1 Abamwene 18 - IBAYIBOLO 2024

U Eliya na balaghuzi aba Baala

¹ Bo pachilapo akabalilo, mumwaka uwabutatu uwa lulanga, u Mwene akamubuzya u Eliya akati, “Bukagha pamaso pa Ahabu, po nkwiza pakutuma ivula.”

² Po u Eliya akabuka pamaso pa Ahabu. Pakabalilo kalakala izala yikaba nkulu nkani mu Samaliya.

³ U Ahabu akamwitizya u Obadiya yuyo akaba we songo uwakwenelezya kunyumba iya bumwene. U Obadiya akaba muntu uwa kumwiputa u Mwene.

⁴ Bo u Yezibeli akubaghogha abalaghuzi aba Mwene, u Obadiya akabasenda abalaghuzi 100 nukubafisa mumpako zibili, kokuti akabafisa abalaghuzi 50 mumpako yoka, sona abalaghuzi 50 mumpako iyinji. Akabapanga ichakulya na mizi.

⁵ U Ahabu akamubuzya u Obadiya akati, “Wendele ichisu chosi ukuti wennye imbwibwi zyosi na makombe ghosi. Lumo tungalyagha isote limo ilyakudimilapo ifalasi ni mpunda umwakuti zibanje nubumi.”

⁶ Po bakachigaba ichisu chila ukuti umuntu wesi endelaye ichigaba choka. U Ahabu akabuka kulubazu loka, wepe u Obadiya akabuka kulubazu ulunji.

⁷ Bo u Obadiya akwenda, akakomana nu Eliya. U Obadiya akamumanya, po akafughama bo icheni chache chikotamiye pasi nukumulalusya ukuti, “Fwandi naloli wewe mwene wane u Eliya?”

⁸ U Eliya akamula akati, “Nene. Bukagha umubuzye u mwene wako uti, ‘U Eliya ali kuno.’ ”

⁹ U Obadiya akamula akati, “Nkimba nananga choni ane ne wambombo wako, umwakuti ukulonda pakumbika munyobe izya Ahabu ukuti angoghe?

¹⁰ Nkulapa pamaso pa Mwene u Chala wako umumi ukuti lutalipo uluko pamo ubumwene bubo u mwene wane atatumiteko abantu pakukulondelezya. Nanti uluko pamo abantu aba bumwene bumo bakunena ukuti utaliko kulakula, akubalapizya abantu balabala ukuti naloli utalimo muchisu chila.

¹¹ Loli ilelo ukukumbusya ukuti imbuke pakumubuzya u mwene wane ukuti, ‘U Eliya ali kuno.’

¹² Ntamenyeko kuko u Muzimu uwa Mwene akwiza pakubuka nawe, bo nepapo pano. Buli nanti nabuka pakumubuzya u Ahabu, po atakwaghapo, naloli atakwiza pakungogha? Ane ne mubombi wako namwiputagha u Mwene ukwanda ku bulumendo bwane.

¹³ Nkimba utivuye zizyo nkabomba bo u Yezibeli akubaghogha abalaghuzi aba Mwene? Nkabafisa abalaghuzi 100 aba Mwene, kokuti nkabafisa abalaghuzi 50 mumpako yoka, sona abalaghuzi 50 mumpako iyinji. Nkabapa ichakulya na mizi.

¹⁴ Po ukundamula ukuti imbuke kwa mwene wane nukumubuzya ukuti, ‘U Eliya ali kuno.’ Akwiza pakungogha!”

¹⁵ U Eliya akamula akati, “Nkulapa pamaso pa Mwene Uwamaka Ghosi umumi, yuyo nkumubombela ukuti naloli ilelo nkwiza pakukomana nu mwene u Ahabu pamaso na pamaso.”

¹⁶ Po u Obadiya akabuka pakukomana nu Ahabu nukumubuzya ukuti u Eliya iza, po u Ahabu wepe akabuka pakukomana nu Eliya.

¹⁷ Bo u Ahabu amwennya u Eliya, akamubuzya akati, “Nkimba naloli wewe ukupela intamyo mu Izilayeli?”

¹⁸ U Eliya akamula akati, “Ane ntakupela intamyo mu Izilayeli. Loli awe na bamunyumba yako mukupela intamyo mu Izilayeli. Pakuti mwaghasula amalamulo agha Mwene nukumukonka u Baala.

¹⁹ Losi ulu ubitizye aba Izilayeli bosi ukuti bize pakukomana nane pighamba ilya Kalimeli. Wize na balaghuzi 450 aba Baala, sona na balaghuzi 400 aba Ashela, babo bakulya poka nu Yezibeli pitebulo lyache.”

²⁰ Po u Ahabu akabitizya aba Izilayeli bosi, poka na balaghuzi aba Baala ukuti babungane pighamba ilya Kalimeli.

²¹ U Eliya akimilila pantazi pabantu bala nukubalalusya ukuti, “Nkimba mukwiza pakwilamwa mupaka liyi? Nanti u Mwene we Chala, mumubombelaye. Loli nanti u Baala we Chala, mumubombelaye.” Abantu bala batakamulapo nachimochimo.

²² Po u Eliya akati, “Ane ne mulaghuzi mwene uwa Mwene yuyo asyala, loli u Baala ali na balaghuzi 450.

²³ Mwize ni nkambaku zibili kuno. Baleke bisalile bene inkambaku yoka, bayidumulannye muvipuza, po bavilambalike pankwi, loli batakakozyanje umoto. Nane bulo nkwiza pakuyidumulannya muvipuza inkambaku iyinji yila, sona nkwiza pakuvilambalika pankwi, loli ntakwiza pakukozya umoto.

²⁴ Po mumwitizye u chala winyu, nane nkwiza pakumwitizya u Mwene. Uchala yuyo akwiza pakwamula numoto kokuti we Chala.” Po abantu bosi bakamula bakati, “Wanena akiza bulo.”

²⁵ U Eliya akabalamula abalaghuzi aba Baala akati, “Pakuti mwe binji musale tasi inkambaku yoka nukuyibola. Mumwitizye uchala winyu, loli mutakakozye umoto.”

²⁶ Po bakasenda inkambaku yiyo bakayisala nukuyibola. Bakamwitizya u Baala ukwandila pandabindabi mupaka pamusanya ukuti abakozezye umoto. Bakatinji, “Wee Baala, twamule.” Loli atakabapo nayumoyumo uwakubamula, kukaba bulo myee. Bakimbagha umwakuzyungulila ichighemo chicho bakazenga.

²⁷ Pamusanya u Eliya akanda pakubobezya ukuti, “Kolomokagha nkani! Naloli we chala, te momumo? Lumo ali pakwinong'ona ivintu ivyinji, pamo ali pakwiyavwa mwene, pamo achulite. Lumo aghonite po akulonda ukuti mumulamusye.”

²⁸ Po bakakolomoka nkani nukwibolannyabolannya na bapanga, sona ni mpalala ukuyana ni nyiho zyabo mupaka ibanda likafuma.

²⁹ Bo umusanya wachila bakakolomoka mupaka pakabalilo akakubikila ivyakwiyipa ivya kuchamabwila, pope bulo kukaba bulo myee, atakabapo nayumoyumo uwakubamula pamo uwakubateghelezya.

³⁰ Po u Eliya akabalamula abantu bosi bala akati, “Palamila kuno.” Abantu bala bakapalamila, po akachiyannya sona ichighemo icha Mwene chicho chikamongoliwa.

³¹ U Eliya akasenda amabwe 12 ukuyana nuluko, ghagho ghali namatabwa agha bana aba Yakobo, yuyo u Mwene akamubuzya ukuti, “Itabwa lyako likwiza pakuba we Izilayeli.”

³² Akaghabombezya amabwe ghala pakuzengela sona ichighemo icha Mwene, po akakumba ichiliba umwakuzyungulila ichighemo chila chicho chingizula amalita 15 agha mizi.

³³ Akabika inkwi pachighemo pala, sona akayidumulannya inkambaku yila muvipuza nukuvilambalika pankwi zila. Po akabalamula akati, “Izuzya isonta folo na mizi nukughapungulila pa chakwiyipa chicho chili pankwi.”

³⁴ Po akabalamula akati, “Bomba sona.” Abantu bala bakachibomba sona. Akabalamula akati, “Bomba sona akabutatu.” Po abantu bala bakachibomba akabutatu.

³⁵ Amizi ghala ghakenda umwakuzyungulila ichighemo, po ichiliba chila chikizula.

³⁶ Pakabalilo akakubikila ichakwiyipa umulaghuzi u Eliya akiza pantazi nukwiputa ukuti, “Wee Mwene u Chala uwa Abulahamu nuwa Yisaki nuwa Yakobo, ilelo chimanyikwe ukuti awe we Chala uwa ba Izilayeli sona nukuti ane ne mubombi wako. Ane nabomba zyosi zinizi pachifukwa ichakuti ukandamula.

³⁷ Wee Mwene nyamula! Unyamule umwakuti abantu banaba bamanye ukuti awe we Mwene we Chala, sona nukuti ukubanyosezya sona kukwako.”

³⁸ Po u Mwene akawisizya umoto pa chakwiyipa ichakocha na pankwi sona napa mabwe na pachisu, umoto ghula ghukakamula amizi muchiliba mula.

³⁹ Bo abantu bosi bennya zinizi bakafughama, bo ivyeni vyabo vikotamiye pasi nukulila ukuti, “U Mwene we Chala! U Mwene we Chala!”

⁴⁰ Po u Eliya akabalamula akati, “Baleme abalaghuzi aba Baala. Atakabepo nayumoyumo uwakuchimbila!” Po bakalema, sona u Eliya akabuka nabo kwikombe ilya Kishoni nukubaghoghela kulakula.

Ukumala ukwa lulanga

⁴¹ Po u Eliya akamubuzya u Ahabu akati, “Bukagha pakulya nukung'wela, pakuti nkwivwa ichongo icha vula.”

⁴² U Ahabu akabuka pakulya nukung'wela, loli u Eliya akakwela pamwanya pighamba ilya Kalimeli, akafughama nukubika umutu wache pakasi pavimpevu vyache.

⁴³ Akamulamula uwambombo wache akati, “Buka wennye kunyanja.” Uwambombo yula akabuka pakwennya. Po akamubuzya akati, “Kutaliko ichintu nachimochimo.” U Eliya akanena akaseveni akati, “Nyokela.”

⁴⁴ Akaseveni uwambombo yula akamubuzya akati, “Nkwennya akabingu akanandi nkani kakukwela mumwanya panyanja ngati chikufi icha muntu.” Po u Eliya akamulamula akati, “Buka umubuzye u Ahabu uti, ‘Pinya ingolo yako nukubwela bo ivula yitakwighaliye.’ ”

⁴⁵ Pakabalilo kalakala kumwanya kukaba amabingu amafitu, sona impepo yikanda pakukuka. Po ivula iyamaka yikanda pakutima. U Ahabu akakwela mungolo yache nukubuka ku Yezileli.

⁴⁶ U Mwene akamupa u Eliya amaka, akavunga inkazo nukuyipinya nu lamba wache nukuchimbila nkani, mupaka akafika ku Yezileli, bo u Ahabu atafikite.