1 Abamwene 12 - IBAYIBOLO 2024

Aba Izilayeli bakumusambukila u Lehobowamu

¹ U Lehobowamu akabuka ku Shekemu, pakuti aba Izilayeli bosi bakabungana kulakula pakumwimika ukuti abanje we mwene.

² Bo Yelobowamu umwana uwa Nebati ivwa zinizi, yuyo akaba achili ali mu Ijiputi pakumuchimbila u mwene u Solomoni, akanyokako.

³ Abantu bakamwitizya u Yelobowamu, po u Yelobowamu poka ni chilundilo chosi icha ba Izilayeli bakabuka kwa Lehobowamu nukumubuzya ukuti,

⁴ “Ughuso akatunyamulizyanga ikoli ing'wamu nkani, loli awe utupepuleko imbombo inkafu nikoli ing'wamu, po tukwiza pakukubombela.”

⁵ U Lehobowamu akabamula akati, “Bwelagha tasi, mwize sona bo ghachilapo amasiku matatu.” Po abantu bala bakabwela.

⁶ U mwene u Lehobowamu akababuzikizya abasongo babo bakamubombelagha uwise u Solomoni, bo achili mumi. Akabalalusya akati, “Nkimba imbamule ichoni abantu banaba?”

⁷ Abasongosongo bala bakamula bakati, “Nanti ilelo waba we wambombo umwiza uwa abantu banaba pakubabombela nukubamula akiza, po bakwiza pakukubombela bwila na bwila.”

⁸ Loli u Lehobowamu akazisulannya zizyo bakamubuzya abasongo bala, nukubabuzikizya abalumendo abantanka yache, sona babo bakamubombelagha pakabalilo kalakala.

⁹ Akabalalusya akati, “Nkimba imbamule ichoni abantu banaba, babo bakumbuzya ukuti, ‘Utupepuleko ikoli ing'wamu lilyo ughuso akatunyamulizya?’ ”

¹⁰ Abalumendo abantanka yache bala bakamwamula bakati, “Abantu babo bakubuzizye ukuti, ‘Ughuso akatunyamulizyanga ikoli ing'wamu, loli awe utupepuleko,’ ubabuzye uti, ‘Akafingwi kane akanandi aka kakulu ukuchila umusana uwa tata wane.

¹¹ Utata wane akabanyamulizyanga ikoli ing'wamu, loli ane nkwiza pakumupela ukuti abanje mung'wamu nkani ukuchilapo. Utata wane akabasyempa ni ndisa, loli ane nkwiza pakubalumizya na bankonya.’ ”

¹² Bo ghachilapo amasiku matatu u mwene u Yelobowamu poka na bantu bosi bakabuka sona kwa Lehobowamu ukuyana namumo akababuzizya ukuti, “Mwizaye sona bo ghachilapo amasiku matatu.”

¹³ U mwene yula akabamula abantu bala nu bukali nkani nukuzisulannya zizyo abasongo bala bakamubuzya.

¹⁴ Loli akivwila zizyo abalumendo abantanka yache bakamubuzya ukuti, “Utata wane akabanyamulizyanga ikoli ing'wamu nkani, loli ane nkwiza pakulipela ikoli lila pakuba ling'wamu nkani ukuchilapo. Utata wane akabasyempa ni ndisa, loli ane nkwiza pakubalumizya na bankonya.”

¹⁵ Po u mwene yula atakabateghelezya abantu bala, pakuti u Mwene weyuyo akaziyanizizya zila ukuti zibanje bunubu, umwakuti amazyu agha Mwene ghagho akamubuzya u Yelobowamu umwana uwa Nebati ukwendela mwa Ahiya uwaku Shilo ghakwanilisiwe.

¹⁶ Bo aba Izilayeli bazyaghannya ukuti u mwene atakubateghelezya, bakamwamula bakati, “Aswe tute ni chigaba nachimochimo mubumwene ubwa Devedi. Wee, epapo pano! Mwee ba Izilayeli, zagha tubwelaye kuvisakasa vyitu. Wee mwana uwa Devedi, manya utwako na bamunyumba yako.” Po aba Izilayeli bosi bakabwela mutwaya twabo.

¹⁷ Loli u Lehobowamu akabalaghilagha aba Izilayeli babo bakikalagha mutwaya utukulu mu Yuda.

¹⁸ U mwene u Lehobowamu akamutuma u Adonilamu, yuyo akaba we kapitawa uwakwenelezya imbombo izyakufyenga bulo, loli aba Izilayeli bosi bakamughogha na mabwe. U mwene Lehobowamu akakwela mungolo yache nukuchimbilila ku Yelusalemu.

¹⁹ Po aba Izilayeli babasambukiye abamunyumba iya Devedi mupaka nilelo bulo.

²⁰ Bo aba Izilayeli bosi bivwa ukuti u Yelobowamu anyokako, bakamwitizya kulukomano pakumwimika ukuti abanje we mwene wabo. Loli uluko ulwa Yuda lukaba pasi pa bamunyumba iya Devedi.

Ubulaghuzi ubwa Shemaya

²¹ Bo u Lehobowamu afika mu Yelusalemu akababungannya poka abasilikali 180,000 abaluko ulwa Yuda, na baluko ulwa Benjamini ukuti balwe ubwite naba Izilayeli umwakuti bamunyosezye u Lehobowamu ubumwene.

²² Loli u Chala akamubuzya umulaghuzi u Shemaya umuntu uwa Chala akati,

²³ “Umubuzye u Lehobowamu umwana uwa Solomoni u mwene uwamu Yuda, sona nuluko losi ulwa Yuda nulwa Benjamini poka na bantu abanji bosi uti,

²⁴ ‘U Mwene ati: Mutakalwanje ubwite na bakamu binyu aba Izilayeli. Mwebosi bwelagha. Pakuti chicho chabombiwa bo bwighane bwane.’ ” Abantu bosi bakivwila zizyo u Mwene akanena, po bakabwela ukuyana namumo u Mwene akalamulila.

U Yelobowamu akumukana u Mwene

²⁵ U Yelobowamu akakazenga sona akaya akakulu nkani aka Shekemu muchisu icha maghamba icha Efulayimu nukwikala mulamula. Pisinda pache akabuka pakukazenga akaya akakulu nkani aka Penuweli.

²⁶ U Yelobowamu akinong'onagha akati, “Losi ulu ubumwene bukwiza pakunyokela ku bamunyumba iya Devedi.

²⁷ Nanti abantu banaba bakubuka ku Yelusalemu pakubika ivyakwiyipa mu Nyumba iya Mwene, amoyo ghabo ghakwiza pakunyokelako sona kwa mwene wabo u Lehobowamu uwamu Yuda. Po bakwiza pakungogha nukunyokela kwa mwene u Lehobowamu.”

²⁸ Bo mwene yula abuzikizya, akapanga ivifwani ivya ngwata vibili ivya golide. Po akababuzya abantu akati, “Mwee ba Izilayeli, mwabukagha ku Yelusalemu pakwiputa akabalilo akatali nkani. Ilelo abachala binyu bo aba, babo bakabefya mu Ijiputi!”

²⁹ Akachibika ichifwani choka mu Beteli, ichinji akachibika mu Dani.

³⁰ Po ichintu chinichi chikabapela aba Izilayeli ukuti banangaye pachifukwa ichakuti bakabukagha mupaka ku Dani pakwiputa ichifwani chilachila.

³¹ U Yelobowamu yula akazenga sona ubuzilo ubwapamwanya ubwakwiputilapo ivifwani pighamba nukubasala abaputi napapo batakaba ba Levi.

³² Akalamula ukuti pisiku ilya 15 ilya mwezi uwa eyiti pabanje ulusekelo, ulwakuyana bulo nu lusekelo lulo lukaba mu Yuda, sona bakabika ivyakwiyipa pachighemo. Akazibomba zinizi mu Beteli, nukubika ivyakwiyipa ku vifwani ivya ngwata vivyo akapangagha. Akabika sona abaputi mu Beteli ukuti babombaye imbombo pabuzilo bwache ubwapamwanya ubwakwiputilapo ivifwani.

³³ Pisiku ilya 15 ilya mwezi uwa eyiti ghugho akaghusala, u Yelobowamu akabika ivyakwiyipa pachighemo chicho akachizenga mu Beteli. Po akalamula ukuti aba Izilayeli babanje nu lusekelo, sona akabuka pakubika ivyakwiyipa pachighemo palapala.