1 Abamwene 13 - IBAYIBOLO 2024

¹ U Mwene akamulamula umulaghuzi uwamu Yuda ukuti abuke ku Beteli, po akafika kulakula bo u Yelobowamu imiliye pa palubazu ulwa chighemo akubika ichakwiyipa.

² Po umulaghuzi yula akachighuna ichighemo chila akati, “Wee chighemo, wee chighemo! U Mwene ati, ‘Umwana umulumendo u Yosiya akwiza pakupapiwa munyumba iya Devedi. U Yosiya akwiza pakubabika papako abaputi aba pabuzilo ubwapamwanya ubwakwiputilapo ivifwani, babo bakubika ivyakwiyipa pachighemo ichi, sona akwiza pakughochelapo amafupa agha bantu banaba.’ ”

³ Pisiku lilalila umulaghuzi yula akabika ichimanyilo ichakuti, “Ichi cho chimanyilo chicho u Mwene achibika: Ichighemo chikwiza pakumongonkana, sona itoyi lilyo lili panapo likwiza pakukupuka.”

⁴ Bo u mwene u Yelobowamu ivwa amazyu agha mulaghuzi yula nizya chighemo icha mu Beteli, akagholosezya inyobe yache ku chighemo chila nukuti, “Muleme!” Loli inyobe yache yiyo akamusonta nayo umulaghuzi yula yikuma umwakuti akapotwa pakuyinyosezya.

⁵ Panapo na panapo ichighemo chila chikamongonkana, sona itoyi likakupuka, ukuyana ni chimanyilo icha Mwene ukwendela mu mulaghuzi uwa Chala.

⁶ U mwene akamubuzya umulaghuzi yula akati, “Wee undambilizizyeko kwa Mwene u Chala wako, sona unyiputile ukuti inyobe yane yipole.” Umulaghuzi yula akamulambilizizya kwa Mwene, po inyobe yache yikapola.

⁷ U mwene akamubuzya umulaghuzi yula akati, “Twende kunyumba pakulya ichakulya, sona nkwiza pakukupa ichabupi.”

⁸ Loli umulaghuzi yula akamula akati, “Napapo ungampa hafu uwa bukabi bwako, ane intangabuka poka nawe pakulya ivibama pamo ukung'wela amizi.

⁹ Pakuti u Mwene akandamula ukuti, ‘Utakalye ivibama pamo ukung'wela amizi, pamo ukwenda izila yiyo ukendamo.’ ”

¹⁰ Po akenda izila iyinji, atakenda izila yiyo akendamo pakubuka ku Beteli.

Umulaghuzi umughosi uwamu Beteli

¹¹ Pakabalilo kalakala kukabako umulaghuzi yumo umughosi yuyo akikalagha mu Beteli. Po abana bache bakiza nukumupangila ivintu vyosi vivyo umulaghuzi uwaku Yuda yula akabomba pisiku lilalila, sona na mazyu ghagho akamubuzya u mwene.

¹² Uwise akabalalusya akati, “Nkimba endite zila yoni pakubwela?” Po abana abache bala bakamulanjizya izila yiyo umulaghuzi yula akenda pakufuma ku Yuda.

¹³ Akababuzya abana bache bala akati, “Mpinyila ichakwikalilapo pampunda.” Abana a bala bakamupinyila, po akakwelapo

¹⁴ nukumuchimbilila umulaghuzi uyunji yula. Akamwagha ikaye mukazundila mwikwi ilya mupandapanda. Po akamulalusya akati, “Nkimba awe we mulaghuzi uwamu Yuda?” Umuntu yula akamula akati, “Nene.”

¹⁵ Umulaghuzi umughosi yula akamubuzya akati, “Twende kunyumba pakulya.”

¹⁶ Loli umulaghuzi yula akamula akati, “Ntanganyokela kunyumba yako pakulya ivibama pamo pakung'wela amizi.

¹⁷ U Mwene akansoka ukuti, Utakalyanje ivibama pamo ukung'wela amizi pamo ukwenda izila yuyo wafumiye.”

¹⁸ Umulaghuzi umughosi yula akati, “Nane bulo ne mulaghuzi. Uwantumi uwa Mwene akambuzya akati, ‘Buka poka nawe kunyumba yako pakulya ivibama nukung'wela amizi.’ ” Loli umulaghuzi yula akatamantagha.

¹⁹ Po umulaghuzi uyunji yula akanyokela nawe nukulya poka nawe munyumba yache.

²⁰ Bo bali pakulya, u Mwene akanena nu mulaghuzi umughosi, yuyo akamunyosya uwamwabo.

²¹ Akamukolomokela umulaghuzi uwa Chala uwamu Yuda akati, “U Mwene akuti, Utakaghivwila amazyu agha Mwene u Chala wako, sona utakaghakonka amalamulo agha Mwene u Chala wako ghagho akakupa.”

²² Ukanyokela nukulya ichibama nukung'wela amizi pabuzilo bubo akakubuzya ukuti, “Utakalyanje ichakula pamo utakang'welaye amizi. Pachifukwa ichakuti wabomba bunubu, umuvimba wako ghutakwiza pakusyiliwa mumapumpa agha banyenya bako.”

²³ Bo bamala pakulya nukung'wela, umulaghuzi umughosi yula akapinyilila ichakwikalilapo pampunda iya mulaghuzi uwamu Yuda yula.

²⁴ Bo akubwela, akakomana ni nkalamu mumusebo, yiyo yikamughogha. Po umuvimba wache ghukalambalala pamusebo, bo impunda ni nkalamu vyimiliye papipi nu muvimba ghula.

²⁵ Abantu bamo babo bakadumusannyanga palapala bakawennya umuvimba ghulambalaye pamusebo, bo inkalamu ni mpunda vyimiliye papipi palapala. Po abantu bala bakabuka pakubapangila abantu mu Beteli mukaya akakulu nkani, mumo umulaghuzi umughosi yula akikalagha.

²⁶ Bo umulaghuzi umughosi yula ivwa zinizi, akati, “Mulaghuzi yuyo atakaghivwila amazyu agha Mwene. U Mwene amutumiye inkalamu ukuti yimughoghe, ukuyana namumo u Mwene akamusokela.”

²⁷ Umulaghuzi yula akababuzya abana bache akati, “Mpinyila ichakwikalilapo pampunda.” Abana bala bakamupinyila,

²⁸ po akabuka nukuwagha umuvimba ghulambalaye pamusebo, bo inkalamu ni mpunda vyimiliye palubazu palapala, pakuti inkalamu yitakaghulya umuvimba pamo ukuyizepulannya impunda.

²⁹ Po umulaghuzi umughosi yula akaghunyamula umuvimba ghula pampunda nukwiza nagho mukaya akakulu nkani ukuti bamulile, sona nukughusyila mwipumpa.

³⁰ Po umulaghuzi umughosi yula akaghusyila umuvimba ghula mumapumpa agha pakaya kache, sona pakumulila bakatinji, “Wee mukamu wane!”

³¹ Bo bamusyila, akababuzya abana bache akati, “Nanti nafwa munsyile mwipumpa lilyo umulaghuzi yula asyiliwamo, sona amafupa ghane mughalambalike papipi na mafupa ghache.

³² Pakuti amazyu agha Mwene ghagho akaghanena umwakususannya ni chighemo mu Beteli, sona ni nyumba zyosi izyakwiputilamo pamwanya pighamba mutwaya utukulu utwa mu Samaliya, naloli ghakwiza pakukwanilisiwa.”

Imbibi iya Yelobowamu

³³ Pope bulo u Yelobowamu atakazileka imbibi zyache, loli akabasala abaputi pakasi pabantu bulo abakulekanalekana ukuti babombaye imbombo pachighemo chicho akazenga. Umuntu wesi yuyo akalondagha pakuba muputi akamupaghula ukuti abanje muputi.

³⁴ Iyi yikaba mbibi yiyo abamunyumba iya Yelobowamu bakabomba. Ichi cho chifukwa abamunyumba yache bakananganika nukuzimila pachisu ichapasi.