1 Abamwene 15 - IBAYIBOLO 2024

U mwene u Abiya akulaghila mu Yuda

¹ Mumwaka uwa 18, bo u Yelobowamu umwana uwa Nebati akulaghila, u Abiya akaba we mwene uwamu Yuda,

² sona akalaghila amaka matatu bo ali mu Yelusalemu. Unyina akaba we Maaka umwana uwa Abisalomu.

³ U Abiya wepe akananga ukuyana namumo uwise akanangila. Atakaba muntu musubiliwa kwa Mwene u Chala wache nu moyo wache ghosi ukuyana namumo umunyenya wache u Devedi akabela.

⁴ Loli pachifukwa icha Devedi, u Mwene u Chala wache akamupa u Abiya umwana uwakuti amupyane pakuba we mwene mu Yelusalemu, sona nukuti akasungilile akiza akaya akakulu nkani aka Yelusalemu.

⁵ Pakuti u Devedi akabomba ingolosu pamaso pa Mwene, sona akaghakonka amalamulo agha Mwene pakabalilo kosi aka bumi bwache, loli inongwa yene iya Uliya umu Hiti.

⁶ Pakaba ubwite ubusita kumala pakasi pa Lehobowamu nu Yelobowamu pakabalilo kosi aka bumi ubwa Abiya.

⁷ Imbombo zyosi zizyo u Abiya akabomba zisimbiwe mwibuku ilya Mbili iya bamwene aba ba Yuda. Pakaba ubwite pakasi pa Abiya nu Yelobowamu.

⁸ U Abiya akafwa nukusyiliwa mukaya aka Devedi mu Yelusalemu. Po umwana wache u Asa akamupyana pakuba we mwene.

U mwene u Asa akulaghila mu Yuda

⁹ Mumwaka uwa 20, bo u mwene u Yelobowamu akulaghila mu Izilayeli, u Asa akaba we mwene uwamu Yuda.

¹⁰ U Asa akalaghila amaka 41 bo ali mu Yelusalemu. Unyinakulu akaba we Maaka umwana uwa Abisalomu.

¹¹ U Asa akabomba ingolosu pamaso pa Mwene ngati mumo akabombela umunyenya wache u Devedi.

¹² U Asa akabefya abamalaya abanavuli bosi mubuzilo ubwakwiputilamo muchisu chila, sona akefya ivifwani vyosi vivyo abanyenya bache bakapanga.

¹³ Akamwefyapo u nyinakulu u Maaka pabumwene, pachifukwa ichakuti akapanga ichifwani ichamwiko icha Ashela umwakuti achiputaye. U Asa akachidumulannya ichifwani chila nukuchochela mwikombe ilya Kidiloni.

¹⁴ Napapo u Asa atakabwefya ubuzilo ubwapamwanya ubwakwiputilapo ivifwani, loli akamusubila u Mwene mubumi bwache bosi.

¹⁵ U Asa akabika sona usiliva nu golide mu Nyumba iya Mwene, poka ni vibombelo vyosi vivyo yuyo nu wise bakavipaghulila kwa Mwene.

¹⁶ Pakaba ubwite ubusita kumala pakasi pa Asa nu mwene u Baasha uwamu Izilayeli pakabalilo kosi aka bulaghili bwabo.

¹⁷ U mwene u Baasha uwamu Izilayeli akabuka pakulwa ubwite na bantu aba mu Yuda, po akakazengela ilinga akaya akakulu nkani aka Lama, umwakuti atakabepo nayumoyumo umuntu uwakwepamo pamo uwakwinjilamo muchisu icha Yuda bo u mwene u Asa akulaghila.

¹⁸ Po u Asa akasenda usiliva nu golide wesi yuyo akasyala muvipinda ivyakusungilamo ivintu ivya mu Nyumba iya Mwene, sona na munyumba yache iya bumwene. Akaghatuma amakambala ghache pakumubika ku Damasika kwa mwene u Beni Hadadi uwamu Siliya, umwana uwa Tabulimoni, poka nu mwizukulu uwa Heziyoni na mazyu aghakuti,

¹⁹ “Zagha tufinge ngati mumo abanyenya bitu bakafingila. Ane nkukutumila ichabupi icha siliva nu golide, po losi ulu mazya ubumanyani bwako nu Baasha u mwene uwamu Izilayeli umwakuti efyemo abasilikali bache muchisu chane.”

²⁰ U Beni Hadadi akivwana nu mwene u Asa nukubatuma abasongo aba basilikali pakulwa ubwite nutwaya utukulu utwa mu Izilayeli. Po akakapota akaya aka Iyoni naka Dani naka Abeli Beti Maaka, poka ni chigaba chosi icha Nyanja iya Galileya, poka ni chisu icha Nafutali.

²¹ Bo u Baasha ivwa zinizi akaleka pakukazenga akaya akakulu nkani aka Lama, po akasamila ku Tiliza.

²² Po u mwene u Asa akabalamula abantu bosi aba mu Yuda, sona atakabapo uwakusyala ukuti befyemo mu Lama amabwe na matabwa, ghagho u Baasha akabombezya pakuzengela akaya akakulu nkani aka Mizipa naka Geba mu Benjamini.

²³ Imbombo zyosi zizyo u mwene u Asa akabomba, ni mbombo zyache izyamaka, sona nutwaya tuto akazenga, visimbiwe mwibuku ilya Mbili iya bamwene aba ba Yuda. Loli bo aghosipa akabinagha ivinama.

²⁴ U Asa akafwa nukusyiliwa mukaya aka Devedi mu Yelusalemu. Po umwana wache u Yehoshafati akamupyana pakuba we mwene.

U mwene u Nadabu akulaghila mu Izilayeli

²⁵ Mumwaka uwabubili bo u mwene u Asa akulaghila mu Yuda, u Nadabu umwana uwa Yelobowamu akaba we mwene uwamu Izilayeli, sona akalaghila amaka mabili.

²⁶ U Nadabu wepe akananga pamaso pa Mwene ukuyana namumo uwise akabombelagha, umwakuti akabapela bope aba Izilayeli ukuti banangaye.

²⁷ U Baasha umwana uwa Ahiya, yuyo akaba waluko ulwa Isakala akabatika nizya kumusambukila u Nadabu. Po akamughoghela mu Gibetoni, kako kakaba kaya aka ba Filisiti, bo u Nadabu poka naba Izilayeli bakulwa ubwite nakaya aka Gibetoni.

²⁸ U Baasha akamughogha u Nadabu mumwaka uwabutatu bo u mwene u Asa akulaghila mu Yuda. Po u Baasha akamupyana u Nadabu pakuba we mwene uwamu Izilayeli.

²⁹ Bo u Baasha aba bulo we mwene, akabaghogha bosi abamunyumba iya Yelobowamu. Atakamulekapo mumi umuntu nayumoyumo, loli akabaghogha bosi ukuyana namumo u Mwene akanenela ukwendela mu mubombi wache u Ahiya uwamu Shilo.

³⁰ Zinizi zikaba bunubu pachifukwa icha mbibi zizyo u Yelobowamu akabomba pakubapela aba Izilayeli ukuti bope banangaye. Po bakamukalalizya nkani u Mwene, u Chala uwa Izilayeli.

³¹ Imbombo zyosi zizyo u Nadabu akabomba zisimbiwe mwibuku ilya Mbili iya bamwene aba ba Izilayeli.

³² Pakaba ubwite ubusita kumala pakasi pa mwene u Asa nu mwene u Baasha uwamu Izilayeli pakabalilo kosi aka bulaghili bwabo.

U mwene u Baasha akulaghila mu Izilayeli

³³ Mumwaka uwabutatu bo u Asa akulaghila mu Yuda, u Baasha akaba we mwene uwamu Izilayeli umwana uwa Ahiya, po akalaghila amaka 24 bo ali mu Tiliza.

³⁴ U Baasha wepe akananga pamaso pa Mwene, ukuyana namumo u Yelobowamu akabombela pakubapela aba Izilayeli ukuti bope banangaye.