1 Abamwene 4 - IBAYIBOLO 2024

Amakambala agha Solomoni na balongozi abanji

¹ U mwene u Solomoni akalaghilagha muchisu chosi icha Izilayeli.

² Amakambala ghache aghasongo ghakaba gho agha: U Azaliya umwana uwa Zadoki akaba muputi.

³ U Eliholefe nu Ahiya, babo bakaba bana aba Shisha bakaba basimbi. U Yehoshafati umwana uwa Ahiludi akaba musungilili uwa mabuku agha mbili.

⁴ U Benaya umwana uwa Yehoyada akaba we songo uwa basilikali. U Zadoki nu Abiyatala bakaba baputi.

⁵ U Azaliya umwana uwa Natani akaba we songo uwa makambala agha muchigaba. U Zabudu umwana uwa Natani akaba muputi, sona weyuyo akamulongozyanga u mwene.

⁶ U Ahisala akaba we songo uwakwenelezya ivya munyumba iya bumwene. U Adonilamu umwana uwa Abida akaba we songo uwakwenelezya imbombo izyakufyenga bulo.

⁷ U Solomoni akaba na balaghili 12, abakwenelezya muvigaba vyosi ivya mu Izilayeli. Amakambala ghanagha ghakamupanga u mwene ivyakulya, sona na bamunyumba yache. Umuntu wesi akamupanga ivyakulya pamwezi pamwaka ghosi.

⁸ Amatabwa ghabo gho agha: U Benihuli akenelezyanga muchisu icha mumaghamba icha Efulayimu.

⁹ U Benedekeli akenelezyanga muchisu icha Makazi na mu Shalibimu na mu Beti Shemeshi na mu Eloni Betihanani.

¹⁰ U Benihesedi akenelezyanga muchisu icha Aluboti na mu Soko sona na muchisu chosi icha Hefeli.

¹¹ U Beni Abidanabu yuyo akamusenda u Tafati umwana uwa Solomoni pakuba muchi wache akenelezyanga mu Doli.

¹² U Baana umwana uwa Ahiludi akenelezyanga muchisu icha Tanaki na mu Megido sona ni chisu chosi ich Beti Shani chicho chikapalamana ni chisu icha Zaletani muntende muchisu icha Yezileli, mupaka ku Abeli Mehola, nukulobokela ku Yokomeyamu.

¹³ U Beni Gebeli akenelezyanga muchisu icha Lamoti Giliyadi, sona nutwaya tosi utwa Yayili umwana uwa Manase mu Giliyadi, mupaka kuchigaba icha Aligobi mu Bashani, poka nutwaya twache utukulu nkani 60, tuto tukaba ni nyiyi izya mukuba.

¹⁴ U Ahinadabu umwana uwa Ido akenelezyanga muchisu icha Mahanayimu.

¹⁵ U Ahimazi yuyo akamusenda u Basemati umwana uwa Solomoni pakuba muchi wache, akenelezyanga muchisu icha Nafutali.

¹⁶ U Baana umwana uwa Hushayi akenelezyanga muchisu icha Asheli, nicha Aloti.

¹⁷ U Yehoshafati umwana uwa Paluwa akenelezyanga muchisu icha Isakala

¹⁸ U Shimeyi umwana uwa Ela akenelezyanga muchisu icha Benjamini

¹⁹ U Gebeli umwana uwa Uli akenelezyanga ichisu icha Giliyadi, chicho chikalaghiliwanga nu mwene u Sihoni waku Amoli, sona nu mwene u Ogi waku Bashani. U Gebeli akaba mulongozi mwene yuyo akenelezyanga muchisu chilachila.

Ubukabi ubwa Solomoni

²⁰ Abantu aba muchisu icha Yuda nicha Izilayeli bakaba binji nkani ngati musesenga uwa mulubazu ulwa nyanja. Bakaba bantu abakuhoboka nkani pachifukwa ichakuti bakaba ni vyakulya, sona ni vyakung'wela ivyinji nkani.

²¹ U mwene u Solomoni akalaghilagha mubumwene bosi bunubu ukwandila kulusoko ulwa Yufuleti mupaka kuchisu icha ba Filisiti nukufika kumpaka iya chisu icha Ijiputi. Abantu aba muvyisu vinivi bakamupa umusonko u Solomoni, sona bosi bakaba pasi pabulaghili bwache mubumi bwache bosi.

²² Ivyakulya vivyo vikalondiwanga kunyumba iya Solomoni isiku ni siku vikaba vyo ivi: Ividudunga 150 ivya busu ubutinye sona vidudunga 300 ivya busu ubutinye ubwa mugayiwa

²³ ni ng'ombe 10 inyine izyakulyesezya muchibagha ni ng'ombe 20 izyakudima ni ng'ozi 100 ukusita ukubelengelako imbabala na bampombo sona ni nkuku inyine izyakuteka.

²⁴ U Solomoni akalaghilagha ichisu chosi icha kubwinjililo bwizuba ubwa lusoko ulwa Yufuleti ukwandila ku Tifisa mupaka ku Gaza, sona akaba mumutende ni vyisu vyosi ivipalamani.

²⁵ Pakabalilo kosi aka Solomoni, abantu bosi aba muchisu icha Yuda nicha Izilayeli bakaba mubwabuke, ukwandila ku Dani mupaka ku Belisheba. Umuntu wesi akikalagha umwakufwasa mu mampesya aghache na ghache, sona na makwi agha ikuyu.

²⁶ U Solomoni akaba ni vibagha 40,000 ivya falasi izya ngolo zyache, sona ni falasi 12,000.

²⁷ Abalongozi bache aba muvigaba pamwezi umuntu wesi akamupanga ivyakulya u mwene u Solomoni, poka na bantu bosi babo bakalyanga poka nawe kunyumba yache. Bakenelezyanga nkani ukuti u mwene atakusobelwapo nachimochimo.

²⁸ Abalongozi bala bakiza na mapemba ni sote, kuko vikalondiwa ukuyana namumo bakapimiliwa ukuti ifalasi izya ngolo ni falasi izinji zilyanje.

Amahala agha Solomoni

²⁹ U Chala akamupa u Solomoni amahala nu bumanyi ubwapamwanya nkani, sona na kivwisizye aka vintu.

³⁰ U Solomoni akabachila amahala abantu bosi abakubufumilo bwizuba, pamo abantu bosi abamahala aba mu Ijiputi.

³¹ Akaba muntu uwa mahala ukubachila abantu bosi, sona nukumuchila u Etani wamu Ezila. Akaba wamahala nkani ukumuchila u Hemani nu Kalikoli, sona nu Dalida, abana aba Maholi. Imbili yache yikivwika muvyisu vyosi ivipalamani.

³² U Solomoni akata ivyili 3,000, sona ni nyimbo izyakuchila 1,005

³³ Akanenagha nizya bumi ubwa vimelwa ukwandila na makwi agha mwale mu Lebanoni mupaka ulutabo ulwa sipanji lulo lukataba muvibumba. Akanenagha sona nizya vinyamana ni viyuni, ni vyakwavula, sona niswi.

³⁴ Abamwene aba muchisu ichapasi bakivwa nizya mahala ghache, po bakabatuma abantu pakumuteghelezya.