1 Abamwene 19 - IBAYIBOLO 2024

U Eliya akuchimbila

¹ U Ahabu akamubuzya u Yezibeli vyosi vivyo u Eliya akabomba, sona namumo akabaghoghela abalaghuzi aba Baala.

² Po u Yezibeli akamutumila intumi u Eliya pakumoghofya ukuti, “Abachala banfunde nkani nanti ukufika indabi pakabalilo ngati kanaka ntakwiza pakukughogha ngati mumo ukubaghoghela abalaghuzi bala.”

³ U Eliya akanyila nkani, po akachimbila ukuti abupoke ubumi bwache. Bo afika ku Belisheba mu Yuda, akamuleka uwambombo wache kulakula.

⁴ Loli u Eliya akenda isiku lyosi munkolongo. Po akikala mukazundila aka makwi agha vyisilo nukwiputa ukuti ngali afwanga bulo. Akati, “Wee Mwene nayimba mpela! Ngogha bulo, ane te ne mwiza ukubachila abanyenya bane.”

⁵ Po akalambalala mukazundila aka makwi agha vyisilo ghala nukughona utulo. Panapo na panapo uwantumi akamupalamasya nukumubuzya ukuti, “Lamusya, ulye.”

⁶ Bo atalankannya akachennya ichibama ichipiye chili pamabwe agha moto papipi kumutu wache, sona ni sonta iya mizi. Akalya nukung'wela, po akalambalala sona.

⁷ Uwantumi uwa Mwene akiza sona akabubili, akamupalamasya nukumubuzya ukuti, “Nyamuka, ulye pakuti ukwiza pakuba nu bulendo ubutali nkani.”

⁸ Po akanyamuka, akalya nukung'wela. Akakaba amaka pachifukwa icha chakulya chilachila, akenda amasiku 40 umusanya nu busiku mupaka akafika ku Sinayi, kwighamba ilya Chala.

⁹ Kulakula akinjila mumpako nukughonamo ubusiku bulabula. Po u Mwene akamulalusya u Eliya akati, “Wee Eliya, nkimba uli pakubomba choni kuno?”

U Mwene akumubonekela u Eliya

¹⁰ U Eliya akamula akati, “Wee Mwene u Chala Uwamaka Ghosi, ane nakubombelagha nu lweke akabalilo kosi. Loli aba Izilayeli balunangannya ulufingo lwako, bavimongolannya ivighemo vyako, sona babaghoghite abalaghuzi bako. Nasyala nemwene, pope bulo bakulonda pakungogha!”

¹¹ U Mwene akati, “Epamo muno, po bukagha wimilile pamaso papane pighamba, pakuti nkulonda pakudumusannya.” Po impepo iyakoghofya ni yamaka yikazepulannya amaghamba nukughanyampannya amabwe pamaso pa Mwene. Loli u Mwene atakaba mumpepo yilayila. Bo impepo yila yaleka, kukaba akasenyenta. Pope bulo u Mwene atakaba mukasenyenta kalakala.

¹² Bo akasenyenta kala kamala, kukaba umoto, loli u Mwene atakaba mumoto ghulaghula. Bo moto ghula wazima, kukaba ukuteketa.

¹³ Bo u Eliya ivwa ukuteketa kula, akavwinka icheni chache nu mwenda. Po akafuma kuzi nukwimilila pamulyango uwa mpako yila. Akivwa izyu likuti, “Wee Eliya, nkimba uli pakubomba choni kuno?”

¹⁴ U Eliya akamula akati, “Wee Mwene u Chala Uwamaka Ghosi, ane nakubombelagha nu lweke akabalilo kosi. Loli aba Izilayeli balunangannya ulufingo lwako, bavimongolannya ivighemo vyako, sona babaghoghite abalaghuzi bako. Nasyala nemwene, pope bulo bakulonda pakungogha!”

¹⁵ U Mwene akamubuzya akati, “Nyokela kunkolongo iya Damasika, nanti wafika kulakula umupakazye amafuta u Hazayeli ukuti abanje we mwene uwamu Siliya.

¹⁶ Sona umupakazye amafuta u Yehu umwana uwa Nimishi ukuti abanje we mwene uwa ba Izilayeli, umupakazye sona nu Elisha umwana uwa Shafati uwamu Abeli Mehola ukuti akupyane pakuba mulaghuzi.

¹⁷ U Yehu akwiza pakubaghogha abantu bosi babo batakaghoghiwa nu Hazayeli, sona u Elisha akwiza pakubaghogha abantu bosi babo batakaghoghiwa nu Yehu.

¹⁸ Loli nkwiza pakubaleka bumi abantu 7,000 mu Izilayeli. Banaba bo bantu babo batamufughamiliyepo u Baala, pamo ukumufyofyonta.”

Ukwitiziwa ukwa Elisha

¹⁹ U Eliya akepako kulakula, po akamwagha u Elisha umwana uwa Shafati ali pakulima ni nkambaku pakubombezya abajoko 12, sona umwenecho akaba ku nkambaku izyabumalilo. U Eliya akapalamila, akavula inkazo yache nukumuvwika u Elisha.

²⁰ U Elisha akazileka inkambaku zyache zila nukumuchimbilila u Eliya. Po u Elisha akati, “Leka tasi imulaghe utata nu mayi wane, po nkwiza pakubuka nawe.” U Eliya akamula akati, “Chiza bulo, ungabuka.”

²¹ U Elisha akamuleka palapala nukunyokela. Akasendapo inkambaku zyache zibili nukuzighogha, sona akabombezya amakoli pakuba nkwi izyakochela inkambaku zila. Akabapako abantu inyama, po pisinda pache akamukonka u Eliya pakuba mwavwilizi wache.