1 Abamwene 14 - IBAYIBOLO 2024

Ubufwe ubwa mwana uwa Yelobowamu

¹ Pakabalilo kalakala u Abiya umwana uwa Yelobowamu akabinagha.

² U Yelobowamu akamubuzya umuchi wache akati, “Wiyandule wemwene umwakuti abantu batakakumanye ukuti we muchi uwa Yelobowamu. Po ubuke ku Shilo ku mulaghuzi u Ahiya, umuntu yuyo akambuzya ukuti nkwiza pakuba ne mwene uwa Izilayeli.

³ Usendeko ivibama teni, ni vitumbuwa, sona nu lubako ulwa buchi. Po akwiza pakukubuzya zizyo zikwiza pakumuwila umulumendo uyu.”

⁴ Po umuchi uwa Yelobowamu akabomba vivyo akamubuzya nukubuka kunyumba iya Ahiya mu Shilo. Pakabalilo kalakala amaso gha Ahiya ghakafwa pachifukwa ichakuti akaba muntu umughosi nkani.

⁵ Loli u Mwene akamubuzya u Ahiya akati, “Umuchi uwa Yelobowamu akwiza, bo iyanduye mwene ngati po mukolo uyunji bulo pakukulalusya nizya mwana wache umubine. Umwamule vivyo nkwiza pakukubuzya.”

⁶ Loli bo u Ahiya ivwa umulinto wache bo akwinjila pamulyango akati, “Injila, nkumenye awe we muchi uwa Yelobowamu. Nkimba choni chicho wiyanduye wemwene ngati po muntu uyunji bulo? Indi na mazyu agha chitima aghakuti nkubuzye.

⁷ Buka umubuzye u Yelobowamu ukuti u Mwene u Chala uwa ba Izilayeli ati, ‘Nkakusala pakasi pabantu, sona nkakupakazya ukuti ubanje we mulongozi uwa bantu bane aba Izilayeli.

⁸ Nkabafyula abaluko ulwa Devedi ubumwene. Loli awe utayanite nu mubombi wane u Devedi, yuyo akaghasunga amalamulo ghane nukunyivwila nu moyo wache ghosi pakubomba ingolosu pamaso papane.

⁹ Awe wabomba imbibi inkulu nkani ukubachila abantu babo bakabako kale. Wipangiye wemwene abachala abanji, ni vifwani ivya chela. Bunubu wankalalizya nkani, sona wampa inkonto.

¹⁰ “ ‘Polelo nkwiza pakubawisizya intamyo abamunyumba iya Yelobowamu. Nkwiza pakubazimizya abaluko lwache bosi abalumendo mu Izilayeli, manyi bazya manyi babuke. Nkwiza pakubocha ngati mumo umuntu akuyochela isakwi mupaka yimale yosi.

¹¹ Imbwa zikwiza pakubalya bosi abamunyumba iya Yelobowamu babo bafwiliye mukaya akakulu nkani, sona iviyuni vikwiza pakubazong'ompola abantu babo bafwiliye munkolongo. Ane ne Mwene, nanena.’

¹² “Polelo bwelagha. Bo ukwinjila bulo mukaya akakulu nkani, umwana wako akwiza pakufwa.

¹³ Aba Izilayeli bosi bakwiza pakumulila nukumusyila. Loli yuyo mwene uwa munyumba iya Yelobowamu we akwiza pakusyiliwa akiza, pachifukwa ichakuti u Mwene u Chala uwa Izilayeli ahobokite nawe.

¹⁴ “U Mwene akwiza pakwisalila u mwene uwakuti abalaghilaye aba Izilayeli, sona yuyo akwiza pakubazimizya abamunyumba iya Yelobowamu. Ichi chikwiza pakubombiwa lunulu.

¹⁵ U Mwene akwiza pakubafunda aba Izilayeli, umwakuti bakwiza pakuneng'ena ngati lutete mumizi. Akwiza pakubanyunkulamo muchisu ichiza chicho akabapa abanyenya babo, nukubanyampanizizya mupaka kulusoko ulwa Yufuleti, pachifukwa ichakuti bakamukalalizya u Mwene pakwipangila ivifwani ivya Ashela.

¹⁶ U Mwene akwiza pakubakana aba Izilayeli pachifukwa icha kunanga ukwa Yelobowamu nukubapela aba Izilayeli ukuti bope banangaye.”

¹⁷ Po umuchi uwa Yelobowamu akanyamuka nukunyokela ku Tiliza. Bo afika bulo pamulyango, umwana yula akafwa.

¹⁸ Aba Izilayeli bakamulila umwana yula nukumusyila ukuyana namumo u Mwene akanenela ukwendela mu mubombi wache umulaghuzi u Ahiya.

Ubufwe ubwa Yelobowamu

¹⁹ Imbombo zyosi zizyo u Yelobowamu akabomba nu bwite bubo akalwanga, sona nu bulaghili bwache, visimbiwe mwibuku ilya Mbili iya bamwene aba ba Izilayeli.

²⁰ U Yelobowamu akalaghila amaka 22, po akafwa. Umwana wache u Nadabu akamupyana pakuba we mwene.

U mwene u Lehobowamu akulaghila mu Yuda

²¹ U Lehobowamu umwana uwa Solomoni akaba we mwene uwa chisu icha Yuda. Akaba na maka 41 pakabalilo kako akimikiwanga pakuba we mwene, sona akalaghila amaka 17 bo ali mu Yelusalemu mukaya akakulu nkani aka Mwene kako akakasala pakasi pa inko zyosi izya Izilayeli pakuba buzilo ubwakuti bamuchindikilayemo. Unyina akaba we Naama umu Amoni.

²² Abantu aba mu Yuda bakamunangila nkani u Mwene. Pachifukwa icha mbibi zizyo bakabomba, bakamukalalizya nkani u Mwene ukuchila namumo abanyenya babo bakabombela.

²³ Bakizengela ubuzilo ubwapamwanya ubwakwiputilapo ivifwani pighamba, na mabwe amapaghuliwa, sona ni vifwani ivya Ashela pamwanya pighamba lyosi, sona na muntende mumakwi ghagho ghavwinkite akiza.

²⁴ Pakabapo sona abanavuli babo bakabombagha ubwamalaya pabuzilo ubwapamwanya ubwakwiputilapo ivifwani muchisu chilachila. Abantu bakabomba ivintu ivyamwiko ivya inko zizyo u Mwene akazichimbizya pamaso paba Izilayeli.

²⁵ Mumwaka uwa 15, bo u mwene u Lehobowamu akulaghila, u mwene u Shishaki uwamu Ijiputi akalwa ubwite nakaya akakulu nkani aka Yelusalemu.

²⁶ Akasenda ubukabi bosi mu Nyumba iya Mwene, sona na bukabi ubwa munyumba iya bumwene. Akasenda ivintu vyosi, poka ni ngulu izya golide zizyo u Solomoni akapanga.

²⁷ Po u mwene u Lehobowamu akapanga ingulu izya mukuba nukuzipyanizya papo, nukubapa abasongo aba balindilili aba pamulyango uwa nyumba iya bumwene.

²⁸ Akabalilo kosi nanti u mwene akubuka ku Nyumba iya Mwene, abalindilili bala bakanyamulagha ingulu zila, po pisinda pache bakazinyosezya muchipinda icha balindilili.

²⁹ Imbombo zyosi zizyo u Lehobowamu akabombagha, zisimbiwe mwibuku ilya Mbili iya bamwene aba ba Yuda.

³⁰ Pakabapo ubwite ubusita kumala pakasi pa Lehobowamu nu Yelobowamu.

³¹ Po u Lehobowamu akafwa nukusyiliwa mukaya akakulu nkani aka Devedi mu Yelusalemu. Unyina akaba we Naama, umu Amoni po umwana wache u Abiya akamupyana pakuba we mwene.