1 Abamwene 5 - IBAYIBOLO 2024

Ukubungannya ivyakuzengela Inyumba iya Chala

¹ Bo u mwene u Hilamu uwamu Tile ivwa ukuti u Solomoni apakaziwa amafuta pakuba we mwene pakumupyana uwise u Devedi, akatuma intumi kwa Solomoni, pachifukwa ichakuti akamanyana nkani nu Devedi.

² U Solomoni akamutumila u Hilamu amazyu aghakuti,

³ “Uzimenye ukuti utata wane u Devedi akapotwa pakumuzengela Inyumba u Mwene u Chala wache iya kumuchindikilamo, pachifukwa icha bwite bubo akalwanga na balwani bache aba muvyisu ivipalamani mupaka u Mwene akababika bosi kusi kunyayo zyache.

⁴ Loli ilelo u Mwene u Chala wane ampa umutende kumbazu zyosi, umwakuti atalipo umulwani pamo ichakoghofya nachimochimo.

⁵ Polelo nkubatika pakumuzengela Inyumba u Mwene u Chala wane ukuyana namumo akamubuzizya utata wane u Devedi ukuti, ‘Umwana wako yuyo nkwiza pakumwikazya pachitengo chako akwiza pakunzengela inyumba iya kunchindikilamo.’

⁶ “Po ubalamule abantu bako ukuti bandumulile amakwi agha mwale agha mu Lebanoni. Abantu bane bakwiza pakubomba poka na bantu bako, sona nkwiza pakukulipila amalipilo ghosi ghagho ungampimila pachifukwa icha mbombo yosi yiyo abantu bako bakwiza pakuyibomba. Uzimenye ukuti kukwitu kuno tute na bantu babo bamenye pakudumula amakwi ngati mumo babeleye aba Sidoni.”

⁷ Bo u Hilamu ivwa amazyu agha Solomoni akahoboka nkani. Po akati, “Ilelo apaliwanje u Mwene, pakuti amupa u Devedi umwana uwamahala ukuti alaghilaye uluko ulukulu nkani ulu.”

⁸ Po u Hilamu akamutumila u Solomoni amazyu aghakuti, “Napokela amazyu ghako, sona nkwiza pakuzibomba zyosi zizyo wandaba pakukupa amakwi agha mwale nagha payini.

⁹ Abantu bane bakwiza na makwi kunuko ukufuma ku Lebanoni mupaka ku Nyanja iya Medeteleniya. Nkwiza pakughapinya mu mizigho nukughabambamizya panyanja nukufika nagho pabuzilo bubo wabutambula. Palapala nkwiza pakughapaghula, po ungaghasenda ukufuma palapala. Po awe umbombele vivyo nkakulaba pakumpa ivyakulya ukuti vibanje kunyumba yane iya bumwene.”

¹⁰ Bunubu u Hilamu akamupa u Solomoni amakwi agha mwale nagha payini, ghagho u Solomoni akaghalondagha,

¹¹ po u Solomoni akamupa u Hilamu ingano iyakukwana ividudunga 20,000 pakuba vyakulya ivya bantu abamunyumba yache, sona ni ndobo izyakukwana 20,000 izya mafuta agha misyunguti. U Solomoni akamupanga vinivi u Hilamu umwaka nu mwaka.

¹² U Mwene akamupa u Solomoni amahala ukuyana namumo akamulayizizya. Po pakabapo umutende pakasi pa Hilamu nu Solomoni, sona abantu babili banaba bakafingana ulufingo.

¹³ U mwene u Solomoni akabalamula abantu ukuti babombaye imbombo izyakufyengiwa bulo muchisu chosi icha Izilayeli. Abantu banaba bakabapo 30,000.

¹⁴ Akabatuma ku Lebanoni pakubomba imbombo umwakulekelana kokuti abantu 10,000 pamwezi umwakuti abantu bala bakikalagha mu Lebanoni umwezi ghoka, sona bakikalagha pakaya amezi mabili. U Adonilamu akaba we songo uwa mbombo izyakufyengiwa bulo.

¹⁵ U Solomoni wepe akaba na bantu 80,000 abakubiza amabwe mumaghamba, sona na bakunyamula ukatundu 70,000.

¹⁶ Akaba sona na bakapitawa 3,300 ukuti benelezyanje abambombo.

¹⁷ U mwene akabalamula abambombo bala pakubiza amabwe amakulu amiza nkani aghakuti azengele ulwalo ulwa Nyumba iya Chala.

¹⁸ Abafundi aba Solomoni naba Hilamu poka na bantu aba mu Gebala bakayannyanga amatabwa nukubiza amabwe aghakuzengela Inyumba iya Chala.