yikaba amamita 13 nu hafu. Pantazi pache pakaba intanda iya sondo yiyo yikaba na kasonje.

⁷ U Solomoni akazenga sona inyumba inkulu iya kulongelamo inongwa yiyo yikitiziwanga ukuti Inyumba iya chitengo icha bumwene, pamo Inyumba iya kulongelamo inongwa. Mukasi akabikamo amatabwa agha mwale ukwandila pasi mupaka kukasonje.

⁸ Po inyumba yache yiyo akikalaghamo akayizenga kwisinda ukwa inyumba yila umwakuyana bulo ni nyumba yila. Akazenga sona intanda iyakuyana ni nyumba iya bumwene. Akamuzengela umuchi wache umwana umulindu uwa mwene uwamu Ijiputi inyumba iya kuyana bulo niya bumwene yila.

⁹ Akabombezya amabwe amiza nkani pakuzengela ivintu vyosi vinivi, sona amabwe ghala bakaghabiza bulo ukuyana ni vipimo ivya kulondiwa, bakaghadumula nukughapyata imbazu zyosi. Bakazengela amabwe ghalaghala ukwandila ulwalo mupaka pamwanya palubumba, sona ukwandila mukasi mu Nyumba iya Mwene mupaka muntanda inkulu.

¹⁰ Ulwalo lula lukazengiwa na mabwe amakulu amiza nkani, ghamo ghakaba amamita matatu nu hafu, sona aghanji ghakaba amamita folo.

¹¹ Pamwanya pakaba sona amabwe aghanji amiza, ghagho ghakabiziwa ukuyana ni vipimo ivyakulondiwa, pamwanya pamabwe ghala pakaba amatabwa agha mwale.

¹² Intanda inkulu iyakuzyungulila inyumba yila ni mizele mitatu, likazengiwa nu muzele ghoka uwa isondo izya mwale. Intanda iya mukasi iya Nyumba yila, sona ni ntanda iya kuzi yikazengiwa umwakuyana bulo.

¹³ U mwene u Solomoni akatuma amazyu ku Tile pakumwitizya u Hilamu.

¹⁴ Pakuti akaba mwana uwa mukolo umufwilwe uwa luko ulwa Nafutali, yuyo uwise akaba wamu Tile, sona akaba we fundi uwa mukuba. U Hilamu akaba muntu uwa mahala nkani, sona umumanyi pakupanga ivintu ivyakulekanalekana ivya mukuba. Akiza kwa mwene u Solomoni nukubomba imbombo yosi yiyo akapeghiwa.

Impanda zibili izya mukuba

¹⁵ U Hilamu akasyana impanda zibili izya mukuba impanda yoka ubutali bwache yikaba amamita eyiti, pakuyipima umwakuzyungulila yikaba fayivi nu hafu. Impanda yila yikaba nu bwazi, ubukulu bwache bukaba ngati kupima utufingwi folo. Yope Impanda iyabubili yikaba bunubu.

¹⁶ Akapanga sona impanda zibili izya mukuba nukuzibika pamwanya pa mpanda zila. Impanda yoka yikaba na mamita mabili nu hafu, iyinji yikaba na mamita mabili nu hafu.

¹⁷ Akapangilapo sona ubunyololo bubili ubwa mukuba pamwanya pa vyakubikapo impanda zila, ubunyololo bula bukalukiwa ngati mpote.

¹⁸ Akapanga imizele mibili iya vifwani ivya seke izya manyele umwakuzyungulila ukuti bazighile umutu ghoka uwapamwanya. Umu mo momumo bakabombela sona nu mutu ughunji ghula.

¹⁹ Imitu yiyo yikaba pamwanya pa mpanda fayivi zila zikabiziwa pakuba bwezya, ubutali yikaba amamita mabili.

²⁰ Imitu yila yikabikiwa pamwanya pa mpanda zila, pakabapo amanyele 200 umwakuzyungulila.

²¹ Akazisimika impanda zila pamulyango uwa kwinjillila mu Nyumba iya Mwene, yimo akayisimika kuntende nukuyita ukuti Yakini, sona iyinji akayisimika kumitu nukuyita ukuti Bowazi.

²² Pamwanya pa mpanda zila bakalabapo ni vyakubizabiza vivyo vikabonekagha ngati bwezya. Umu momumo imbombo iyakuzenga impanda yikamalila.

Isonta iya mukuba

²³ Akapanga sona isonta inkulu iya mukuba iyakuzyungulila. Isonta inkulu yikaba amamita folo nu hafu ukudumusannya pakasi, ubwibizu bwache bukaba amamita mabili bulo, sona ukuzyungulila yikaba amamita 13 nu hafu.

²⁴ Muntende musonta yila mukaba ivifwani ivya mukuba, ulubazu loka kukaba amamita 13 nu hafu, akazibambika isonta zila mumizele mibili.

²⁵ Isonta yila akayikazya pamwanya pa ng'ombe 12 izya mukuba. Zitatu zikennya kumitu, zitatu zikennya kubwinjililo bwizuba, izinji zitatu zikennya kuntende, zitatu zikennya kubufumilo bwizuba, sona imisinda iya ng'ombe zila yikaba mukasi.

²⁶ Ubupapate ubwa sonta yila bukaba ngati chikufi, mulubazu yikagholoka bulo umwakuzyungulila, sona yikaboneka ngati bwezya. Musonta yila mukinjila amalita 40,000 agha mizi.

Ingolo izya mukuba

²⁷ U Hilamu akapanga sona utungolo utwa mukuba, akangolo koka kakaba amamita mabili, mubutali mukaba amamita mabili, mububaba mope mukaba imita lyoka.

²⁸ Akapangile aka tungolo tula kakaba ko aka: Tukaba na matabwa agha mwale ghagho bakinjila mumafulemu.

²⁹ Pa matabwa ghanagha pakalabiwapo ivifwani ivya nkalamu, ni vya nkambaku sona nivya bakelubi. Po pamwanya na pasi pa nkalamu sona ni nkambaku pakaba inkata izya maluba ghagho ghakaba ngati makwelelo.

³⁰ Akangolo kosi kakaba ni vingelengele folo ivya mukuba, na masipindulu agha mukuba. Pankuto zyache folo pakaba amakwi aghakulemela amabeseni. Mulubazu muvyakulemela amabeseni ghala bakalabamo ni nkata izya bwezya.

³¹ Ku lubazu loka ulwa chimilo kukaba ubwazi, ubwazi bula bukaba na masentimita 44 ubutali bwache bukaba na masentimita 18, bukaba bwakuzyungulila bulo sona bukalabiwa ni vyakuzengela ichighemo, loli vitakaba vyakuzyungulila, awe.

³² Ivingelengele vyache folo vikaba kusi ku matabwa aghakumamatilana poka, sona amasipindulo ghakamamatilana poka ni vyakwimapo. Ubutali ubwa itayala lyoka bukaba amasentimita 66.

³³ Ivingelengele, amasipoko sona na mahabu vikaba vya mukuba uwakusunguluzya. Vikaboneka ngati vingelengele ivya ngolo.

³⁴ Akangolo kosi kakaba nu tulemelo folo kusi ukwa tungolo tosi folo, akalemelo koka kakaba pankuto yosi. Utulemelo tula tukapangiwa poka nu tungolo tula.

³⁵ Pamwanya pangolo pakaba utwakulemela na matabwa ghache. Kakaba kakuzyungulila, ubutali bwache bukaba amasentimita 22. Ichakwimapo chila chikapinyana pakuba chintu choka ichakwimapo.

³⁶ Pamwanya patulemelo na matabwa pakaba ivifwani ivya bakelubi, nivya nkalamu, sona na makwi agha vikambalala.

³⁷ Umu mo mumumo akapangila utungolo tosi 10 tula, sona tukapangiwa umwakuyana bulo, pachifukwa ichakuti akapimile kache kakayana bulo, sona na kabonekele kache kope kakayana.

³⁸ U Hilamu akapanga sona amabeseni amakulu nkani. Mu beseni lyoka mukinjilagha amalita 800 agha mizi, ubutali bwache bukaba amamita amabili. Akangolo kosi kakaba ni beseni lyache.

³⁹ Utungolo tula akatubika ngati ulu: Fayivi kuntende ukwa Nyumba iya Mwene, sona utunji fayivi kumitu. Po akabika isonta inkulu yila kubufumilo bwizuba.

Ivintu ivya mu Nyumba iya Chala mubupimpa

⁴⁰ U Hilamu akapanga sona amabeseni na mafosholo sona ni mbale izyakunyafilila ibanda. Po pabumalilo u Hilamu akamalizya pakupanga ivintu vyosi vivyo u mwene u Solomoni akalondagha ukuti vibanje mu Nyumba iya Mwene.

⁴¹ Impanda zibili sona ni ntaliko zibili pamwanya pa mpanda zila sona na vimo vyakuboneka ngati vilepa vivyo vikaba pamwanya pa mpanda zila,

⁴² ni vifwani 400 ivya seke izya manyele nukuzibika pavilepa vibili vila, kokuti imizele mibili iya manyele pa chilepa choka ukulaba intaliko zizyo zikaba pamwanya pa mpanda zila.

⁴³ Akapanga utungolo 10 poka na mabeseni 10

⁴⁴ ni sonta inkulu iya mizi poka ni ng'ombe yoka zizyo zikaba muntende

⁴⁵ ni sonta na mafosholo ni mbale izyakunyafilila ibanda. Ivibombelo vyosi vivyo u mwene u Hilamu akamupangila u mwene u Solomoni ukuti vibanje mu Nyumba iya Mwene vikaba vya mukuba.

⁴⁶ U mwene akapangisya vyosi vinivi mwikombe ilya Yolodani, pakasi pa kaya akakulu aka Sukoti naka Zaletani.

⁴⁷ U Solomoni atakavipima ivintu vyosi vinivi, pachifukwa ichakuti vikaba vyinji nkani, sona ubung'wamu ubwa mukuba butakamanyikwa.

⁴⁸ U Solomoni akapanga sona ivibombelo vyosi vivyo vikaba mu Nyumba iya Mwene: Ichighemo icha golide sona ni tebulo ilya golide ilyakubikilapo ivibama ivyakupeghiwa kwa Chala.

⁴⁹ Ivyakubikapo inyale ivya golide umwenecho, kokuti fayivi kundilo sona ivinji fayivi kumongo, kuntazi ukwa Buzilo Ubuzelu nkani. Akapangisya sona ubwezya ni nyale sona ni mbanilo, imbale izyakunyafilila ibanda sona na mabeseni. Vyosi vinivi vikaba vya golide

⁵⁰ na mabeseni agha golide umwenecho ni vyakuyanizizya inyale ni mbale izyakunyafilila ibanda ni sonta sona nu twakufukizizya utwakununkila ni vilemelo ivya golide ivya pamilyango iya chipinda icha mukasi ni Chipinda Ichizelu nkani sona ni milyango iya chipinda ichikulu nkani icha Nyumba iya Chala.

⁵¹ Bo u mwene u Solomoni amala imbombo yosi iyakuzenga Inyumba iya Mwene, akiza ni vibombelo vyosi vivyo uwise u Devedi akavipaghula. Ivintu vyache vikaba vyo ivi: Usiliva nu golide, sona ni vibombelo ivinji po akavibika muvipinda ivyakusungilamo ubukabi ubwa mu Nyumba iya Mwene.