1 Abamwene 22 - IBAYIBOLO 2024

Umulaghuzi u Mikaya akumusoka u Ahabu

¹ Patakabapo ubwite pakasi pachisu icha Siliya ni cha Izilayeli ukwa maka matatu.

² Loli mumwaka uwabutatu u mwene u Yehoshafati uwamu Yuda akabuka pakukomana nu mwene u Ahabu uwamu Izilayeli.

³ U Ahabu akaghalalusya amakambala ghache akati, “Nkimba mutazimenye ukuti ichigaba icha Lamoti Giliyadi chitu? Loli tutakubombapo nachimochimo ukuti tuchifyule sona munyobe izya mwene uwamu Siliya.”

⁴ Po u Ahabu akamulalusya u Yehoshafati akati, “Nkimba ukwiza pakubuka nane ku Lamoti Giliyadi pakulwa ubwite?” U Yehoshafati akamwamula u mwene waku Izilayeli yula akati, “Ane indikulubazu lwako, abantu bane bako, sona ni falasi zyane zyope zyako.”

⁵ Loli u Yehoshafati akamubuzya u mwene uwa Izilayeli yula akati, “Buzikizya tasi kwa Mwene.”

⁶ Po u mwene uwa Izilayeli yula akabitizya abalaghuzi pipipipi 400 nukubalalusya ukuti, “Nkimba imbukaye ku Lamoti Giliyadi pakulwa ubwite, pamo awe?” Abalaghuzi bala bakamwamula bakati, “Bukagha, pakuti u Mwene akwiza pakukabika munyobe zyako.”

⁷ Loli u Yehoshafati akalalusya akati, “Nkimba atalipo umulaghuzi uwa Mwene uwakuti tungabuzikizyako?”

⁸ U mwene uwa Izilayeli akamwamula u Yehoshafati akati, “Asyalako umulaghuzi weka uwakuti tungabuzikizizyako, itabwa lyache we Mikaya umwana uwa Imula. Loli imubengite pachifukwa ichakuti atandaghuliyepo nalumo ivintu ivyiza, akabalilo kosi akundaghulila ivintu ivibibi vyene.” U Yehoshafati akamwamula akati, “Wee mwene wane, utakanenaye bunubu.”

⁹ Po u mwene uwa Izilayeli yula akalyitizya ikambala lyoka nukulibuzya ukuti, “Mwitizye u Mikaya umwana uwa Imula, ize kuno lubilolubilo.”

¹⁰ Pakabalilo kalakala u mwene uwa Izilayeli, poka nu mwene u Yehoshafati uwamu Yuda bakikalagha pavitengo ivya bumwene, bo bavwalite inkazo zyabo izya bumwene. Bakikalagha pabuzilo ubwakukomelapo inyinulo pamulyango uwa kaya akakulu nkani aka Samaliya, po abalaghuzi bosi bakalaghulagha pamaso papabo.

¹¹ Umulaghuzi weka, u Zedekiya umwana uwa Kenana akapanga impembe izya chela nukuti, “U Mwene ati, ‘Ni mpembe izi ukwiza pakubavulazya nazyo aba Siliya nukubapota.’ ”

¹² Abalaghuzi abanji bosi bakalaghulagha umwakuyana bulo bakati, “Bukagha ku Lamoti Giliyadi pakulwa ubwite, sona ukwiza pakupota, pakuti u Mwene akwiza pakukabika munyobe zyako.”

¹³ Intumi yiyo yikabuka pakumwitizya u Mikaya yikamubuzya yikati, “Abalaghuzi abanji bosi bakulaghula ukuti u mwene akwiza pakupota. Po nawe bulo amazyu ghako ghayane bulo na mazyu ghabo.”

¹⁴ Loli u Mikaya akamwamula akati, “Nkulapa pamaso pa Mwene umumi ukuti naloli nkwiza pakumubuzya zyene zizyo u Mwene ambuzya!”

¹⁵ Bo afika, u mwene u Ahabu akamulalusya akati, “Wee Mikaya, nkimba tubukaye ku Lamoti Giliyadi pakulwa ubwite, pamo awe?” U Mikaya yula akamwamula akati, “Bukagha mukwiza pakubapota, pakuti u Mwene akwiza pakubabika munyobe zyako.”

¹⁶ U mwene akamulalusya akati, “Nkimba nkulapizye kalinga ukuti umbuzye ubwanaloli bwene pamaso pa Mwene?”

¹⁷ Po u Mikaya akamwamula akati, “Nkabennya aba Izilayeli bosi basatite mumaghamba ngati zyo ng'ozi zizyo zite nu mudimi, sona u Mwene akati, ‘Abantu banaba bate nu mulongozi, baleke babwelaye mumutende.’ ”

¹⁸ U mwene uwa Izilayeli akamulalusya u Yehoshafati akati, “Nkimba intakakubuzyapo ukuti atandaghuliyepo nalumo ivintu ivyiza, loli akabalilo kosi ivintu ivibibi vyene?”

¹⁹ Po u Mikaya akanena sona akati, “U Mwene ati: Nkamwennya u Mwene ikaye pachitengo icha bumwene kumwanya, sona abantumi bosi bakimilila umwakumuzyungulila kundilo na kumongo kwache.

²⁰ U Mwene akalalusya akati, ‘Nkimba wewenu yuyo angamudeba u Ahabu ukuti abuke ku Lamoti Giliyadi pakulwa ubwite umwakuti bamughoghele kulakula?’ “Uwantumi weka akasakizya izinji, sona uyunji akasakizya izyamwabo.

²¹ Pabumalilo, umuzimu ghukiza pamaso pa Mwene nukuti, ‘Nkwiza pakumudeba.’

²² “U Mwene akalalusya akati, ‘Nkimba ungamudeba bulibuli?’ “Umuzimu ghula ghukamula ghukati, ‘Nkwiza pakubuka nukubapela abalaghuzi bosi aba Ahabu ukuti batamantaye.’ “U Mwene akati, ‘Bukagha, naloli ungamudeba.’

²³ “Polelo u Mwene abika umuzimu uwabumyasi mumulomo uwa balaghuzi bako bosi. U Mwene alamula ukuti intamyo zikuwile.”

²⁴ Po u Zedekiya umwana uwa Kenana akapalamila nukumukoma u Mikaya nipi kumaso, po akamulalusya akati, “Nkimba umuzimu uwa Mwene wendite zila yoni, bo wepamo mumwane nukunena nawe?”

²⁵ U Mikaya akamwamula akati, “Ukwiza pakuzimanya pisiku lilyo ukwiza pakuchimbilila muchipinda ni chipinda pakuvwama.”

²⁶ U mwene uwa Izilayeli akalamula akati, “Mumuleme u Mikaya nukumunyosezya kwa Amoni umulaghili uwa kaya akakulu nkani, sona na kwa Yowashi, umwana uwa mwene,

²⁷ u mwene uwamu Izilayeli akuti, ‘Mwighalile mujele, sona mumupanje chene ichibama na mizi mupaka inyokeko akiza bulo.’ ”

²⁸ U Mikaya akati, “Nanti wanyokako akiza bulo, kokuti u Mwene atanenite ukwendela mumwane!” Po akababuzya babo bakimilila palapala akati, “Mwee bantu mwebosi, mughaleme amazyu ghane.”

Ubufwe ubwa Ahabu

²⁹ Po u mwene uwa Izilayeli, poka nu Yehoshafati u mwene uwamu Yuda bakabuka pakukafyula akaya aka Lamoti Giliyadi.

³⁰ U mwene uwa Izilayeli akamubuzya u Yehoshafati akati, “Nkwiza pakwiyandula nemwene nukubuka kubwite, loli awe uvwalaye inkazo yako iya bumwene.” Po u Ahabu yula akabuka kubwite, bo iyanduye ngati po muntu uyunji bulo.

³¹ Pakabalilo kalakala u mwene uwamu Siliya akabalamula abasongo 32 abendezya ingolo izya bwite akati, “Mutakalwanje ubwite nu muntu uyunji, manyi munandi pamo usongo, loli mulwanje nu mwene uwa Izilayeli.”

³² Bo abasongo bala bamwennya u Yehoshafati bakati, “Naloli uyu we mwene uwamu Izilayeli.” Po bakaghalabuka ukuti balwe nawe ubwite, loli bo u Yehoshafati akolomoka,

³³ abasongo bala bennya ukuti atakaba we mwene uwamu Izilayeli, po bakaleka pakumuchimbizya.

³⁴ Loli umuntu yumo akawesa ubwele bwache umwakusita kumanya, akamulasa u mwene u Ahabu pakasikasi papo ivigaba ivya ngulu vikakomana. Po akamubuzya umuntu yuyo akendezyanga ingolo yache akati, “Ghalabuka, unyefyepo pabuzilo ubu, pakuti navulaziwa nkani.”

³⁵ Pisiku lilalila ubwite bukaba bwakoghofya nkani, umwakuti bakamwikazya bulo u mwene yula mungolo yache umwakwenannya naba Siliya, bo ibanda likutonyela mungolo mulamula, po bo izuba likwinjila akafwa.

³⁶ Bo izuba likwinjila pakaba inkuta pakasi pabasilikali iyakuti, “Umuntu wesi abwelaye kukaya kache. Umuntu wesi anyokelaye kuchisu chache!”

³⁷ Po u mwene u Ahabu akafwa. Umuvimba wache bakabuka nagho ku Samaliya nukughusyila kulakula.

³⁸ Bakasuka ingolo yache pachiziba mu Samaliya, papo abakolo abamalaya bakoghaghapo, po imbwa zikamyantagha ibanda lyache ukuyana namumo u Mwene akanenela.

³⁹ Imbombo izinji zyosi zizyo u Ahabu akabomba, sona namumo akayilabila inyumba yache iya bumwene ni mpembe izya zovu, poka nutwaya utukulu nkani tuto akazenga visimbiwe mwibuku ilya Mbili iya bamwene aba ba Izilayeli.

⁴⁰ U Ahabu akafwa, po umwana wache u Ahaziya akamupyana pakuba we mwene.

U mwene u Yehoshafati akulaghila mu Yuda

⁴¹ Mumwaka wafolo u Yehoshafati umwana uwa Asa akaba we mwene uwamu Yuda, bo u mwene u Ahabu akulaghila mu Izilayeli.

⁴² U Yehoshafati akaba na maka 35 bo anda pakulaghila, sona akalaghila amaka 25 bo ali mu Yelusalemu. Unyina akaba we Azuba, umwana uwa Shili.

⁴³ U Yehoshafati akabomba ingolosu pamaso pa Mwene ngati mumo uwise u Asa akabombelagha. Loli atakabunangannya ubuzilo ubwapamwanya ubwakwiputilapo, po abantu bakabikagha ivyakwiyipa nukufukizya utwakununkila palapala.

⁴⁴ Ichintu ichinji chikaba chakuti pakaba umutende pakasi pa Yehoshafati nu mwene uwamu Izilayeli.

⁴⁵ Imbombo izinji zyosi zizyo u Yehoshafati akabomba nu bujivu bwache, sona namumo akalwila ubwite visimbiwe mwibuku ilya Mbili iya bamwene aba ba Yuda.

⁴⁶ Ichintu ichinji chicho u Yehoshafati akabomba chikaba chakuti, akabefyamo abakolo abamalaya mubuzilo ubwakwiputilamo ivifwani, babo bakasyalikila pakabalilo aka wise u Asa.

⁴⁷ Pakabalilo kalakala mu Edomu mutakabamo u mwene, po uwabubili uwa mwene weyuyo akalaghilagha.

⁴⁸ U mwene u Yehoshafati akapanga amabwato amakulu nkani ukuti ghabuke ku Ofili pakunyamula ugolide. Loli amabwato ghala ghatakafikako, pachifukwa ichakuti ghakananganikila mu Eziyoni Gebeli.

⁴⁹ Pakabalilo kalakala u Ahaziya umwana uwa Ahabu akamubuzya u Yehoshafati akati, “Abambombo bane bendele poka na bambombo bako mumabwato.” Loli u Yehoshafati akakana.

⁵⁰ U Yehoshafati akafwa nukusyiliwa mukaya akakulu nkani aka wise u Devedi mu Yelusalemu. Po umwana wache u Yeholamu akamupyana pakuba we mwene.

U mwene u Ahaziya akulaghila mu Izilayeli

⁵¹ Mumwaka uwa 17, u Ahaziya umwana uwa Ahabu akaba we mwene uwa Izilayeli, bo u mwene u Yehoshafati akulaghila mu Yuda. Po akalaghila mu Izilayeli amaka mabili bo ali mu Samaliya.

⁵² U Ahaziya akananga pamaso pa Mwene pachifukwa ichakuti akabombagha zizyo uwise nu nyina bakabombagha, sona ukuyana namumo u Yelobowamu umwana uwa Nebati akabombelagha pakubapela aba Izilayeli ukuti bope banangaye.

⁵³ U Ahaziya akamubombela u Baala nukumwiputa, umwakuti akamukalalizya u Mwene u Chala uwa Izilayeli, ukuyana namumo uwise akabombelagha.