1 Abamwene 17 - IBAYIBOLO 2024

U Eliya akulaghula nizya lulanga

¹ Pakabalilo kalakala umulaghuzi u Eliya umu Tishibi uwamu Giliyadi akamubuzya u mwene u Ahabu akati, “Nkulapa pamaso pa Mwene u Chala umumi uwa Izilayeli, yuyo nkumubombela ukuti patakwiza pakubako inganda pamo ivula amaka matatu ghagho ghakwiza.”

² Po u Mwene akamubuzya u Eliya akati,

³ “Epako kuno, ubuke pakuvwama mulusoko ulwa Keliti, kubufumilo bwizuba ubwa lusoko ulwa Yolodani.

⁴ Ung'welaye amizi agha mulusoko lulalula, sona nabalamula abachigobe ukuti bakupanje ivyakulya.”

⁵ Po u Eliya akabomba vivyo u Mwene akamubuzya. Akabuka kulusoko ulwa Keliti, kubufumilo bwizuba ubwa lusoko ulwa Yolodani nukwikala kulakula.

⁶ Pandabindabi na pachamabwila posi abachigobe bakamwizilagha ni vibama ni nyama, po akang'welagha amizi mulusoko lulalula.

⁷ Bo pachilapo akabalilo, ulusoko lula lukakamuka pachifukwa ichakuti ivula yitakatimagha.

U Eliya nu mukolo umufwilwe uwamu Zalefati

⁸ Po u Mwene akamubuzya u Eliya akati,

⁹ “Bukagha kukaya akakulu aka Zalefati, papipi nakaya aka Sidoni nukwikala kulakula. Ane namulamula umukolo umufwilwe yuyo akwikala kulakula ukuti akupanje ivyakulya.”

¹⁰ U Eliya akabuka ku Zalefati, sona bo afika pamulyango uwa kaya akamwennya umukolo umufwilwe ali pakutenya inkwi. Po akamubuzya akati, “Nalamba, umpeko amizi aghakung'wela?”

¹¹ Bo akubuka pakusemba amizi ghala, akamwitizya akati, “Nalamba, unsendeleko sona akachibama?”

¹² Umukolo yula akamula akati, “Nkulapa pamaso pa Mwene u Chala wako umumi ukuti inte ni chibama nachimochimo. Loli chene chicho indi nacho busu bunandi bulo musonta namafuta manandi bulo agha misyunguti mulubako. Indi pakutenya bulo inkwi ukuti impiye ichakulya ichane nu mwana wane ukuti tulye, po tufwanje.”

¹³ U Eliya akamwamula akati, “Utakanyilaye. Buka upiye ichakulya chako. Loli unjanizizye tasi akachibama kanandi bulo aka busu bubo uli nabo nukwiza nako kuno, po pisinda pache wipiyile wemwene nu mwana wako.

¹⁴ Pakuti u Mwene u Chala uwa Izilayeli akuti, ‘Ubusu butakwiza pakumalamo nalumo musonta, sona amafuta ghope ghatakwiza pakumalamo nalumo mulubako mupaka pisiku lilyo ane ne Mwene nkwiza pakutuma ivula.’ ”

¹⁵ Umukolo umufwilwe yula akabuka nukubomba zizyo u Eliya akamubuzya. Po pakaba ichakulya ichakukwana umwakuti u Eliya nu mukolo yula, poka na bamunyumba yache bakalya amasiku aminji nkani.

¹⁶ Ubusu butakamalamo musonta mula, sona ghope amafuta ghatakamalamo mulubako ukuyana namumo u Mwene akamubuzizya u Eliya.

¹⁷ Bo pachilapo akabalilo, umwana uwa mukolo umufwilwe yula akabina nkani. Ububine bula bukakulilaghakulilagha, umwakuti pabumalilo akafwa.

¹⁸ Umukolo yula akamubuzya u Eliya akati, “Wee muntu uwa Chala, nkimba choni chicho wambombela bunubu? Fwandi wizite kuno pakunkumbusya imbibi zyane nukungoghela umwana wane?”

¹⁹ U Eliya akamwamula umukolo yula akati, “Zagha nawe kuno umwana wako.” Po u Eliya akamusenda umwana yula bo unyina amupakatite nukubuka nawe muchipinda ichapamwanya mumo akaghonagha, nukumughoneka pachitala.

²⁰ U Eliya akiputa kwa Mwene akati, “Wee Mwene Chala wane, nkimba choni chicho wamubombela ichintu ichakoghofya umukolo umufwilwe uyu? Umukolo yunuyu akunsungilila akiza nkani, sona ilelo ukumughogha umwana wache.”

²¹ Po u Eliya akamufutila umwana yula katatu nukwiputa ukuti, “Wee Mwene u Chala wane, nyosezya mumo ubumi ubwa mwana uyu!”

²² U Mwene akivwa ulwiputo ulwa Eliya, po umwana yula akanda pakufuta nukuba sona mumi.

²³ U Eliya akamusenda umwana yula nukubuka nawe muchipinda ichapasi pakumupa unyina, po akamubuzya akati, “Umwana wako uyu mumi!”

²⁴ Po umukolo yula akamubuzya u Eliya akati, “Ilelo nazimanya ukuti naloli we muntu uwa Chala, sona nukuti u Mwene akunenagha nawe.”