1 Abamwene 20 - IBAYIBOLO 2024

U Beni Hadadi akulwa ubwite naba Izilayeli

¹ U mwene u Beni Hadadi uwamu Siliya akababunganika abasilikali bache bosi. Po akabuka poka na bamwene abanji 32 poka ni falasi zyabo, sona ni ngolo zyabo pakulwa ubwite mukaya akakulu nkani aka Samaliya.

² U Beni Hadadi akamutumila intumi u mwene u Ahabu uwamu Izilayeli, yuyo akaba mukaya akakulu nkani na mazyu aghakuti, “U mwene u Beni Hadadi ati:

³ ‘Usiliva nu golide yuyo uli nawe wane, sona bope na bachi bako abakuboneka akiza nkani, poka na bana bako bane.’ ”

⁴ U Ahabu akamula akati, “Wee mwene wane, chiza bulo. Ivintu vyosi vivyo indi navyo vyako!”

⁵ Intumi zila zikiza sona nukuti, “U Beni Hadadi ati, ‘Nkakutumila amazyu aghakuti awe ukwiza pakumpa usiliva nu golide, na bachi bako poka na bana bako.

⁶ Loli indabi pakabalilo ngati kanaka, nkwiza pakughatuma amakambala ghane pakulondelezya munyumba yako, sona ni nyumba izya makambala ghako. Bakwiza pakusenda ivintu vyosi vivyo uli navyo.’ ”

⁷ U mwene uwa ba Izilayeli akabitizya abasongo bosi aba muchisu chila nukubabuzya ukuti, “Ennya namumo umuntu uyu akututamizya. Akatuma intumi ukuti akubalonda abachi bane, na bana bane nu siliva poka nu golide, po nkitinkana nawe.”

⁸ Abasongo poka na bantu bosi bakamula bakati, “Utakamuteghelezyanje pamo ukumupa ivintu vivyo akuvilonda.”

⁹ Po u Ahabu akazyamula intumi zila akati, “Mumubuzye u mwene wane muti, ‘Ane ne wambombo wache nkwiza pakuvibomba vivyo akandaba pakwanda, loli intangavibomba vivyo andaba pakabalilo aka.’ ” Intumi zila zikabuka nukumubuzya u Beni Hadadi.

¹⁰ Po u Beni Hadadi akamutumila sona amazyu u Ahabu aghakuti, “Abachala banfunde nkani nanti ane poka na bantu bane abinji tutakwiza pakukanangannya akaya akakulu nkani aka Samaliya, umwakuti patakwiza ukusyalapo ulufumbi ulwakuti umuntu wekaweka angalutapa munyobe yache.”

¹¹ U mwene u Ahabu akamula akati, “Mubuzye uti, ‘Umusilikali umwenecho weyuyo akwituvya nanti apota ubwite.’ ”

¹² U Beni Hadadi akapokela amazyu ghanagha bo yuyo poka na bamwene abanji bali pakung'wela muvisakasa vyabo. Akabalamula abantu bache akati, “Mwiyannye pakulwa ubwite.” Po bakiyannya pakulwa ubwite nakaya akakulu nkani kala.

Aba Izilayeli bakumupota u Beni Hadadi

¹³ Pakabalilo kalakala umulaghuzi akiza kwa mwene u Ahabu nukumubuzya ukuti, “U Mwene ati, ‘Nkimba ukuchennya ichilundilo icha basilikali? Ilelo nkwiza pakubabika munyobe zyako, po ukwiza pakumanya ukuti ane ne Mwene.’ ”

¹⁴ U Ahabu akalalusya akati, “Nkimba wewenu yuyo akwiza pakuchibomba?” Umulaghuzi yula akamula akati, “U Mwene ati, ‘Abasilikali abachilumendo babo bali pasi pa basongo aba basilikali aba muchigaba, bo babo bakwiza pakuchibomba.’ ” U Ahabu akalalusya akati, “Nkimba wewenu yuyo akwiza pakuba wakwanda pakulwa ubwite?” Umulaghuzi yula akamwamula akati, “Wewe.”

¹⁵ U Ahabu akababungannya poka abasilikali abachilumendo, babo bakaba pasi pa basongo aba basilikali aba muchigaba, sona bosi poka bakabapo 232. Po akababungannya sona abasilikali aba Izilayeli 7,000.

¹⁶ Bakanyamuka pakasi pamusanya, bo u Beni Hadadi poka na bamwene 32 babo bakaba kulubazu lwache bali pakung'wela muvisakasa vyabo.

¹⁷ Abasilikali abachilumendo bo babo bakaba bakwanda pakubuka. Pakabalilo kalakala u Beni Hadadi akatuma abantu bamo pakutendela. Abantu bala bakamubuzya bakati, “Abasilikali abakufuma mu Samaliya bakwiza.”

¹⁸ U Beni Hadadi akabalamula abantu bala akati, “Manyi bakulonda umutende manyi biza pakulwa ubwite, pope bulo mubaleme bumi.”

¹⁹ Abasilikali abachilumendo bala bakabalongolela abasilikali aba ba Izilayeli ukubuka pakulwa ubwite.

²⁰ Po umuntu wesi akamughogha umulwani wache yuyo akalwanga nawe. Bunubu aba Siliya bakachimbila, sona aba Izilayeli bakabachimbizya. Loli u Beni Hadadi u mwene uwa ba Siliya, poka na bantu babo akaba nabo bakakwela ifalasi nukuchimbila.

²¹ U mwene uwamu Izilayeli akafyula ifalasi poka ni ngolo zyabo izya bwite, sona akabaghogha aba Siliya abinji nkani.

²² Pisinda pache umulaghuzi akiza kwa mwene uwa Izilayeli nukumubuzya ukuti, “Wimaye nkani sona winong'onaye akiza zizyo ukwiza pakubomba. Pakuti umwaka ghugho ghukwiza u mwene wamu Siliya akwiza sona pakulwa nawe ubwite.”

Ubwite ubwabubili naba Siliya

²³ Pakabalilo kalakala amakambala agha mu Siliya ghakamubuzya u mwene wabo ghakati, “Abachala babo bo bachala aba mumaghamba. Ichi cho chifukwa bakaba bamaka nkani ukutuchila. Loli nanti tukulwa nabo ubwite mwinkombe naloli tukwiza pakubapota.

²⁴ Losi ulu bomba ichi: Ubefyepo abamwene bosi pabulaghili bwabo, sona usalilepo abasongo aba basilikali.

²⁵ Bungannya sona akabukatila aka basilikali akakuyana na kakwanda kako kakapotwa ubwite. Ubwinji ubwa falasi ni ngolo buyane bulo, po tukwiza pakulwa nabo ubwite mwikombe. Naloli tukwiza pakuba twe bamaka ukubachila.” Po akitinkana nabo nukubomba zizyo bakamubuzya.

²⁶ Kubwandilo ubwa mwaka u Beni Hadadi akababungannya poka abasilikali bache nukubuka nabo pakulwa ubwite naba Izilayeli mukaya akakulu nkani aka Afeki.

²⁷ Aba Izilayeli bope bakababungannya poka abasilikali babo, nukubuka pakulwa ubwite. Loli aba Izilayeli bakabonekagha bulo ngati po tudimo tubili utwa mbuzi, bo aba Siliya basatite posi na posi muchisu chila.

²⁸ Po umulaghuzi akiza nukumubuzya u mwene uwa Izilayeli ukuti, “U Mwene ati, ‘Pachifukwa ichakuti aba Siliya bakwinong'ona ukuti ane ne Mwene ne chala uwa mumaghamba, sona nukuti te ne chala uwa mumakombe, po nkwiza pakuchibika munyobe zyako ichilundilo ichikulu ichi, sona mukwiza pakumanya ukuti ane ne Mwene.’ ”

²⁹ Aba Izilayeli poka na Siliya bakikala muvisakasa vyabo umwakwenannya ukwa masiku seveni, sona pisiku ilyaseveni bakalwa ubwite. Pisiku lilalila aba Izilayeli bakabaghogha abasilikali abakwenda pasi aba ba Siliya 100,000.

³⁰ Abasilikali abanji babo bakasyala bumi bakachimbilila mukaya akakulu nkani aka Afeki, kuko ulubumba lukabawila abantu 27,000. Loli u mwene u Beni Hadadi akachimbilila kukaya akakulu nkani nukuvwama mukasi muchipinda.

³¹ Amakambala agha Beni Hadadi ghakati, “Twivuye ukuti abamwene aba mu Izilayeli bachisa nkani. Utwitikizye ukuti tubuke kwa mwene uwamu Izilayeli, bo tuvwalite amasaka mumisana yitu, sona bo tupinyite inkusa musingo zyitu, lumo angatuleka bumi.”

³² Bakabuka kwa mwene uwa Izilayeli bo bavwalite amasaka mumisana yabo, sona bo bapinyite inkusa musingo zyabo nukuti, “Umubombi wako u Beni Hadadi ati, ‘Nalamba utakangoghe.’ ” Po u Ahabu akabalalusya akati, “Fwandi achili mumi? Pakuti mukamu wane.”

³³ Abantu bakinong'ona ukuti amazyu ghala ghakaba miza bulo, nukwamula lubilolubilo ukuti, “Eee, u Beni Hadadi we mukamu wako naloli.” U mwene yula akababuzya akati, “Buka mumusende.” Bo u Beni Hadadi afika, u Ahabu akamukwezya mungolo yache.

³⁴ U Beni Hadadi akamubuzya akati, “Ane nkwiza pakukunyosezya utwaya utukulu nkani tuto utata wane akamufyula ughuso. Ungizengela umunalo mu Damasika, ukuyana namumo utata wane akabombela mukaya aka Samaliya.” U Ahabu akamwamula akati, “Nkwiza pakukwitikizya ukuti ubukaye pachifukwa icha lufingo lwitu.” Po akafingana nawe ulufingo nukumwitikizya ukuti abukaye.

Umulaghuzi akumuchemela u Ahabu

³⁵ Pakabalilo kalakala umwana yumo uwa balaghuzi akamubuzya uwamwabo amazyu agha Mwene akati, “Nkoma ni chilwilo chako.” Loli uwamwabo yula akakana.

³⁶ Po umulaghuzi yula akati, “Pachifukwa ichakuti utakamwivwila u Mwene, bo wepapo bulo pano, inkalamu yikwiza pakukughogha.” Umuntu yula akabuka, po inkalamu yikamulema nukumughogha.

³⁷ Umulaghuzi yula akakomana nu muntu uyunji, po akati, “Nalamba nkoma.” Umuntu yula akamukoma nukumuvulazya.

³⁸ Umulaghuzi yula akabuka pakumulindilila u mwene mulubazu mumusebo, sona akiyandula mwene pakwipinya umwenda pacheni.

³⁹ Bo mwene yula adumusannya bulo, umulaghuzi akakolomoka akati, “Wee mwene ane ne wambombo wako name pakulwa ubwite, po umusilikali yumo akiza nu mukayidi nukuti, ‘Umusungilile akiza umuntu uyu, nanti asobela, ukwiza pakughoghiwa pamo ukwiza pakulipala indalama izya siliva.’

⁴⁰ Loli bo nikolanizye ni mbombo, umukayidi yula akazyebeluka!” U mwene yula akamula akati, “Ubaghiye ufwanje. Wadumula wemwene inongwa yako.”

⁴¹ Po umulaghuzi yula akefya umwenda ghugho akipinya pacheni, sona u mwene akamumanya ukuti akaba weka uwa balaghuzi bala.

⁴² Po umulaghuzi akamubuzya u mwene akati, “U Mwene ati, ‘Pachifukwa ichakuti wamuleka bulo ukuti achimbile umuntu yuyo nkatinji aghoghiwe, po awe ukwiza pakufwa mubuzilo bwache, sona abantu bako bakwiza pakufwa mubuzilo ubwa bantu bache.’ ”

⁴³ U mwene u Ahabu akabwela kunyumba yache mu Samaliya, bo asulumanizye, sona bo akalaye.