1 Abamwene 16 - IBAYIBOLO 2024

¹ U Mwene akanena nu mulaghuzi u Yehu umwana uwa Hanani ukuti amubuzye u Baasha amazyu aghakuti,

² “Nkakukwezya nukukwefya pachintuntululu ukuti ubanje we mulongozi uwa bantu bane aba Izilayeli. Loli awe ukabomba vivyo u Yelobowamu akabomba, nukubapela abantu bane aba Izilayeli ukuti banangaye. Po bankalalizya nkani pachifukwa icha mbibi zyabo.

³ Polelo nkwiza pakumuzimizya u Baasha poka na bosi abamunyumba yache, ukuyana namumo nkabazimizizya abamunyumba iya Yelobowamu umwana uwa Nebati.

⁴ Imbwa zikwiza pakubalya bosi abamunyumba iya Baasha, babo bakufwila mukaya akakulu nkani, sona iviyuni vikwiza pakubazong'ompola abantu babo bakwiza pakufwila kuzi ukwa kaya.”

⁵ Imbombo zyosi zizyo u Baasha akabomba, ni mbombo zyache izyamaka zisimbiwe mwibuku ilya Mbili iya bamwene aba ba Izilayeli.

⁶ U Baasha akafwa nukusyiliwa mu Tiliza. Po umwana wache u Ela akamupyana pakuba we mwene.

⁷ Pope bulo u Mwene akanena sona nu mulaghuzi u Yehu umwana uwa Hanani ukuti amubuzye u Baasha na bamunyumba yache, pachifukwa icha mbibi zyosi zizyo u Baasha akabomba pamaso pa Mwene. Akamukalalizya u Mwene, te pachifukwa chene ichakuti akananga ukuyana namumo u Yelobowamu akanangila awe, loli pachifukwa ichakuti akabaghogha bosi abamunyumba iya Yelobowamu.

U mwene u Ela akulaghila mu Izilayeli

⁸ Mumwaka uwa 26 bo u Asa akulaghila mu Yuda, u Ela umwana uwa Baasha akaba we mwene uwamu Izilayeli, sona akalaghila amaka mabili bo ali mu Tiliza.

⁹ Po u Zimuli yuyo likaba likambala lyache, ilyakwenelezya ingolo zyache zimo, akabatika nizya kumughogha u Ela. Isiku limo u Ela akaba mu Tiliza, akang'wela nukukolwa munyumba iya Aliza, usongo uwa kunyumba iya bumwene.

¹⁰ U Zimuli akinjila munyumba mula, nukumughogha u Ela, po akamupyana pakuba we mwene. Zinizi zikabombiwa mumwaka uwa 27 bo u Asa akulaghila mu Yuda.

¹¹ Bo u Zimuli anda bulo pakulaghila, akabaghogha bosi abamunyumba iya Baasha. Atakamulekapo nayumoyumo umwanavuli manyi mukamu wache manyi mumanyani wache.

¹² Po u Zimuli akabazimizya abamunyumba iya Baasha, ukuyana namumo u Mwene akamubuzizya umulaghuzi u Yehu.

¹³ Zinizi zikaba bunubu pachifukwa icha mbibi izya Baasha nu mwana wache u Ela zizyo bakabomba, nukubapela aba Izilayeli ukuti bope banangaye. Po bakamukalalizya u Mwene, u Chala uwa Izilayeli, pachifukwa icha kwiputa ivifwani.

¹⁴ Imbombo zyosi zizyo u Ela akabomba zisimbiwe mwibuku ilya Mbili iya bamwene aba ba Izilayeli.

U mwene u Zimuli akulaghila mu Izilayeli

¹⁵ Mumwaka uwa 27 bo u Asa akulaghila mu Yuda, u Zimuli akaba we mwene uwamu Izilayeli. Po akalaghila amasiku seveni bo ali mu Tiliza. Pakabalilo kalakala abasilikali aba ba Izilayeli bakazenga ivisakasa vyabo papipi nakaya aka Gibetoni, kako kakaba kaya akakulu aka ba Filisiti.

¹⁶ Loli bo aba Izilayeli bivwa ukuti u Zimuli akamusambukila u mwene nukumughogha, bakamusala u Omuli yuyo akaba we songo uwa basilikali ukuti abanje we mwene uwamu Izilayeli pisiku lilalila.

¹⁷ Po u Omuli poka na basilikali bache bakepamo mu Gibetoni nukubuka pakulwa ubwite nakaya akakulu nkani aka Tiliza.

¹⁸ Bo u Zimuli ennya ukuti akaya kala kafyuliwa, akachimbilila kwilinga munyumba iya bumwene, nukuyocha inyumba yila bo ali mulamula. Po akafwila mulamula,

¹⁹ pachifukwa icha mbibi zizyo akabomba pamaso pa Mwene ukuyana namumo u Yelobowamu akabombela, nukubapela aba Izilayeli ukuti bope banangaye.

²⁰ Imbombo zyosi zizyo u Zimuli akabomba, sona nukusambukila kwache visimbiwe mwibuku ilya Mbili iya bamwene aba ba Izilayeli.

U mwene u Omuli akulaghila mu Izilayeli

²¹ Pakabalilo kalakala aba Izilayeli bakagabinkana mutubukatila tubili. Akabukatila koka kakamulondagha u Tibini umwana uwa Ginati ukuti abanje wemwene, sona akabukatila akanji kakamukonkagha u Omuli.

²² Loli akabukatila aka Omuli kakaba kamaka nkani ukukachila akabukatila aka Tibini umwana uwa Ginati. Pabumalilo u Tibini akafwa, po u Omuli akaba we mwene.

²³ Mumwaka uwa 36 bo u Asa akulaghila mu Yuda, u Omuli akaba we mwene uwamu Izilayeli. Po akalaghila amaka 12, kokuti akalaghila amaka sikisi bo ali mu Tiliza.

²⁴ Akaghula ighamba ilya Samaliya kwa Shemeli ni salabazya 6,000 izya siliva. Po akazengapo akaya akakulu nkani nukukita ukuti Samaliya, lilyo likaba itabwa ilya Shemeli, yuyo pakwanda akaba mwenecho uwa ighamba lila.

²⁵ Loli u Omuli akananga pamaso pa Mwene ukubachila abamwene bosi babo bakabapo kale.

²⁶ Akabomba vivyo u Yelobowamu umwana uwa Nebati akabomba, nukubapela aba Izilayeli ukuti bope banangaye. Po bakamukalalizya nkani u Mwene u Chala uwa ba Izilayeli pachifukwa icha kwiputa ivifwani.

²⁷ Imbombo zyosi zizyo u Omuli akabomba, sona na zyosi zizyo akakwanilisya zisimbiwe mwibuku ilya Mbili iya bamwene aba ba Izilayeli.

²⁸ U Omuli akafwa nukusyiliwa mu Samaliya. Po umwana wache u Ahabu akamupyana pakuba we mwene.

U mwene u Ahabu akulaghila mu Izilayeli

²⁹ Mumwaka uwa 30 bo u Asa akulaghila mu Yuda, u Ahabu umwana uwa Omuli akaba we mwene uwamu Izilayeli. Po akalaghila mu Izilayeli amaka 32 bo ali mu Samaliya.

³⁰ U Ahabu umwana uwa Omuli akananga pamaso pa Mwene ukubachila abamwene bosi babo bakabapo kale.

³¹ Loli u Ahabu akabomba vivyo u mwene u Yelobowamu akabomba. Akananga nkani pakumusenda u Yezibeli umwana uwa mwene u Etibala umu Sidoni pakuba muchi wache. Po akanda pakumwiputa nukumubombela u Baala.

³² Akamuzengela ichighemo u Baala munyumba iyakwiputilamo, yiyo akayizenga mukaya akakulu nkani aka Samaliya.

³³ U Ahabu akapanga ichifwani icha Ashela, sona akabomba ivintu ivyinji ivibibi ukubachila abamwene abanji bosi babo bakabapo kale mu Izilayeli, vivyo vikamukalalizya u Mwene u Chala uwa ba Izilayeli.

³⁴ Pakabalilo aka Ahabu, u Heyeli uwamu Beteli akakazenga sona akaya akakulu nkani aka Yeliko. Ukatote wache u Abilamu akafwa pakabalilo kako akala ulwalo ulwa kaya akakulu nkani aka Yeliko. Po unkwangu wache u Segubi wepe akafwa pakabalilo kako akazenga imilyango iya kaya kala, ukuyana namumo u Mwene akamubuzizya u Yoshwa umwana uwa Nuni.