1 Abamwene 6 - IBAYIBOLO 2024

Ukuzengiwa ukwa Inyumba iya Chala

¹ Bo ghachilapo amaka 480, ukwandila pakabalilo kako aba Izilayeli bakepelamo mu Ijiputi, mumwezi uwa uwabubili uwa Zivi, mumwaka uwafolo bo u Solomoni akulaghila mu Izilayeli, akanda pakuzenga Inyumba iya Mwene.

² Inyumba yiyo u mwene u Solomoni akamuzengela u Mwene, mubutali yikaba amamita 27, mububaba yikaba amamita 9, mumwanya yikaba amamita 13 nu hafu.

³ Ulubinjilo mubutali lukaba amamita 9 ukuyana nu mububaba ubwa Nyumba yila. Ubutali bwache bukaba amamita 4 nu hafu.

⁴ Akabika amabwindo ghagho amafulemu ghache ghakinjila mukasi muvibumba.

⁵ Akazenga sona ivipinda ivyamumwanya papipi nulubumba ulwa Nyumba yila, ukuzyungulila ivibumba ivya Nyumba inkulu, sona na Mubuzilo Ubuzelu mukasi.

⁶ Ichipinda ichapasi, mububaba chikaba amamita mabili, ichipinda icha pakasi mububaba chikaba amamita mabili nu hafu, ichipinda ichamumwanya nkani mububaba chikaba amamita matatu. Kuzi, muvibumba vila akazenga apakukwelela ukuzyungulila Inyumba yila, umwakuti amataliko ghatakinjile mukasi muvibumba ivya Nyumba yila.

⁷ Bakabombezya amabwe aghakubiza apakuzengelela Inyumba yila. Po ubuzengi bosi bukazengiwa ukusita ukubombezyapo inyondo ni ntemo, pamo ichela nachimochimo.

⁸ Umulyango uwakwinjilila muchipinda ichapasi ghukaba kuntende ukwa Nyumba yila. Abantu bakakwelagha apakukwelela nanti bakwepamo muchipinda ichapasi nukwinjila muchipinda ichapakasi, sona nanti bakwepamo muchipinda ichapakasi bakinjilagha muchipinda ichamumwanya.

⁹ Po u Solomoni akazenga Inyumba yila mupaka akamala pakuyizenga. Akakomela inyumba yila na matabwa agha mwale, mukasi mu kasonje akazighila na matabwa agha mwale.

¹⁰ Akayizenga inyumba yila mupaka nukuyimalizya. Akakomelako ivipinda kosi na kosi ukwa Nyumba yila na makwi agha mwale. Ichipinda chosi chikaba na mamita mabili.

¹¹ Po u Mwene akamubuzya u Solomoni ukuti,

¹² “Ukuyana ni nyumba yiyo uli pakuzenga, nanti ungazikonka indaghilo na malamulo ghane, nkwiza pakukwanilisya ulufingo lulo nkafingana nu ghuso u Devedi.

¹³ Nkwiza pakwikala pakasi pabantu aba Izilayeli, sona ntakwiza pakubakana nalumolumo.”

¹⁴ Po u Solomoni akazenga Inyumba iya Chala nukuyimalizya.

Ivyakubombela mukasi mu Nyumba iya Chala

¹⁵ Pasi akazengela amatabwa agha payini, ivibumba akavizighila na matabwa agha mwale ukwandila pasi mupaka kukasonje.

¹⁶ Kwisinda ukwa Nyumba yila akabika ichipinda, mubutali chikaba amamita 9. Akachizenga na matabwa agha mwale ukwandila pasi mupaka kuchisonje. Ichipinda chinichi akachizenga mukasi mu Nyumba yila ukuti bubanje buzilo ubuzelu ubwa mukasi, bubo bukaba Buzilo Ubuzelu Nkani.

¹⁷ Ichipinda ichikulu nkani chicho chikaba kuntazi ukwa chipinda ichipaghuliwa chila, ubutali chikaba amamita 18.

¹⁸ Amatabwa ghagho ghakalabiwa nukubiza ukwa vifwani ivya nyungu ni vya bwezya, mukasi mula mukighaliliwa na matabwa agha mwale, umwakuti amabwe agha muvibumba ghatakabonekaye.

¹⁹ U Solomoni akayannya Ubuzilo Ubuzelu ubwa mukasi muchisakasa ukuti ikazyepo Ibokosi ilya Lufingo ulwa Mwene.

²⁰ Ubuzilo ubuzelu bukaba na mamita nayini imbazu zyosi, mubutali na mububaba, sona na mumwanya bulo. Po akachipaka nu golide umwenecho. Akapanga sona ichighemo icha matabwa agha mwale.

²¹ U Solomoni akapaka ugolide umwenecho mukasi mu Nyumba iya Chala, sona ubunyololo pamulyango ubwa chipinda chila, chicho chikapakiwa nu golide umwenecho. Po u Solomoni akapaka mukasi mu Nyumba iya Chala yila nu golide umwenecho, sona poka na Mubuzilo Ubuzelu nkani.

²² Inyumba yosi yila akayipaka nu golide mupaka akamala yosi, sona chope ni chighemo, chicho chikaba Buzilo Ubuzelu akachipaka nu golide.

²³ U Solomoni akapanga abakelubi babili aba makwi agha misyunguti nukubabika Mubuzilo Ubuzelu nkani. Ukelubi weka akaba amamita folo nu hafu.

²⁴ Ichipapande choka icha kelubi uwakwanda chikaba amamita mabili ukwandila pabumalilo ubwa chipapande choka ukufika pa chipapande ichinji.

²⁵ Ukelubi uwabubili yula wepe akaba amamita folo nu hafu.

²⁶ Abakelubi bosi babili banaba bakayana bulo mubukulu, bakaba amamita folo nu hafu.

²⁷ U Solomoni akababika abakelubi bosi bala mu Buzilo Ubupaghuliwa Nkani umwakwenannya, umwakuti ichipapande icha kelubi weka chikapalamasyanga ulubumba, sona ichipapande icha kelubi uyunji chikapalamasyanga ulubumba, ivipapande ivinji vikakomana pakasi pa Nyumba.

²⁸ Abakelubi bosi babili bala bakapakiwa nu golide.

²⁹ Ivibumba vyosi ivya Nyumba iya Chala, kuzi na mukasi akabizamo ivifwani ivya bakelubi na matabwa agha vikambalala, sona nu bwezya.

³⁰ Pasi muchipinda ichakwanda ni chamukasi bulo icha mu Nyumba iya Chala yila akapakapo nu golide.

³¹ Po akapanga inyiyi izya makwi agha misyunguti izyakwinjilila Mubuzilo Ubuzelu.

³² Inyiyi zila zikalabiwa ni vifwani ivya bakelubi, na matabwa agha vikambalala, sona nu bwezya, po akazipaka inyiyi zila nu golide.

³³ Amafulemu agha pamulyango uwa Nyumba iya Chala yila ghakaba gha matabwa agha misyunguti.

³⁴ Akapanga sona inyiyi zibili izya matabwa agha payini, ulwiyi loka lukaba ni vigaba vibili, ichigaba choka chikapetekiwanga.

³⁵ Inyiyi zila akazilaba na bakelubi aba makwi agha vikambalala sona nu bwezya, zizyo zikapakiwa nu golide.

³⁶ Intanda iya kuzi iya Nyumba iya Chala yila akayizenga na mabwe amabize imizele mitatu iya mabwe, sona nu muzele ghoka uwa matabwa agha mwale.

³⁷ Ulwalo ulwa Nyumba iya Mwene yila lukaliwa mumwezi uwabubili uwa Zivi, mumwaka uwafolo bo u Solomoni akulaghila.

³⁸ Mumwezi uwa Buli, ghugho ghukaba mwezi uwa eyiti, mumwaka uwa 11 bo u Solomoni akulaghila, akamala pakuzenga Inyumba iya Chala yila ukuyana namumo akabatikila. Inyumba yila yikamusendela u Solomoni amaka seveni pakuyizenga.